NA SAME 18
18
Vua na Domo-ni-sere. A Same i Tevita na tamata nei Jiova, o koya sa vosataka vei Jiova na vosa oqo e na siga sa vakabulai koya kina ko Jiova mai na ligadra kecega na nona meca, mai na liga i Saula talega: a sa kaya,
1I Jiova, au na lomani kemuni, na vu ni noqu kaukauwa.
2A noqu uluvatu ko Jiova, kei na noqu i drodro, kei na noqu i vakabula;
A noqu Kalou, o koya na noqu kaukauwa, ka'u na vakararavi vua;
A noqu i sasabai, kei na noqu kaukauwa ka'u sa vakabulai kina, kei na noqu vale ni valu cecere.
3Au na masu vei Jiova, o koya sa dodonu me vakacaucautaki:
Ka'u na vakabulai kina maivei ira na noqu meca.
4Sa vesuki au nai vau ni mate,
Ka ra sa vakarerei au ko ira na tamata ca era vaka na waluvu.
5Sa voliti au nai vau ni bulubulu:
Sa taumadaki au nai cori ni mate.
6E na noqu rarawa ka'u sa masu vei Jiova,
Ka tagi vua na noqu Kalou:
Sa rogoca na domoqu ko koya mai na nona vale tabu,
Ka sa yaco sara vua na noqu tagi, io, ki na daligana.
7Sa qai yavala ko vuravura, ka sa sautaninini
Sa yavavala talega na yavu ni veiulu-ni-vanua,
Sa yavala ni sa cudru ko koya.
8Sa lako cake na kubou mai na ucuna,
Kei na bukawaqa mai na gusuna sa vakayavuna:
Sa vakacaudrevi kina na qilaiso ni buka.
9Sa vakalolovirataka talega na lomalagi ko koya, ka lako sobu mai;
Sa tu e ruku ni yavana na butobuto loaloa.
10A sa vodoka na Jerupi, ka sa vuka:
Io, sa vuka mai e na taba ni cagi.
11Sa cakava na butobuto me nona yasana vuni me voliti koya, me nonai vakaruru;
Io na wai butobuto kei na o loaloa ni lomalagi.
12Sa seavu na o loaloa e nai serau ni matana;
Na uca-cevata kei na qilaiso katavera!
13Sa kuru talega ko Jiova mai na lomalagi,
Ka sa tabalaka cake na domona ko koya sa Cecere sara;
Na uca-cevata kei na qilaiso katavera!
14Sa tala na nona gasau ko koya, ka vakubutaki ira;
Ka sa vanataka na livaliva, ka vakidroataki ira.
15Sa qai rairai mai na dreke ni wai,
A sa votu mai na yavu kei vuravura,
Ni kemuni sa vunauca, Jiova,
Ka ni sa liwa na cagi ni nomuni cudru.
16Sa talatala maicake ko koya, ka tauri au,
Sa vueti au cake mai na wai levu.
17Sa vakabulai au mai na noqu meca kaukauwa,
Maivei ira talega era sa cati au, ni ra sa gumatua vei au.
18Era sa taumadataki au e na siga ni noqu rarawa;
Ia sa tokoni au ko Jiova.
19Sa kauti au talega yani ko koya ki na yasana rabailevu;
Sa vakabulai au ko koya, ni sa vinakati au.
20Sa saumi au ko Jiova me vaka na noqu yalododonu;
Me vaka na kena savasava na ligaqu sa sauma vei au ko koya.
21Ni'u a vakabauta na sala i Jiova,
Ka sega ni lesu tani vakaca maivua na noqu Kalou.
22Ni sa tu e mataqu na nona lewa kecega:
Kei na nonai lesilesi ka'u sa sega ni biuta tani vei au;
23Ka'u a yalododonu talega e matana,
Ka'u a tarovi au mai na noqu i valavala ca:
24O koya oqo sa sauma kina vei au ko Jiova na noqu i valavala dodonu;
Me vaka na kena savasava na ligaqu e matana.
