Romanos 13

Ri kabinic chiquiwach tak raj wach re ri tinamit

1Lic chirajawaxic chique conoje ri ticawex e caquiya quib quetak cuma ri e aj wach re ri tinamit, ma na jinta wa takanic paquik'ab rique we na e ta ri Dios ya'yom re chique. Janipa c'u ri takanelab e c'olic, e ri Dios ya'yom ri takanic paquik'ab. 2E uwari'che china ri na cuya ta rib chuxe' ri takanic que ri e aj wach re ri tinamit, ri' e cuyac rib chirij ri takanic cojotal can ruma ri Dios. Yey e janipa ri que'anaw re wa', chiquibil quib caquitzucuj ri' ri k'atbal tzij paquiwi'. 3Ma ri quetakanic na e ta cojom re caquicoj xi'in ib che ri cu'an ri utz; ecojtalic re caquicoj xi'in ib che ri cu'an ri na utz taj. We ca'aj c'u la na caxi'ij ta ib la chiquiwach ri quetakanic, e 'ana la ri utz y jela' cayac ne k'ij la cuma ri quetakanic. 4Ma rique ecojotal pakawi' ruma ri Dios cha' caqui'an ri utz chike. No'j we rilal ca'an la ri na utz taj, ri' xi'ij ib la chiquiwach, ma ya'tal paquik'ab rique caquiya pa c'ax ri cu'an ri na utz taj.#13:4 “Ma ya'tal paquik'ab rique caquiya pa c'ax ri cu'an ri na utz taj”: Pa ri ch'a'tem griego cubi'ij “ruma wa' rique cuc'a'am ri espada”. Yey e uchac ri Dios ri caqui'an rique echiri' caquiya pa c'ax ri cu'an ri na utz taj. 5Ruma c'u la', lic chirajawaxic cakaya kib cojtak cuma ri e aj wach re ri tinamit. Caka'an wa' na xa ta ruma ri c'o paquik'ab rique cojquiya pa c'ax, ma e ruma ri cakana' chikac'u'x lic chirajawaxic caka'an ri jusuc'. 6Ruma ne ri' ca'an ralak ri tojonic tz'onom che ri tinamit cuma ri e aj wach, cha' rique utz caqui'an ri chac uya'om ri Dios paquik'ab. 7Ya'a c'u alak chique chiquijujunal janipa ri takal chique caya'ic. Che ri takal che ca'an tojonic,#13:7 “Tojonic”: Pa caxtila wa' e “tributos e impuestos”. tojo alak. Che ri takal che cacoj utzij, cojo alak utzij. Che ri takal che cayac uk'ij, yaca alak uk'ij.

Ri kabinic chiquiwach tak ri ticawex

8We c'o c'as la ruc' junok, manajtir la che utojic. Yey konoje nenare' c'o “kac'as” chikawach, wa' e ri c'ax cakana' kib. Ec'u ri jun c'ax cuna' ri ratz-uchak', ri' catajin che u'anic ri catakan ri Tzij Pixab re ri Dios che. 9Ma chupa ri Tzij Pixab re ri Dios cubi'ij wa': «Matmacun chirij ri c'ulaniquil. Matcamisanic. Matelk'anic. Ma'an rak'ubal chirij junok. Marayij uwach ri na awe taj.»#Éx. 20:13-17 Wa' wa takanic ruc' ronoje ri nic'aj chic takanic re ri Dios, cu'ana xa jun ruc' wa ch'a'tem: «C'ax chana'a rawatz-achak' jela' pacha' ri c'ax cana' awib ri'at.»#Lv. 19:18; Mt. 22:39 10Ma china ri c'o rutzil c'u'xaj ruc', na camacun ta chirij ri ratz-uchak'. E uwari'che echiri' cakac'ut ri rutzil c'u'xaj c'o kuc', e cojtajin che u'anic ri catakan Rutzij Upixab ri Dios che.

11'Ana c'u alak ronoje wa' ma eta'am alak ri k'ij oj c'o wi. We cawar kawach, chirajawaxic chojc'astajok,#13:11 We ri'oj pacha' oj warinak chwach ri Dios, chirajawaxic cac'un sak chikawach cha' jela' caketa'maj y caka'an janipa ri caraj ri Dios chike. ma ruk'ijol ri kacolobetajic más xa nakaj chi c'o wi chwa echiri' xkacoj rubi' ri Cristo. 12E wa oj c'o wi e pacha' xulan chi rak'ab y xa nakaj chic casakir wi. Ruma c'u la' maka'an ke'oj janipa ri ca'an xa xe'lak'ay pa k'eku'm; e ka'ana janipa ri takalic ca'an pa ri K'ijsak. E lic ka'ana ke che tak ri to'bal uya'om ri Dios cha' cakach'ij uchuk'ab tak ri na utz taj.#Ef. 6:11 13Chojbin c'u jusuc' jela' pacha' ri takal chique ri quebin pa ri K'ijsak. Makaya kib che tak nimak'ij na utz ta uwach. Makaya kib che k'abaric. Makach'ulaj ri kacuerpo ruc' ch'ulilaj mac. Makaya kib che ch'a'oj chikawach y mu'an c'ax kac'u'x chirij junok. 14Ri 'ana alak e wika ib alak che ri Kanimajawal Jesucristo; wa' e que'elawi cu'an alak xa jun ruc' Rire. C'utu alak wa' ruc' ri binic silabic alak y maya c'u alak luwar catakan pawi' alak ri rayibal na utz ta uwach re ri ti'jil alak.

Currently Selected:

Romanos 13: acrT

Highlight

Copy