NA SAME 40
40
A nona vakamolimoli na tamata sa qai vakabulai mai na nonai valavala ca.
Vua na Domo-ni-sere. A Same i Tevita.
1Au a dauwaraki Jiova tikoga: Ka sa vakatu daligana vei au, ka rogoca na noqu tagi.
2Sa tuberi au cake talega mai nai keli sa tu kina na rorogo rerevaki, mai na qele lolobo talega,
Ka sa vakatura na yavaqu e na dela ni uluvatu, ka vakataudeitaka na noqu i lakolako.
3Ka sa vakacuruma ki na gusuqu e dua na sere vou, na vakavinavinaka vua na noda Kalou:
Era na raica na le vuqa, ka rere,
Ka vakararavi vei Jiova.
4Sa kalougata na tamata sa dauvakararavi vei Jiova,
Ka sa gole tani maivei ira na yalolevu, maivei ira talega era lesu tani ki na daulasu.
5I Jiova na noqu Kalou, sa ka levu na nomuni cakacaka e veivakurabuitaki ko ni sa cakava,
Kei na nomuni nanuma vei keimami:
E dredre me wiliki vakadodonu vei kemuni: Kevaka ka'u via vakatusa ka tukuna, e dredre ni wili.
6Ai soro kei nai madrali ko ni a sega ni vinakata;
O ni sa cula-basika na daligaqu:
Ai soro kama kei nai soro ni valavala ca ko ni sa sega ni taroga.
7Au a qai kaya, Raica, au sa lako mai,
Au a volai e nai vola vivigi,
8Au sa reki me'u kitaka na ka ko ni sa vinakata, noqu Kalou:
Io, na nomuni vunau sa tu e na vu ni yaloqu.
9Au a vunautaka na veivakadonui e nai soqosoqo levu:
Raica, ka'u sa sega ni tarova na gusuqu,
Ko ni sa kila ga, Jiova.
10Au a sega ni vunia e lomaqu na nomuni veivakadonui;
Au a tukuna ga na nomuni dina kei na nomuni veivakabulai:
Au a sega ni vunia na nomuni yalololoma kei na nomuni dina maivei ira nai soqosoqo levu.
11Koi kemuni talega, Jiova, mo ni kakua ni bureitaka vei au na nomuni yalololoma:
Me maroroi au tikoga na nomuni loloma kei na nomuni dina.
12Ni sa voliti au na ka ca sa sega ni wili rawa:
Sa vauci au na noqu i valavala ca, ka'u sa sega ni ta cake rawa kina;
Sa levu oqori ka lailai na drau ni uluqu: o koya sa waicala kina na yaloqu.
13Mo ni yalovinaka, Jiova, mo ni vakabulai au:
I Jiova, mo ni kusarawa mai mo ni vukei au.
14Me ra madua ka kidroa vata
Era segata na yaloqu me ra vakarusa;
Me ra suka vakainadaku ka vakamaduataki
Ko ira era gadreva tiko me'u vakacacani.
15Me ra luveniyali me kenai sau ni nodra veivakamaduataki
Era sa kaya vei au, Sai koya! Sai koya!
16Ia ko ira kecega era sa vakasaqarai kemuni, me ra reki ka marautaki kemuni:
Kei ira era sa vinakata na nomuni veivakabulai me ra kaya tiko,
Me vakalevulevui ko Jiova.
17Ia koi au ka'u sa dravudravua ka luveniyali:
Ia ka sa nanumi au tiko na Turaga:
Koi kemuni na noqu i vukevuke kei na noqu i vakabula;
Kakua ni berabera, na noqu Kalou.
Currently Selected:
NA SAME 40: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
