Hebreos 5

1Ñewa, yeñoteñ allowen amaꞌt erraꞌtsena ñeñth paꞌmhchaꞌtarether pen ñeñth korneshatyets judioneshakop, ñeñthpaꞌ acheña, arromñatha. Ñapaꞌ añekop akrarethta ñach anarethtatsa atthoch eñen acheñeneshakop Yomporesho. Allempo es apoeñet Yomporpaꞌ ñach aneneꞌ oꞌpono Yompor paꞌpakllo. Allempo moetsenet payara ñeñth allo sherbeñet Yomporpaꞌ ñach neneꞌ eyarra poꞌrras allo tsaꞌtenana poeyochreshaxhno poꞌchñar. 2-3Ñapaꞌxhoꞌña ama womenkayeꞌ enteno poeyoxhro tharroꞌmar ñapaꞌ arromñatha ñeñthoꞌmarña ama eꞌñe poeyochreshakpayaya nenanoña eyarra poꞌrras; ñeñthpaꞌ ñokpaꞌnaña neñ allo tsaꞌtenana ñamha poꞌchñar Yomporesho. Attho ñapaꞌxhoꞌña ama womenkayeꞌ enteno poeyoxhro ñeñthoꞌmarña ñapaꞌ eꞌñe eñoteñ oꞌch llekapretana poeyochreshaꞌ allempo es pantenet ñet ñamha allempo yexhkatenet ñeñth sosey enten Yompor tharroꞌmar amaña eꞌñe ñeñtha neneto poeyoxhreto; xhokmaña poeseñet Yompor.

4Ñamha yeñoteñ amaꞌt eꞌñe poesheñarrapaꞌ ama eseshayeꞌ netso eꞌñe ñañeña atthoch korneshat Partsokop. Ñeñthpaꞌ Yomporña xhoreꞌteneꞌ amaꞌt erraꞌtsena poesheñarr ñeñthchaꞌña korneshatats. Ateth pha ñamha Aarón, ñapaꞌ Yomporña neꞌ attho korneshateꞌth Partsokop. 5Cristopaꞌxhoꞌña atthekma pha ñamha ama ñayeꞌ otatso, “napaꞌ nach korneshatats.” Pomporña neꞌ ñeñthchaꞌ korneshatats atthoch yekowentateññañ. Yeñoteñ Pomporpaꞌ ateth kowentateñ tharroꞌmar Yompor poꞌñoñ ñeñth akellkareth awath ñeñthpaꞌ ateth oten:

Phapaꞌ Nechemereph, theꞌñapaꞌ oꞌch neñotach acheñeneshaꞌ poꞌñoxh phapaꞌ Nechemer nepeneph tharroꞌmar theꞌpaꞌ oꞌch nenaph phach amhchaꞌtarethterrtsa.

6Poꞌpoñ akellkarethopaꞌ all otererr:

Phapaꞌ atthoch pekorneshaterrpaꞌ ñeñthpaꞌ amach wañerro amaꞌt eꞌñe errponaña. Eꞌñe ateth oꞌ phaꞌllsensarethterra ateth ñerraꞌm Melquisedec ñeñth korneshatatseꞌth awath.

7Allempo alloꞌtsenmeñ Cristo arr patsropaꞌ maꞌyochamphsa ñañeña. Maꞌyochamphsa eꞌñe womenk poellkëñeshaꞌ. Poeyaꞌchpeñeshaꞌ enaman Pompor ñeñth atarr awamenkatheshaꞌ atthoch aꞌkeshphach poerromoeñoth. Eꞌñe pomhchaꞌnaꞌteñothan Pomporpaꞌ ateth och: “Amach añeyeꞌ ateth pephatstono ñeñth nemnen na; añchaꞌña ateth pephon ñeñth pemnen pha.” Ñeñthoꞌmarña Pomporpaꞌ eꞌñe eꞌmhñoch. 8Ñewa, Cristo amaꞌt eꞌñe Yompor Poechemerpaꞌ ñapaꞌxhoꞌña atarr moeroxhta, atthoña eꞌñe yexhan atthoch eꞌñe kowen eꞌmhñotenan Pompor. 9Attho yexhan poeꞌmhñoteñpaꞌ ñeñthoꞌmarña eꞌñe etsotwan ora atthoch aꞌkeshphatañta, allochñapaꞌ atthoch aꞌkeshphaterran eꞌñe poktakma allowen erraꞌtsenchaꞌ eꞌmhñoterreꞌ ña. 10Ñeñthoꞌmarña Pomporpaꞌ neꞌ ñach korneshaterrets Partsokop eꞌñe ateth korneshateꞌth awath Melquisedec.

Ñeñth ama womenkayeꞌ penaye poeyoxher Yomporekop xha ottena ñerraꞌm ematholl

11Ñeñthpaꞌ orameñ shontemeñ nemneñeñ oꞌch notaseñ. Tharraña amaꞌtchaꞌ notaseñpaꞌ atarr thorrapoꞌ oꞌch nexhapatonas seyoxhro tharroꞌmar theꞌpaꞌ oꞌwañ tama semneꞌ amaꞌt erraꞌtsenapaꞌ oꞌch seꞌmhñoteñ. 12Sapaꞌ awathotheñ sameꞌñenañ ñeñthoꞌmarña theꞌpaꞌ sokoppaꞌ añ poktetsañ oꞌch seyxhatyeseñ poꞌpotantañexhno ñeñth allpon shonteꞌ señotyeneñ. Tharraña sañapaꞌ amaña attheyeꞌña sepeno tharroꞌmar sapaꞌ themeꞌttsen sepalltena oꞌch alla yexhaterrseterr Yompor poꞌñoñ ñeñth yexhatwaset eꞌñe ñenmath amaꞌt ñeñthpaꞌ ama thorrapawoyaye yokop oꞌch yeñoch. Sapaꞌ ama womenkayeꞌ sepeno seyoxher tharroꞌmar sapaꞌ xha sottena ñerraꞌmrratheꞌ ematholl ñeñth añach orren pachor pomosos ñeñth ama etsotenanaꞌ oꞌch rran rreñets ñeñth yerren ya. 13-14Ñamha yeñoteñ allowen ñeñth añach pokrramh pen pomosos, ñeñthpaꞌ ematholla ama eñotenanaꞌ oꞌch eꞌnan rreñets ñeñth xhokma yerren. Ñamha ñeñth ottetsa ñerraꞌmrratheꞌ emathollpaꞌ ama eñotenanoña Yompor poꞌñoñ atthoch pokteꞌ eñch Yompor. Tharraña ñeñth poꞌñoxh ateth enten Yompor ñerraꞌmrratheꞌ poꞌnaneshaꞌ ñetpaꞌ eꞌñech eñotenet ñeñth pokteꞌ enten Pomporet ñamha ñeñth ama pokteyeꞌ enteno; tharroꞌmar ñetpaꞌ awathotheñ ameꞌñeret Pomporet. Ñeñthoꞌmarña ñetpaꞌ alloꞌna senet etsotnomoet Yompor poꞌñoñ amaꞌt ñeñth atarr echarr ñeñthña eꞌñe pokrramh penet.

Currently Selected:

Hebreos 5: ame

Highlight

Copy