San Mateo 20

Attho Jesúspaꞌ tomaꞌntaterraneterr eꞌñech allponeshakma atsaꞌtarethta allowen atarwasañexhno pamtharr yeth

1‘Yompor poꞌkowenña ñeñth attho ayochreshathtena ña poeꞌntañoth, ñeñthpaꞌ añ tomaꞌntena ñeñth ateth pena poesheñarr aneꞌtañ. Ñañapaꞌ awathekma awaꞌmoen eꞌnyenayaꞌ acheñ ñeñthchaꞌ tarwasat paꞌmro oꞌch thoteññañetaꞌ poenaremh. 2Ñeñth allpon entospaꞌ ateth otosanet: “Amaꞌt semno oꞌch setarwasenaꞌ naꞌmro. Pamthaꞌtetspaꞌ netsaꞌtasach allpon kelle ñeñth patherr denario.”#20.2 Denariopaꞌ kelle ñeñth allpon tsaꞌtenet pamtharr ñeñth tarwasets all paꞌnyo. Ñetñapaꞌ eꞌñe pokteꞌ eñchet allentha moeñanet paꞌmro, allchaꞌ thotoset narmetsmo. 3Oꞌña enomeꞌtaꞌmoenpaꞌ oꞌ alla awerrerr allekma shontena acheñeneshaꞌ ñeñth eꞌnyeneꞌ tarwas. Allñapaꞌ entwerranerr tama allponsheña, ñetpaꞌ ama es otteneto. 4Ñañapaꞌ ateth otosanet: “Sapaꞌxhoꞌña ñerraꞌm semneꞌpaꞌ oꞌch setarwasaꞌ naꞌmro; napaꞌ netsaꞌtasach allpon ñeñth poktetsa.” Ñetpaꞌxhoꞌña allentha awanmoet paꞌmro allchaꞌ thotoset ñamet narmetsmo. 5Allempo xhap poktopaꞌ alla awerrerr aneꞌtañ, alla entwerranerr poꞌpotantañ acheñ. Ñetpaꞌxhoꞌña atthekma otwerraneterr ñeñth ateth otan ñorraꞌ poꞌpotantañ. Ñetpaꞌxhoꞌña allentha moeñerraneterr paꞌmro allchaꞌ thotoset ñamet narmets. Oꞌña ellerrenmochpaꞌ oꞌ alla awerrerr, allñapaꞌ entwerranerr poꞌpotantañ acheñ. Ñetpaꞌxhoꞌña eꞌñe atthekma otwerraneterr ñeñth ateth otan ñorraꞌ poꞌpotantañ. Ñetpaꞌxhoꞌña allentha moeñerraneterr paꞌmro. 6Attheña oꞌ ellerrenpaꞌ oꞌ alla awerrerr, allñapaꞌ entwerranerr poꞌpotantañ acheñ, ñetpaꞌxhoꞌña ama es otteneto. Ñetpaꞌxhoꞌña ateth otwerraneterr: “Sapaꞌ ¿esoꞌmareꞌtña attha sellapeneꞌth thomxhaꞌtyesetsña arrma? Amaña es sotteno.” 7Ñetñapaꞌ ateth ochet: “Yapaꞌ amakaꞌyeña eseshayeꞌ yetarwasatenaye ñeñthoꞌmarkaꞌye ama es yotteno.” Ñañapaꞌ ateth otanet: “Ñewa, sapaꞌxhoꞌña oꞌch awes naꞌmro, amaꞌt mameshapaꞌ setarwasaꞌnen. Napaꞌ netsaꞌtasach allpon ñeñth poktetsa.” 