25O ni na vakatakila na nomuni loloma vua sa dauloloma;
O ni na vakatakila na nomuni yalododonu vua sa yalododonu;
26O ni na vakatakila na nomuni yalosavasava vua sa yalosavasava;
O ni na vala kaya sa yaloveve.
27Kemuni na vakabulai ira na tamata sa vakararawataki;
Ia kemuni ena vakabalei ira sa mata viavialevu.
28Kemuni na tutuvaka na noqu cina;
Ena vakararamataka na noqu butobuto ko Jiova na noqu Kalou.
29Ni sai kemuni ka'u sa cici bula kina e na kedra maliwa na mataivalu,
Ia sai koya na noqu Kalou ka'u sa ladeva kina na bai.
30Ia na Kalou, sa dodonu na nonai valavala:
Sa vakatovolei na vosa i Jiova;
Ai sasabai ko koya vei ira kecega era sa vakararavi vua.
31Ia ko cei tale me Kalou, ko Jiova duaduaga?
Ia ko cei tale na uluvatu, na noda Kalou duaduaga?
32A Kalou ga sa vauca na toloqu e na kaukauwa,
Ka sa vakadodonutaka na noqu i lakolako.
33Sa cakava na yavaqu me tautauvata kei na nodra na me kila,
Ka sa vakaturi au e na noqu vanua cecere.
34Sa vakavulica na ligaqu me ia nai valu,
A sa musuki kina e na ligaqu na dakai kaukamea.
35O ni sa solia talega vei au nai sasabai ko ni sa vakabulai au kina;
Ka sa vakataudeitaki au na ligamuni matau,
A sa vakalevutaki au na nomuni yalomalua.
36O ni sa vakalalagataka vei au na noqu sala
Ka sa sega ni tidara kina na yavaqu.
37Au a vakasavi ira na noqu meca, ka vauci ira:
Au sa sega ni lesu tale mai, era sa kawaboko mada eliu.
38Au sa vuetaki ira, ka ra sa sega ni wavu tu rawa:
Era sa bale sobu e ruku ni yavaqu.
39Ni kemuni sa vauca na toloqu e na kaukauwa me ia nai valu:
Ko ni sa vakamalumalumutaki ira vei au era sa tu cake vakaivalu vei au.
40O ni sa solia talega vei au na domodra na noqu meca;
Me'u vakarusai ira era sa cati au.
41Era sa tagi yani, ka sa sega e dua nai vakabula:
Io, vei Jiova, ia sa sega ni vosa vei ira ko koya.
42Ka'u sa qai vurumemeataki ira me ra vaka na kuvu-ni-soso e na mata ni cagi:
Ka'u a biuti ira tani me vaka na lolobo e na saqata.
43O ni sa vakabulai au mai na nodra veileti na tamata;
O ni sa qisi au me'u liu vei ira na veimatanitu:
Era na qaravi au ko ira na tamata ka'u a sega ni kilai ira.
44Ni ra sa qai rogoci au, era na talairawarawa vei au:
Era na vakamalumalumutaki ira vei au ko ira na kai tani.
45Era na malai yani ko ira na kai tani,
Era na lako ninini mai na nodra tikina kaukauwa.
46Sa bula ko Jiova; ia me vakacaucautaki ko koya na noqu uluvatu:
Me vakalevulevui na Kalou sa vakabulai au.
47O koya ga na Kalou sa cudruvaki au,
Ka sa vakamalumalumutaki ira na tamata vei au.
48Sa vakabulai au ko koya maivei ira na noqu meca:
Io, ko ni sa vakaceceretaki au me'u uasivi cake vei ira era sa tu cake vakaivalu vei au:
O ni sa vakabulai au mai na tamata i valavala kaukauwa.
49O koya oqo ka'u na vakavinavinaka kina vei kemuni, Jiova, e na kedra maliwa na lewe ni veivanua,
Ka'u na seretaka talega na yacamuni.
50O koya sa vakayacora na veivakabulai levu vua na nona tui;
Ka sa kitaka na loloma vua sa lumuta ko koya,
Vei Tevita kei na nona kawa ka sega ni mudu.
Currently Selected:
NA SAME 18: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
