JEREMAIA 26
26
Sa tauri ko Jeremaia, ni sa vunautaka na vosa ni Kalou, ka sa lewai, 1-11. Sa tukuni koya vei ira, ka sa qai vakadonui ka vakabulai, 12-24.
1Ni sa qai vakatekivu na lewa i Jioiakimi na luve i Josaia na tui Juta, sa yaco na vosa oqo maivei Jiova, ka vaka,
2Sa kaya ko Jiova; Mo tu e na rara vakabai ni vale i Jiova, ka vosataka ki na veikoro kecega e Juta, era sa lako mai me ra soro e na vale i Jiova, na vosa kecega ka'u sa vakarota vei iko mo vosataka vei ira; kakua ni ko vunia e dua na vosa: 3era na vakarorogo beka, ka lesu na tamata yadua mai na nonai tovo ca, me'u veivutunitaka na ca, ka'u sa nakita me'u cakava vei ira ni sa ca na nodra i valavala. 4Ia mo kaya vei ira, Sa kaya vakaoqo ko Jiova: Kevaka dou na bese ni vakarorogo vei au, ka sega ni muria na noqu vunau, ka'u sa vakarota vei kemudou, 5ka sega ni vakarorogo ki na vosa ni noqu i talatala na parofita, ko ira ka'u sa tala vei kemudou, ka sou e na mataka me'u tala, ia dou a sega ga ni vakarorogo; 6ka'u na qai cakava na vale oqo me vakataki Sailo, ia na koro oqo ka'u na cakava me ka e vosavosacati vei ira na veimatanitu e vuravura.
7Ia ko ira na bete kei ira na parofita kei ira na tamata kece, era sa rogoci Jeremaia ni sa vosataka na vosa oqo e na vale i Jiova. 8Ia ni sa tinia ko Jeremaia na vosa kece ka vakarota ko Jiova me tukuna vei ira na tamata kecega, era sa qai tauri koya ko ira na bete, kei ira na parofita, kei ira na tamata kece, ka kaya, Ko na mate vakaidina. 9A cava ko sa ia kina na parofisai e na yaca i Jiova, ka vaka, Ena vakataki Sailo na vale oqo, ia na koro oqo ena lala me sega e tiko kina? A ra sa soqoni vata vakaca vei Jeremaia ko ira na tamata kecega e na vale i Jiova. 10Ni ra sa rogoca na turaga ni Juta na ka oqo, era sa qai lako cake mai na vale ni tui ki na vale i Jiova, ka ra tiko sobu e nai curucuru ki na matamata-ni-koro vou ni vale i Jiova. 11Era sa qai vosa ko ira na bete kei ira na parofita vei ira na turaga kei ira na tamata kecega, ka kaya, Sa dodonu me mate na tamata oqo; ni sa parofisaitaka na ca ki na koro oqo, me vaka dou sa rogoca e daligamudou.
12Sa qai vosa ko Jeremaia vei ira kece na turaga kei ira na tamata kecega, ka kaya, Sa talai au mai ko Jiova me'u parofisaitaka na ca ki na vale oqo kei na koro oqo na ka kecega dou sa rogoca: 13o koya oqo dou vakavinakataka na nomudou i tovo kei na nomudou i valavala, ka vakarorogo ki na domo i Jiova na nomudou Kalou; ena qai veivutunitaka ko Jiova na ca sa kaya ena yacovi kemudou. 14Ia koi au, raica, dou sa qai tauri au: dou kitaka vei au me vaka sa vinaka ka dodonu vei kemudou: 15ia mo dou kila dina ga, kevaka dou sa vakamatei au, dou na vakayacora vei kemudou, kei na koro oqo, kei na lewena na dra sa sega ni cala; ni sa dina sa talai au mai vei kemudou ko Jiova me'u tukuna e daligamudou na vosa kecega oqo.
16Era sa qai kaya ko ira na turaga kei na tamata kecega vei ira na bete kei na parofita; Sa sega ni dodonu me mate na tamata oqo: ni sa vosa vei keda ko koya e na yaca i Jiova na noda Kalou. 17Sa qai tu cake eso vei ira na qase ni vanua, ka kaya vei ira kece na tamata era soqoni vata mai, ka vaka, 18Ko Maika na kai Moreseci, sa ia na parofisai e na gauna i Esekaia na tui Juta, ka sa vosa vei ira kece na Juta, ka kaya, Sa vosa vakaoqo ko Jiova ni lewe vuqa; Ko Saioni, ena cukiti me vaka na were; kei Jerusalemi ena yaco me bukebuke walega; kei na ulu-ni-vanua ni vale tabu, ena vaka na veitikina cecere ni veikau. 19Sa ra vakamatei koya li ko Esekaia na tui Juta kei ira na Juta kecega? sa sega ni rerevaki Jiova beka ga ko koya, ka masuti Jiova, ka sa veivutuni mai ko Jiova e na vuku ni ca sa kaya ena caka vei ira? Ia de sa da vakayacora kina vei keda na ca levu.
20Sa dua tale na tamata sa ia na parofisai e na yaca i Jiova, ko Uraija na luve i Semaia na kai Kiriaci-jiarimi, ka sa parofisaitaka na ca me yacova na koro oqo kei na vanua oqo me vaka na vosa kecega i Jeremaia: 21ia ko Jioiakimi na tui, kei ira kece na nona tamata qaqa, kei ira kece na turaga ni ra sa rogoca na nona vosa, sa qai segata ko koya na tui me vakamatea: ia ni sa rogoca ko Uraija, sa rere, ka dro yani ki Ijipita; 22ka sa tala ko Jioiakimi na tui eso na tamata ki Ijipita; io ko Elinecani na luve i Akipori, ka so tale na tamata me ra lako kaya ki Ijipita: 23A ra sa lakovi Uraija ki Ijipita, ka kauti koya mai vei Jioiakimi na tui; ka sa vakamatei koya e nai seleiwau, ka biuta na yagona ki na nodra i bulubulu na tamata wale. 24Ia ko Eaikami na luve i Safani sa totaki Jeremaia, me ra kakua ni soli koya ki na ligadra na tamata me ra vakamatei koya.
Currently Selected:
JEREMAIA 26: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
