San Mateo 19

Attho Jesúspaꞌ yexhatosanet ama asannaꞌtpawoyaye

(Mr. 10.1-12; Lc. 16.18)

1Serrpareꞌtwanerr Jesúspaꞌ err Galileoth. Arr xherr Judeo, ñeñthña Judeapaꞌ eꞌñe alla Jordanaso yomhtaꞌn. 2Kothaꞌwanererr shonteꞌ acheñeneshaꞌ allñapaꞌ aꞌkrratyeswerraneterr allowenet patsnañetheret.

3Allñapaꞌ oꞌ alla waxherrñañerr ñamha fariseoneshaꞌ. Ñetpaꞌ añ moenenet eꞌñe poeshkëñothetpaꞌ oꞌch eñorachet ñeñth ama kowenayaye. Atthoña ñetpaꞌ ateth otoset:

—Taꞌm ¿pokteꞌtheꞌ oꞌch yeser yethapor ñerraꞌm esempo errothenoth?

4Jesúspaꞌ ateth otapanet:

—Amaꞌt selleyareña ateth oten Yompor poꞌñoñ ñeñth akellkareth awathotheñ. Ñewa, allpaꞌ ateth oten, Yomporpaꞌ eꞌñe awathothen allempotheñ es yexhkatyes allempo yexhkatan ñamha asheñorr, yexhkatan ñamha peno. 5Allempo Yomporpaꞌ ateth ot: “Ñeñthoꞌmarña yakmapaꞌ ñerraꞌm esempoch senaꞌta, koyaneshaꞌpaꞌ oꞌch echan poerrollar, añ pokteꞌ oꞌwañchaꞌ tama yemteñet pamoꞌmteꞌ allochñapaꞌ yakmapaꞌ atthochña eꞌñe parrokmat epoet poethapor. Atthoña epsheñoꞌmaretpaꞌ eꞌñech pathrra poꞌchets penet.” 6Atthothchaꞌña oꞌwañchaꞌ poesheñaꞌtetstet, allochñapaꞌ oꞌch eꞌñe poesheñarratet. Ñeñth attho Parets eꞌñe pathrratatan yakma epoet poethapor amach xha ellopaꞌ alla sannerreto.

7Ñetñapaꞌ ateth otereterr:

—Ñerraꞌm poꞌñoxh atethpaꞌ ¿esoꞌmareꞌtña nanña Moisés ñoñets all oteney oꞌch yaph yethapor papell akellkareth atthoch yesannerra, allempoñapaꞌ eꞌñech pokteꞌ oꞌch yeser?

8Ñañapaꞌ ateth oterraneterr:

—Sapaꞌ ama es sexhenoyo seyoxhro ñeñthoꞌmarkaꞌyeña Moiséspaꞌ moenatas oꞌch seseꞌ sethapor. Amaꞌt ateth moenataseñpaꞌ tharraña Yompor eꞌñe awathotheñpaꞌ amakaꞌyeña attheyeꞌ oteno. 9Na theꞌpaꞌ oꞌch notas: Ñerraꞌm eseshaꞌ serreꞌ poethapor, poethaporñapaꞌ ñerraꞌm ama xho agënano poꞌpsheñeñ yakma, ñeñth eꞌñe attha serreꞌ poethapor, ñañapaꞌ xhach ochñaꞌtamperrana poethaporesheꞌmañ ñerraꞌm oꞌch alla yorerranerr poꞌpoñ koyaneshaꞌ. Ñeñthpaꞌ ama pokteyeꞌ enteñe Yompor. Ñamha ñeñthchaꞌ yorerreꞌ koyaneshaꞌ asareth, ñeñthña yakmarpaꞌ xhach chetapreten thaporets. Ñeñthpaꞌxhoꞌña ama pokteyeꞌ enteñe Yompor.

10Poeyochreshaꞌñapaꞌ ateth ochet:

—Ñerraꞌm amatheꞌ asapawo yethapor amaꞌt awathapaꞌ amatheꞌ tama pokteyayeña yokop oꞌch yeyore koyaneshaꞌ ñeñthchaꞌ yethapor yephaꞌ.

11Ñañapaꞌ ateth otanet:

—Tharraña atethpaꞌxhoꞌña eꞌñekaꞌye pokteñ tharraña ama allowenakmayeꞌ xhennasoña seyoxhro ateth tharroꞌmar ama allowenakmayeꞌ seyxhenoña ateth. Ñeñthpaꞌ aña eñoteneꞌ ñeñth ateth kothapeꞌchaten Yompor. 12Ñewa, ateth ñerraꞌm poesheñaꞌtets yakma ñeñth attha eñalletenet eꞌñech attha yexhkënet poꞌchets amach moeneñeto koyaneshaꞌ. Ellonethpaꞌ eñall ñamha poꞌpotantañ yakmaneshaꞌ, ñetñapaꞌ xhoch akaparethtenet ñeñthoꞌmarña amach moeneñeto koyaneshaꞌ. Ellonethpaꞌxhoꞌña eñall ñamha poꞌpotantañ yakmaneshaꞌ, ñetñapaꞌ añekpach ama moeneñeto koyaneshaꞌ eshekchaꞌ eꞌñech aña maꞌyoxhrenet Yomporekop atthoch atarr ayochreshathtena ña poeꞌntañoth. Ñeñth ateth kothapeꞌchenet Yomporekop ñeñthpaꞌ eꞌñe pokteꞌ. Atthepaꞌchña pet ñerraꞌm Yompor kothapeꞌchatenawet ateth.

