Romanos 14

Mojch'o'jin puwi ri na il ta uwach

1C'ulu alak ri jun c'amaja' cumaj usuc' sa' ri caraj ri Dios chique ri cubul quic'u'x ruc' ri Cristo.#14:1 Pa ri ch'a'tem griego cubi'ij “ri c'amaja' canimar ri cubulibal uc'u'x”. Chupa wa capítulo 14, wa' e que'elawi ri hermanos caquich'ob rakan c'o takanic lic chirajawaxic wi conoje caquitakej, ma e chiquiwach rique ronoje wa' wa takanic ruc' ri Dios petinak wi, tob c'o jujun chic hermanos caquimaj usuc' xa cuc' rachijab petinak wi wa' wa takanic. Mach'o'jin alak ruc' xa ruma na junam ta runa'oj rire ruc' ri na'oj ralak. 2Ma puwi ronoje ri ya'talic re catijic, c'o ri cuch'ob rakan utz catiji' ronoje tak wa' yey c'o ri c'amaja' cumaj usuc' ruc'utunic ri Dios; y chwa c'u rire, c'o wa'im e mac che jun we cutijo, y ruma c'u ri' xew cutij ichaj. 3Ec'u ri' ri jun cutij ronoje, na utz taj we cuc'ak bi uk'ij ri jun xa k'alaj ri cutijo. Yey ec'u ri jun xa k'alaj ri cutijo, na utz taj we cuk'at tzij puwi ri jun cutij ronoje. Ma e ri Dios c'uluyum que wa' wa ticawex. 4¿Lal china rilal cha' cu'an lal aj k'atal tzij puwi ri raj chac jun chic? Ma e ri rajaw quilowic we utz ri cu'ano o na utz taj. Jec'ula' puk'ab ri Dios c'o wi quebuto' chiquijujunal ri raj chac cha' quetiqui' chi utz chwach yey cu'an wa' ruc' runimal uchuk'ab.

5C'o ri cuch'obo c'o k'ij lic il uwach re yacbal uk'ij ri Dios chwach jujun chic k'ij; yey c'o ri junam caril ronoje ri jujun k'ij. Chiquijujunal lic chirajawaxic quetiqui' chi utz che tak ri caquich'ob rakan.#14:5 C'o ri na lic ta k'alaj we utz ca'anic o na utz taj. Puwi tak wa', chirajawaxic chikajujunal cakach'ob chi utz su'be caka'an wa' o su'be na caka'an taj. Pero na ube taj we ri'in cancoj umac jun chic xa ruma na junam ta runa'oj ruc' ri we'in. 6Ec'u junok lic cu'an il uwach che juna k'ij, re yacbal uk'ij ri Kanimajawal cu'ano. Yey e junok chic na cu'an ta il uwach che wa' wa k'ij, ma chwach rire ronoje k'ij e re yacbal uk'ij ri Kanimajawal. Jec'ula', e ri jun cutij ronoje, cutijo re yacbal uk'ij ri Kanimajawal, ma cutioxij che ri Dios. Yey ri jun xa k'alaj ri cutijo, jela' cu'ano ma cuch'obo ruc' wa' cuyac uk'ij ri Kanimajawal; y cutioxij c'u ri' che ri Dios.

7Ma na jinta junok chike xa pa re rire c'aslic y na jinta junok xa pa re rire cacamic. Ma ri c'aslem y ri camic puk'ab ri Dios c'o wi. 8We oj c'aslic, ri kac'aslem e re yacbal uk'ij ri Dios; yey we xojcamic, wa' re yacbal uk'ij ri Dios. Jec'ula', we oj c'aslic o we xojcamic, oj chi re ri Kajawal. 9Ma ruma wa' ri Cristo xcamic y xc'astaj lo chiquixo'l ri ecaminak cha' jela' cu'ana Cajawal ri ecaminak chic cuc' ri c'a e c'aslic.

