Popular Bible Verses from Hebreos 4

Share

Yompor erroth oteney, poꞌñoñpaꞌ atarr awamenkath ñeñthpaꞌ ama awañañathe. Ñeñth poꞌñoñpaꞌ eꞌñe ateth etsotenan ñeñth ateth moenen ña. Poꞌñoñpaꞌ allo xhokma ñerraꞌmrratheꞌ kochell ñeñth atarr etsotañtatareth emotoꞌmar. Oꞌch es yepataꞌ allopaꞌ eꞌñech beꞌthoswa ora, eꞌñech pechaꞌtampeswoñ amaꞌt posapowen. Atethkaꞌye penaña Yompor poꞌñoñ eꞌñech xhaponaya eꞌñe yeyoxhro amaꞌt eꞌñe yekamkëñowen, ñeñthchaꞌña eꞌñe yeñotaterreꞌ ñeñth yeyoxhroꞌtsen amaꞌt ñeñth allpon yokthapeꞌchyen ora esokmañen.

Ñeñthoꞌmarepaꞌchña eꞌñe yeyemteñoth Yompor Poechemer, amach yemhchaꞌnañotheyeꞌ yexhoreꞌteñe Yompor amaꞌt ñeñth atarr partsotets poꞌkonaño. Eꞌñe poemoereñothey eꞌñech kowen eꞌmhñoteney, xhokmach yenpoeney. Ñamha ñerraꞌm esempo wennaya ñeñthchaꞌ yellkateneꞌ ñachña eꞌñe awamenkath yepeneꞌ.

Tharroꞌmar Jesús ñeñth Yekorneshar yepen ñapaꞌ eꞌñe eñoteñ atthoch eꞌñe kowen llekapretenya allempo ama eꞌñeyeꞌ womenkayeꞌ yenteno yeyoxhro. Tharroꞌmar ñapaꞌxhoꞌña atthekma wapoñeꞌth allowen paꞌnamen topateñets, eꞌñe ateth yepena ya theꞌ xhokma wennaya paꞌnamen topateñets. Tharraña ñapaꞌ amaꞌt paꞌnamen wapoyeꞌth topateñets, ñapaꞌ amaꞌt parrocha ama phano ñeñth ama pokteyeꞌ enteno Pompor.

Amaꞌt poesheñarrotheya amach errothenoth yeꞌpotampesyoña Yompor ñeñth yeyexhkateꞌ. Amatheꞌ errothenoth yaꞌnasotampesyoña, ñapaꞌ eꞌñekaꞌye entwennayña yeyoxher ñeñth ora allpon es yokthapeꞌchyen. Ñapaꞌ ñach yaꞌmethatatwerreꞌ allowen ñeñth allpon yokthapeꞌchyen.

Ñewa, yeñoteñ eñall ñeñth Yekorneshar yepen ñeñth atarr Partseshatets, ñeñthpaꞌ ñeñthara Jesús ñeñth Yompor Poechemer. Ñañapaꞌ oꞌ alla xherr allowanen poeꞌntaño eꞌñe all Pomporesho, allña eꞌñe kowen aꞌpoktatennay yokop. Ñeñthoꞌmarña yapaꞌxhoꞌña alloꞌnepaꞌch yeyemoetneña. Amoepaꞌchña yekexhpatstere.

Yapaꞌxhoꞌña añepaꞌchña yeꞌnen atthoch yexherr yamha allchaꞌ amesaterrey Yompor atthochña eꞌñe yoksherra yeyoxhro. Theꞌñapaꞌ amaꞌt poesheñarrotheyapaꞌ amoepaꞌch alla yathpareꞌterreꞌthe theꞌt ama yexherro yamha all.