Attho Jesúspaꞌ bensareꞌtamphsapan cheshaneshaꞌ ñeñth wapatoñet

(Mr. 10.13-16; Lc. 18.15-17)

13Allempoñapaꞌ waxhaꞌtachet ñamha shonteꞌ cheshatholleshaꞌ Jesúsesho. Ñetpaꞌ añekopña waxhaꞌtachet oꞌch aꞌphllaꞌyesapanet Jesús atthoch bensareꞌtamphsapanet. Jesúsña poeyochreshaꞌ allempo entapan ñeñth waxhaꞌtateꞌ cheshaneshaxhno ñetñapaꞌ ama pokteyeꞌ eñcheto oꞌch anmoset cheshatholleshaꞌ Jesúsesho ñeñthoꞌmarña ama amnatarethtapoeto. 14Tharraña Jesúsñapaꞌ ateth otanet:

—Pokteꞌñaxhoꞌ semnachñakaꞌyeña cheshaneshaꞌ onosetepaꞌ eꞌñe nesho. Amachkaꞌye xha sepatareꞌtatstapaneto tharroꞌmar allowen ñeñth atarr neyemtenaya na eꞌñe atthet ñerraꞌmrratheꞌ cheshatholl, ñetchaꞌ oꞌpatenetña Yompor poꞌkowenña ñeñth attho ayochreshathtena ña poeꞌntañoth.

15Allempoña Jesúspaꞌ aꞌphllaꞌyesapan cheshaneshaꞌ allowenet eꞌñe poesheñaꞌttset. Allempoñapaꞌ awerr alloth.

Attho poesheñarr ñeñth wepoeshameñ ñeñth atarr ekhllayoreth ñañapaꞌ eñoranaꞌtosana Jesús

(Mr. 10.17-31; Lc. 18.18-30)

16Allempoñapaꞌ wapa poesheñarr yakma Jesúsesho, ñeñthpaꞌ ora wepoeshameñ. Ñañapaꞌ ateth otos:

—Maestro, phapaꞌ atarr kowen acheñreph, theꞌpaꞌ oꞌch photapoen ¿errothenaꞌtchaꞌña nephaña na eꞌñe kowen atthochña napaꞌ korretsanach eꞌñe thayotheñ amaꞌt errponañowen?

17Jesúsñapaꞌ ateth otaph:

—Esoꞌmareꞌt photenenña napaꞌ atarroꞌ kowen acheñren. Arr arromñatheneshaꞌ amaꞌt eꞌñe poesheñarrapaꞌ ama eñalleña ñeñth eꞌñe kowen acheñer. Ñapthaña Yompor ñeñth eꞌñe poꞌñoxh kowen. Ñerraꞌm añtheꞌ pemnen atthoch phapaꞌ korretsaphach eꞌñe thayotheñ amaꞌt errponañowen añ poktetsa phokop oꞌch eꞌñe pephowoñ ñeñth ateth oten Yompor.

18Wepoeshaꞌñapaꞌ alla aꞌphthoꞌtererr:

—¿Erraꞌtsentheꞌña ñoñets ñeñthchaꞌ ateth nephowa?

Jesúsñapaꞌ ateth otererr:

—Ñeñthpaꞌ añkaꞌye, amach pemtsatsto acheñ, amach pechtapretatsto thaporets, amach petyesatsto, amach petomaꞌtamphsatsche phamoꞌts eꞌñe attha. 19Ñamha eꞌñe pemorrenteñothpaꞌ pemhchaꞌnaꞌchchaꞌ phompor ñamha phachor. Ñamha añchaꞌ atarr kowen pemorrenta phamoꞌts eꞌñe ateth atarr pemorrentena eꞌñe phañeña.

20Wepoeshaꞌñapaꞌ alla oterranerr Jesús:

—Eꞌñe cheshotheñ ora añexhnopaꞌ napaꞌ eꞌñekaꞌye netsotweñ. Taꞌm ¿erraꞌtsenmeñtheꞌña ñeñth nepalltena?

21Jesúsñapaꞌ ateth otererr:

—Ñerraꞌm añ pemnen oꞌch eꞌñe petsotwa ñeñth pepalltenmeñ theꞌpaꞌ añchaꞌña ateth peperra, oꞌch awerrephpaꞌ oꞌch pepomwerr ora allpon ñeñth pechyen oꞌch phapaꞌyeraꞌ wokchañneshaxhno ñeñth atarr es palltaꞌyetsa, atthochña phapaꞌ pecherrchaꞌ ñeñth atarr nanak sherbets Yompor poeꞌntaño. Allempochña pewerrapaꞌ oꞌch phoktherren atthoch eꞌñe neyochreshaꞌ neperreph eꞌñe poktakma.