8Oꞌña poenasoꞌtenpaꞌ aneꞌtaññapaꞌ otosan ñeñth kowampeneꞌ allowen paꞌtarwasañer: “Theꞌpaꞌ oꞌch pexhoreꞌter atarwasañneshaꞌ, oꞌch petsaꞌtyesapoerranet eꞌñe poesheñaꞌttsokmoet. Añchaꞌ ñanom petsaꞌtapoerra ñeñth tarwasosets chentaꞌ allotheñach phaꞌmothech tsaꞌtyesapoerrawet atthothach petsaꞌtwanet ora allowenet amaꞌt ñeñth aromtañowen.” 9Ñeñthña tarwasosets ellerroneth ñetñapaꞌ oꞌ waxherret. Eꞌñe allponeshakma atsaꞌtarethetyesapoerret ñeñth patherr denario. 10Attheña allempo oꞌ waxherra ñamha ñeñth tarwasosets awathekma, ñetñapaꞌ xha otenapoetañ ñatoꞌ atonchaꞌ atsaꞌtarethtapoerret. Tharraña ñetpaꞌxhoꞌña eꞌñe poesheñaꞌttsokmoetpaꞌ eꞌñe allponeshakma atsaꞌtarethtapoerret ñeñth patherr denario. 11Allempo agapetpaꞌ ñetñapaꞌ xha poꞌpoñ entet, xha eꞌmoñeꞌtweret aneꞌtañ. 12Ñeñthoꞌmarña ateth ochet: “Añeneshaꞌ ñeñth wapatsa chentaꞌpaꞌ ñetñapaꞌ mamesha tarwasoset. Eꞌñe allponeshakma petsaꞌtapoerranet ñeñth eꞌñe allpon petsaꞌtapoerrya yamha. Amaꞌt yapaꞌ oꞌ yellapen yaꞌñetseꞌ yetarwas, nanak etay atsrreth all yetarwasen. Esoꞌmareꞌtña eꞌñe allponeshakma petsaꞌtapoerrya ñeñth allpon petsaꞌtapoera ñamha ñeñth tarwasosets mameꞌ.” 13Allempo ateth otwer atarwasañ, aneꞌtaññapaꞌ ateth och: “Ama, masheñchaꞌ, xhoyeꞌ neshkënpe, eꞌñe allpona netsaꞌtenpha ñeñth allpon yaꞌpoktataꞌmoen aromtaña. 14Theꞌpaꞌ phanerr pekhllayor, orrerreph. Napaꞌ eꞌñe pokteꞌ nenteñ na allponchaꞌ netsaꞌcha ñeñth wapatsa chentaꞌ allpon netsaꞌtasa samha. 15Sapaꞌ amaꞌt pokteyeꞌ senteñe allpon ñeñth eꞌñe nokma napaꞌ eꞌñech ateth nepeꞌ ñeñth ateth nemnen na. Ñatoꞌ tharroꞌmartheꞌ xha moeneꞌ seꞌmoñeꞌtenenñaꞌ napaꞌ atarrkaꞌye amoerañan.” 16Ñeñthoꞌmar theꞌpaꞌ oꞌch noterrserr: Ñeñth ama esoyeꞌ senteno sa theꞌ tharraña ñetña allempopaꞌ atarrchaꞌ asherben enterranet Yompor. Ñeñthña atarr asherben sentyen theꞌ, ñetña allempopaꞌ amach tama asherbenayeꞌ enterraneto Yompor. Ñeñthoꞌmar theꞌpaꞌ oꞌch alla noterrserr: Amaꞌt shonteñña ñamha ñeñth awaꞌñareth ñeñthchaꞌ neyochreshaꞌ neperreñ, tharraña ñetpaꞌ eꞌñe poesheñaꞌttseta ñeñthchaꞌ eꞌñe pokteꞌ nenterr na ñeñthchaꞌña eꞌñe neyochreshaꞌ neperr poktakma.

