Hebreos 4

1Ñewa, Yomporpaꞌ poꞌñoxh oteney yexhapchaꞌ allchaꞌ yamesapretera allchaꞌ eꞌñe kowen yokshaꞌwera Yompor ñerraꞌm poꞌñoxhchaꞌ yameꞌñera yamha. Thayepaꞌtñapaꞌ orameñ ateth oteney yamha eꞌñe yemhchaꞌnañothpaꞌ yameꞌñyepaꞌch theꞌt poesheñaꞌttsothespaꞌ amatheꞌ sexherro samha all. 2Tharroꞌmar ñeñth athpareꞌtayeꞌth all amayopaꞌ aserrpareꞌtatarethtetañña kowen ñoñets Yomporeshoth tharraña ama wenetoña pathparñet tharroꞌmar amaꞌt eꞌmetañpaꞌ ama eseshayeꞌ ameꞌñaꞌpawoyeꞌ entaye. Yapaꞌxhoꞌña oꞌ serrpareꞌtaterryet yamha kowen ñoñets Yomporeshoth. 3Ñeñtheychaꞌ eꞌñe poꞌñoxh ameꞌñerraya Yompor ñeñtheychaꞌña xherrets allchaꞌ yamesapretera allchaꞌ eꞌñe kowen yokshaꞌwera Yompor. Ñeñthña ama ameꞌñetsopaꞌ ñetpaꞌ amach eseshaꞌ xherrtso allchaꞌ koshapreteret Yompor. Ñeñthpaꞌ eꞌñe atthekma ñeñth ateth otarethta awath ñeñth ama ameꞌñatso. Eꞌñe ateth oteney Yompor poꞌñoñ all akellkareth, ñeñthpaꞌ ateth oten Yompor:

Atarr atsrreꞌmoxhen nentaneteꞌth ñeñthoꞌmarña ateth nenaꞌ neñoñ ñokpoet: “Ñet poꞌñoxh amaꞌt awathapaꞌ amach nexhapaterraneto allchaꞌ amesapreterrnet allchaꞌ eꞌñe kowen koshaꞌwerrnetañ.”

Atthoña ñetpaꞌ amach eseshayeꞌ xherrtso allchaꞌ eꞌñe kowen koshapreteret Yompor. Ñewa, awath Yomporpaꞌ ña orrtateꞌ ameseñets eꞌñe allempotheñ yexhkatwawan pats ñamha enet. Ñeñthña ameseñetspaꞌ atarr koshateney yeyoxhrokmañen. 4Tharroꞌmar all poꞌñoño yeñoteñ ateth akellkareth, ñeñthpaꞌ ateth oten:

Oꞌ yexhkatwan Yompor allowen ñeñth allpon yexhkatyeswa, poꞌkanxherrmatñoñapaꞌ oꞌ ames Yompor.

5Tharraña poꞌpocheño all oterrerr Yompor poꞌñoñ ñeñth akellkareth, ñeñthpaꞌ ateth oten:

Ñeñth ama nameꞌñenayopaꞌ amach eseshayeꞌ xherrtso allchaꞌ amesapreterrnet atthoch eꞌñe kowen koshapreterrnet.

6Ñeñthoꞌmar yeñoteñ ñeñth eꞌmayeñ awath kowen ñoñets ñetpaꞌ amach eseshayeꞌ xherrtso allchaꞌ amesaterranet Yompor atthoch eꞌñe kowen poeyoxhrowen kosherret tharroꞌmar ñetpaꞌ ama eseshayeꞌ ameꞌñaꞌpawoyeꞌ entaye Yompor. Tharraña amaꞌt attheñpaꞌ yeñoteñ Yomporpaꞌ ama poenesho poꞌñoñ. Ñeñthoꞌmarña theꞌpaꞌ yeñoteñ Yomporpaꞌ attherach eꞌñe kowen amesaterran amaꞌt erraꞌtsena ñeñthchaꞌ poꞌñoxh ameꞌñaꞌpoꞌ enterreꞌ, atthochña ñetpaꞌ xherretchaꞌ allchaꞌ eꞌñe kowen kosherret. 7Ñewa, ñeñthoꞌmarña Yomporpaꞌ onañcherran poꞌpoñ poꞌyether, ñeñthpaꞌ oꞌ xherr theꞌ eshekchaꞌ amaꞌt patantarra acheñpaꞌ oꞌch ameꞌñeñet. Ñeñthoꞌmarña yeñoteñ Yomporpaꞌ ora atthera koweney tharroꞌmar amaꞌt metwen aton char allempotheñ athpareꞌcheteꞌth all amayopaꞌ oꞌ xhap allempo attho eñosatan David. Ñeñthpaꞌ ñeñthara ñeñth oꞌ notwanmas:

Ñerraꞌm esempoch seꞌmoeñ Yompor attho xhoreꞌtenes sañapaꞌ xhochña seꞌmhñoch thayepaꞌtña orameñ yeth allempo oꞌ xhoreꞌterres Yompor, amachña xha seꞌcharrtatatsto seyoxher.

