NA SAME 17
17
A masu sa ia e na gauna ni veivakacacani
A masu i Tevita.
1I Jiova, mo ni rogoca na kena dodonu, ni vakarorogo ki na noqu tagi,
Ni rogoca na noqu masu, sa sega ni lako mai na tebenigusu lasulasu.
2Me lako dina mai na matamuni na lewa e na vukuqu;
Me vakaraica ga na matamuni na ka e dodonu.
3O ni sa vakatovolea na yaloqu; o ni sa lako mai vei au e na bogi;
Ko ni a vakatovolei au sara, ia sa sega na ka ko ni na kunea;
Sa lomaqu ga me sega ni lako vakatani na gusuqu.
4E na vuku ni nodra cakacaka na tamata,
Ka'u a maroroi au e na vosa ni tebenigusumuni mai na nonai valavala na dauveivakarusai.
5Vakataudeitaka na noqu lako tiko e na nomuni sala,
Me kakua ni yavala nai lakolako ni yavaqu.
6Au sa tagi vei kemuni, ko ni na rogoci au, na Kalou:
Mo ni vakarorogo kivei au, io, ki na noqu vosa.
7Ni vakatakila mai na nomuni loloma e veivakurabuitaki, kemuni sa vakabulai ira e na ligamuni matau, era sa vakararavi ga vei kemuni,
Maivei ira era sa tu cake mai.
8Ni maroroi au me vaka na loa ni mata,
Vunitaki au e ruku ni yaloyalo ni tabamuni,
9Maivei ira na tamata ca era sa vaqeavutaki au,
Maivei ira na noqu meca era sa vakavolivoliti au me'u mate.
10Era sa kovuni e na nodra uro:
Sa vosa vakaviavialevu na gusudra.
11Era sa vakavolivoliti keitou e na neitou i lakolako:
Ka sa wanono ki na qele na matadra.
12O koya oqo sa tautauvata kei na laioni sa gu me ia na veidresulaki;
Kei na luve ni laioni sa lako lo e na yasana vuni.
13I Jiova, ni tu cake,
Taumadaki koya, ka vakabalei koya sobu:
Ni vakabula na yaloqu mai na tamata ca, e na nomuni seleiwau;
14Maivei ira na tamata e na ligamuni, Jiova,
Maivei ira na tamata ni vuravura oqo era sa rawata na nodra i votavota e na nodra bula oqo,
O ni sa vakamamautaka na ketedra e na nomuni yau vuni:
Sa ka levu tu na luvedra,
Ka ra sa tataunaka na vo ni nodra i yau me nodra na luvedra lalai.
15Ia koi au, ka'u na raica na matamuni e na yalododonu:
Ka'u na qai cegu ni'u sa yadra tale, ka sa ucui kemuni.
Currently Selected:
NA SAME 17: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