Allempo Jesúspaꞌ alla eñotaterraneterr ñapaꞌ xhokmach amtsarethterra

(Mr. 10.32-34; Lc. 18.31-34)

17Jesúspaꞌ awenerr Jerusaléñoneth poeyochreshowen. Oꞌ awanenan poeyochreshaꞌ aꞌyentheyeꞌ allñapaꞌ ateth otnenanet:

18—Theꞌ poꞌñoxh oꞌ aweney Jerusaléño, allchaꞌ pomataterrnet na Ñeñthen Acheñetosets. Añchaꞌ nerrmaterreꞌ ñeñth paꞌmhchaꞌtaretherneshaꞌ pen allowen judioneshaꞌ poꞌkornaneshar ñamha ñeñth atarr etsotayenayeñ ñoñets ñeñth ateth anareth. Ñetñapaꞌ atethchaꞌ otyesnet naꞌmtsarethterrepaꞌtoꞌ, 19oꞌch pomoerrnet poꞌpoñ acheñesho ñeñth ama judioneshayaye. Ñetña poecheꞌtatseteñothetanpaꞌ allchaꞌña achmhareꞌterrnet, ashterrnetchaꞌ, atthothchaꞌña oꞌch korsoꞌtamperrnet, tharraña pomaꞌpamtañoch alla netanterra.

Ñeñth pachor pen Jacobo ñamha Juan, ñañapaꞌ enamoenan Jesús atthoch anorrxhaꞌtyeswerr poechoyoreshaꞌ Jesúsesho

(Mr. 10.35-45)

20Allempoñapaꞌ ponmosya ñeñth pachor pen Jacobo ñamha Juan ñeñth Zebedeo poechemereshaꞌ. Wapa epoet epsheñoꞌmar poechoyor, ñañapaꞌ konkorpanaꞌtosana Jesús atthoch es enamos. 21Jesúsñapaꞌ ateth otaph:

—¿Esoꞌtña pemnen?

Ñapaꞌ ateth otos:

—Napaꞌ añ nemnen theꞌpaꞌ oꞌch pemnatapon añ nechoyor epsheñoꞌmar oꞌch anorrwerret pesho allchaꞌ phaꞌmhchaꞌtarethterra eꞌñe pekowenño. Poesheñarrpaꞌ anorrosepaꞌch pekowenroth, poꞌpsheñeññapaꞌ anorrosepaꞌch peꞌchkotheroth, allchaꞌ kowentapreterrpet.

22Jesúsñapaꞌ ateth otanet:

—Sapaꞌ amakaꞌye señoteñe ñeñth poꞌñoxh senamoenen. Añkaꞌyeña senamoenen atthoch semoeroxhtapreterrna samha. Taꞌm ¿eꞌñetheꞌ poꞌñoxh pokteꞌ senteñ oꞌch semoeroxhterra samha tharroꞌmar napaꞌ xhokmach naꞌmoeroxhtatarethterra?

Ñeñth moeroxhteñetspaꞌ Jesúspaꞌ ateth tomaꞌntatanet ñerraꞌmrratheꞌ atarr pesherr es yorren orramhtso ñamha attho yapatarethtena eꞌñe ateth ñerraꞌmrratheꞌ xho yaꞌmtsarethterra Yomporekop. Ñetñapaꞌ ateth ochet:

—Yapaꞌxhoꞌña atethchaꞌkaꞌye yepeꞌ.

23Ñañapaꞌ alla oterraneterr:

—Ñewa, poꞌñoxhpaꞌ saꞌmoeroxhtatarethterrach samha attheschaꞌ ñerraꞌm na, saꞌmtsarethterrach samha. Tharraña añña atthoch sanorryesos nesho nekowenroth ñamha neꞌchkotheroth allchaꞌ sekowentapreterrna ñeñthpaꞌ amachkaꞌye nayeꞌ semnaterraye. Añchaꞌña anorryeswerrets all ñeñth eꞌñe oꞌpatatenna Nompor.

24Añña poꞌpotantañ poeyochreshaꞌ ñeñth xharrasheña allempo eꞌmet ñeñth ateth enamoen Jacobo epoet paꞌmoꞌnasheñ Juan, ñetñapaꞌ ama pokteyeꞌ eñcheto xha moeneꞌ eꞌmoñeꞌchet. 25Allempoña Jesúspaꞌ alla xhoreꞌterranet allowen eꞌñe ñesho ñeñthpaꞌ ateth otanet:

—Sapaꞌ señoteñtheꞌ ñeñth ateth pena poꞌpoñ acheñeneshaꞌ ñeñth ama judioneshayaye. Ñet ñeñth paꞌmhchaꞌtarether penet eꞌñech paꞌmhchaꞌnoxhteñokmañen pomnaren phaꞌyenan allowen poeyochreshaxhno. 26Sapaꞌ arepaꞌchña attheyeꞌ sephannaꞌtatsto eꞌñe sommoꞌcheñoth. Sokoppaꞌ añña poktetsa oꞌch ateth sepena. Ñerraꞌm erraꞌtsenothes ñeñthes atarr amhchaꞌtarethoyen entetsañ ñeñthes acheñres sokoppaꞌ añ poktetsa oꞌch ateth senterra ñerraꞌm ama esosheꞌmayayso ñeñth ateth pena ñeñth attha atarr tarwasets poꞌpotantañekop. 27Ñamha ñerraꞌm erraꞌtsenothes ñeñthes moeneneꞌ oꞌch atarr asherben entenset ñeñthesña acheñrespaꞌ añ poktetsa oꞌch ateth senterra ñerraꞌm ama esoyayso allochñapaꞌ atthochña eꞌñech kowen sethorrena poꞌpotantañekop ateth ñerraꞌmrratheꞌ acheñ ñeñth atarr tarwasets eꞌñe attha. 28Ateth ñerraꞌm na Ñeñthen Acheñetosets, napaꞌ ama añekpayeꞌ newapo añe patsro allochñapaꞌ sapaꞌ oꞌch attha atarr sesherbhapoen na ateth ñerraꞌmrratheꞌ napaꞌ atarr amhchaꞌtareth sentenen. Napaꞌ añekopña newapa allochñapaꞌ nachña sesherbhoseꞌña sa, ñeñthoꞌmarña napaꞌ naña pomostsa nañeña oꞌch nerromos sokop atthochña netsaꞌtwerrnasa soꞌchñar ñeñthes shontes paꞌnamen acheñres. Atthochña sapaꞌ amach sañeña rromatso soꞌchñarekop.

Allempo Jesús aꞌkrraterranerr epsheña aporoꞌyeth

(Mr. 10.46-52; Lc. 18.35-43)

29Allothñapaꞌ alla meterreterr Jericóthpaꞌ kothaꞌwanererr shonteꞌ acheñeneshaꞌ. 30Allchaꞌ oñmoetpaꞌ allñapaꞌ awepaꞌt anorros epsheña aporoꞌyeth eꞌñe thoñetophño. Ñetña eñotatarethtet añ wetsa Jesús. Ñeñthña aporoꞌyethpaꞌ allentha rranareꞌtapet Jesús, ñeñthpaꞌ ateth otapet:

—Pemoerayeꞌchnomya, Ayochreshathe, phapaꞌ ñeñtheph Davidnaꞌtareph.

31Acheñeneshaꞌñapaꞌ xha moeneꞌ cheꞌptareꞌtnometña aporoꞌyeth, ateth otoset:

—Oꞌwa semma.

Aporoꞌyethñapaꞌ elloña alla rranareꞌterreterr ateth otereterr:

—Pemoerayeꞌchnomyañakaꞌye, Ayochreshathe, phapaꞌ ñeñtheph Davidnaꞌtareph.

32Jesúsñapaꞌ alla thomos oꞌ xhoreꞌtanetpaꞌ ateth otanet:

—¿Esoꞌtña semnen ñeñthchaꞌ ateth nephoses?

33Ñetñapaꞌ alla otereterr:

—Ayochreshathe, yapaꞌ añ yemnen oꞌch pekwatnomoey atthoch oꞌch kowen yenterrapa.

34Jesúsñapaꞌ allentha moerosanet atthoña ñapaꞌ aꞌphllaklleꞌchosanet. Aꞌphllaklleꞌchwanetpaꞌ aporoꞌyethñapaꞌ allorokma enterret eꞌñe kowen. Eꞌñe kowerrtsetpaꞌ xha kothaꞌnmoet ñamet Jesús.

Currently Selected:

San Mateo 20: ame

Highlight

Copy