22Oꞌña eꞌmwan wepoeshaꞌ ñeñth ateth och Jesúspaꞌ ñañapaꞌ poellkëñeshaꞌ awerr tharroꞌmar ñapaꞌ shonteꞌ esokmañen echyen.

23Jesúsñapaꞌ ateth otan poeyochreshaꞌ:

—Poꞌñoxh napaꞌ oꞌch notas: Ñeñth atarr ekhllayorethpaꞌ atarrkaꞌye nanak echarr atthoch agapoñet Yompor poꞌkowenña ñeñth attho ayochreshathtena ña poeꞌntañoth. 24Ñeñthpaꞌ atethchaꞌ netmaꞌntacha. Yapaꞌ yeñoteñ berr añekmoen allpon ñerraꞌm wakësh#19.24 Ñewa, Jesús añ tomaꞌntatanet camello ñeñth payara penet all paꞌnyo, ñeñth eꞌñe allpon ñerraꞌmrratheꞌ wakësh. atarrkaꞌye thorrapoꞌ oꞌch eshoꞌtosa añethollponathollo ateth ñerraꞌmrratheꞌ akosh poetathollo. Ñeñthpaꞌ atethkaꞌye penaña acheñ ñeñth ekhllayoreth ello atarr thorrapoꞌ oꞌch agapan ñamha Yompor poꞌkowenña ñeñth attho ayochreshathtena ña (tharroꞌmar ñetpaꞌ ama moeneñeto oꞌch sewanmoet ñeñth atarr morrentenet ñet atthoch poeyochreshaꞌ perranetañ Yompor).

25Poeyochreshaꞌña allempo eꞌmet Jesús ateth oten, ñetñapaꞌ xha moeneꞌ llekaꞌrrtetpaꞌ ateth otannaꞌtyenet:

—Tharraña ñerraꞌm ateththeꞌpaꞌ amatheꞌ eseshaꞌ aꞌkeshphatarethterrtso amaꞌt poesheñarra tharroꞌmar yapaꞌ yeñoteñkaꞌye wakëshpaꞌ amakaꞌ eshoꞌtenoña aksheketo.

26Allempoña Jesúspaꞌ attha kowaꞌyesanetpaꞌ ateth oterraneterr:

—Sa arromñatheneshaspaꞌ amach es errothenayeꞌ apen senteno. Tharraña Yomporpaꞌ ama eñalle ñokop ñeñth atarr thorrapoꞌ enten.

27Allempoña Pedropaꞌ ateth och:

—Partseshachaꞌ, poꞌñoxh yapaꞌ oꞌ eꞌñe yeswanom ora allowen atthoch eꞌñe yoktherreph. Yapaꞌ ¿esoꞌtchaꞌña apoerreyña Yompor?

28Jesúspaꞌ ateth otanet:

—Poꞌñoxh notenes, allempoch etserraterr pats allempoch nanorrwerr nekonaño allchaꞌ nekowenetwerra nepartsoteñoth na Ñeñthen Acheñetosets sapaꞌxhoꞌña allchaꞌ sanorryeswerr sekonañexhno eꞌñe poesheñaꞌttsos xharraꞌ poechena epa sekonañ ñeñthes noktheneꞌ. Sa ñeñthes noktheneꞌ allchaꞌ sanorryesos allothchaꞌña saꞌmhchaꞌtarethterraña añekop ñeñth xharraꞌ poechena epa Israel poꞌmhrenñeneshaꞌ.

29Jesúspaꞌ alla oterraneterr:

—Allowen erraꞌtsenchaꞌ acheñer ñeñthchaꞌ eꞌñe sewanmoeꞌ allowen amaꞌt paꞌpakllowen, amaꞌt paꞌmoꞌnasheñneshaꞌ ñatoꞌ poꞌxhaneshaꞌ ñatoꞌ pompor, pachor ñatoꞌ poꞌpatseñ, atthochña na eꞌñech kowen sherberrnet, amaꞌt erraꞌtsenchaꞌ ñeñthchaꞌ sewanmoeꞌ allowen, elloña ñetpaꞌ oꞌch alla agërret shonteꞌ esokmañen ñeñth atarr kowen. Amaꞌt allponapaꞌtets sewanomyesnomoet, elloña xharrochchaꞌ xharraꞌ alla agapyerret. Elloña tsapathonethpaꞌ oꞌch agërret ñeñth alloch ñetpaꞌ korretsetach beñekpoen poksheñeshokmañen. 30Theꞌpaꞌ señochepaꞌch, eñall shonteꞌ acheñ ñeñth ama esoyeꞌ senteno sa theꞌ tharraña ñetña allempopaꞌ atarrchaꞌ asherben enterranet Yompor. Ñamha eñall shonteꞌ acheñ ñeñth atarr asherben sentyen sa theꞌ, tharraña ñetña allempopaꞌ amach asherbenayeꞌ enterraneto Yompor.

Currently Selected:

San Mateo 19: ame

Highlight

Copy