8Ñewa, yeñoteñ Josué awathpaꞌ eꞌñe xhapatan israelneshaꞌ poechemereshaxhno all patso ñeñth all secheteꞌth awathotheñ allchaꞌ yexhoset. Tharraña amaꞌt xhapatanetañ allpaꞌ ama eseshayeꞌ poksheñeshoth poeyoxhrowen amesostsoña all. Ñerraꞌm eꞌñech kowen amesatwerranetañ Josuépaꞌ amach onañcherranñerroña Yompor poꞌpoñ poꞌyether atthoch koshaterrey eꞌñe kowen yeyoxhrowen. 9Ñeñthoꞌmarña yeñoteñ theꞌpaꞌ eñallmeñ ñeñth oꞌpatatenya Yompor ñeñthey poeyochreshaꞌ pen allchaꞌ eꞌñe yoksheñeshokmañen yameswerr. Ñeñthpaꞌ eꞌñe ateth ñerraꞌmrratheꞌ allempo ames Yompor awath poꞌkanxherrmatño. 10Tharroꞌmar allowen erraꞌtsenchaꞌ xherrets allchaꞌ amesaterranet Yomporpaꞌ ñetñapaꞌ amach alla es llekaterraweteꞌthe; eꞌñe pameseñothet kowenpaꞌ eꞌñech eñmaterret poeyoxhrowenet ateth ñerraꞌmrratheꞌ allempo eꞌnwan eꞌñe poktakma Yompor poꞌtarwas, eꞌñe poksheñeshokma ames. 11Yapaꞌxhoꞌña añepaꞌchña yeꞌnen atthoch yexherr yamha allchaꞌ amesaterrey Yompor atthochña eꞌñe yoksherra yeyoxhro. Theꞌñapaꞌ amaꞌt poesheñarrotheyapaꞌ amoepaꞌch alla yathpareꞌterreꞌthe theꞌt ama yexherro yamha all.

12Yompor erroth oteney, poꞌñoñpaꞌ atarr awamenkath ñeñthpaꞌ ama awañañathe. Ñeñth poꞌñoñpaꞌ eꞌñe ateth etsotenan ñeñth ateth moenen ña. Poꞌñoñpaꞌ allo xhokma ñerraꞌmrratheꞌ kochell ñeñth atarr etsotañtatareth emotoꞌmar. Oꞌch es yepataꞌ allopaꞌ eꞌñech beꞌthoswa ora, eꞌñech pechaꞌtampeswoñ amaꞌt posapowen. Atethkaꞌye penaña Yompor poꞌñoñ eꞌñech xhaponaya eꞌñe yeyoxhro amaꞌt eꞌñe yekamkëñowen, ñeñthchaꞌña eꞌñe yeñotaterreꞌ ñeñth yeyoxhroꞌtsen amaꞌt ñeñth allpon yokthapeꞌchyen ora esokmañen. 13Amaꞌt poesheñarrotheya amach errothenoth yeꞌpotampesyoña Yompor ñeñth yeyexhkateꞌ. Amatheꞌ errothenoth yaꞌnasotampesyoña, ñapaꞌ eꞌñekaꞌye entwennayña yeyoxher ñeñth ora allpon es yokthapeꞌchyen. Ñapaꞌ ñach yaꞌmethatatwerreꞌ allowen ñeñth allpon yokthapeꞌchyen.

Jesúspaꞌ ña korneshaterrets, eꞌñe metanaꞌtwerran allowen kornaneshaxhno attho atarr sherben ña

14Ñewa, yeñoteñ eñall ñeñth Yekorneshar yepen ñeñth atarr Partseshatets, ñeñthpaꞌ ñeñthara Jesús ñeñth Yompor Poechemer. Ñañapaꞌ oꞌ alla xherr allowanen poeꞌntaño eꞌñe all Pomporesho, allña eꞌñe kowen aꞌpoktatennay yokop. Ñeñthoꞌmarña yapaꞌxhoꞌña alloꞌnepaꞌch yeyemoetneña. Amoepaꞌchña yekexhpatstere. 15Tharroꞌmar Jesús ñeñth Yekorneshar yepen ñapaꞌ eꞌñe eñoteñ atthoch eꞌñe kowen llekapretenya allempo ama eꞌñeyeꞌ womenkayeꞌ yenteno yeyoxhro. Tharroꞌmar ñapaꞌxhoꞌña atthekma wapoñeꞌth allowen paꞌnamen topateñets, eꞌñe ateth yepena ya theꞌ xhokma wennaya paꞌnamen topateñets. Tharraña ñapaꞌ amaꞌt paꞌnamen wapoyeꞌth topateñets, ñapaꞌ amaꞌt parrocha ama phano ñeñth ama pokteyeꞌ enteno Pompor. 16Ñeñthoꞌmarepaꞌchña eꞌñe yeyemteñoth Yompor Poechemer, amach yemhchaꞌnañotheyeꞌ yexhoreꞌteñe Yompor amaꞌt ñeñth atarr partsotets poꞌkonaño. Eꞌñe poemoereñothey eꞌñech kowen eꞌmhñoteney, xhokmach yenpoeney. Ñamha ñerraꞌm esempo wennaya ñeñthchaꞌ yellkateneꞌ ñachña eꞌñe awamenkath yepeneꞌ.

Currently Selected:

Hebreos 4: ame

Highlight

Copy