10Rilal, ri ca'an che ib la lal aj k'atal tzij puwi ri hermano la, ¿su'chac ca'an la wa'? O rilal, ri cac'ak bi la uk'ij ri hermano la, ¿su'chac ca'an la wa'? Ma konoje c'o jun k'ij coje'tac'ala na chwach ri k'atbal tzij re ri Cristo. 11Ma jewa' ri tz'ibital can chupa Ruch'a'tem ri Dios:

Pakatzij wi Ri'in in c'aslic, cacha ri Kajawal,

y pakatzij wi, chinuwach Ri'in

caquixucuba' na quib conoje ri ticawex,

y ruc' ruchi' quikul conoje caquibi'ij panuwi Ri'in,

xew Ri'in in Dios#Flp. 2:10-11 Is. 45:23

cacha'. 12Jec'uri'la' copon jun k'ij echiri' konoje coje'ela chwach ri Dios y ec'u Rire cak'alajisan re we utz o na utz ta ri ka'anom.

Mu'an alak latz'anel chique jujun chic

13E uwari'che maka'an chi oj k'atal tzij chikibil kib; moju'an ne latz'anel o tzakibal che juna hermano. 14Puwi ri ya'talic re catijic, ri'in lic weta'am ruma ri Kanimajawal Jesús y lic nujiquibam c'u uwach wa': Ronoje utz y na ch'ul taj chwach ri Dios. No'j we c'o junok cuch'obo c'o ri catijic “ch'ul”, ri' xew chwach rire ch'ul wi.#14:14 We c'o junok cubi'ij c'o wa'im “ch'ul”, wa' e que'elawi rire cuch'ob rakan e mac che jun we cutijo. 15Yey we ruma ri catij la, capaxij la uc'u'x ri hermano la, ri' ri catajin la che uc'utic na e ta chi ri rutzil c'u'xaj. Ruma c'u wa', lic na ube taj xa ruma ri catij la, c'o junok caresaj rib chirij ri Cristo yey ruma ne rire xcam ri Cristo. 16Mac'o c'u ma'an alak we ruc' wa' tzel cach'a'tibex lo ri binic silabic alak, tob ne lic utz chiwach ralak. 17Yey chupa rutakanic ri Dios ri lic chirajawaxic wi na e ta sa' ri wa'im cakatijo o sa' ri kaya' cakakumu; ma e ri cojbin jusuc', ri cojc'oji' chi utzil chomal y ruc' qui'cotemal ruma ruto'bal ri Santowilaj Ruxlabixel ri Dios. 18Ma e ri jela' caquilok'nimaj ri Cristo, ri quibinic quisilabic cuc'ul uc'u'x ri Dios y chom c'u quilitaj cuma ri ticawex.

19E uwari'che, e katakej janipa ri cojuc'am bi chi utzil chomal y cuya kaq'uiyibal chwach ri Dios, cha' jela' cakato' kib chikawach. 20Mawulij c'u alak ri chac u'anom ri Dios pa ranima' junok xa ruma ri wa'im catij alak. Katzij, ronoje ri ya'talic re catijic, na ch'ul taj. Pero na utz taj we quetzak jujun pa mac xa ruma ri cakatijo. 21Más utz we na cakatij ta ti'ij, na cakatij ta vino y mac'o ne maka'ano, we ruma wa' juna hermano casach una'oj, catzak pa mac o cak'ob ruchuk'ab chwach ri Dios. 22We jiquibam la uwach lic utz ri catajin la che u'anic chwach ri Dios, ri' lic utz; pero más utz we wa' cacanajic xew chwach ri Dios y rilal. Lic nim uk'ij ralaxic ri jun cuna' chuc'u'x lic utz ri cu'an chwach ri Dios, ma jela' na cajawax ta che cuk'at tzij puwi' chiribil rib. 23No'j we junok xa queb upa cutij ri catajin che, ri' utuquel cuc'am lo k'atbal tzij puwi' ma na cubul ta uc'u'x ruc' ri cu'ano. Ma e janipa ri cu'an junok yey na cu'an ta ruc' cubulibal uc'u'x, ri' camacunic.

Currently Selected:

Romanos 14: acrT

Highlight

Copy