JEREMAIA 25
25
Ko Jeremaia, ni sa vunauci ira na Juta ni ra dautalaidredre, sa parofisaitaka na nodra veivakabobulataki ka yabaki vitusagavulu, ena qai cudruvi emuri ko Papiloni, 1-14. Ni sa vakatakarakarataki e na dua na bilo waini, sa vakatakilai na nodra cudruvi na veimatanitu kei na kena turaga, 15-38.
1E nai kava ni yabaki i Jioiakimi na luve i Josaia na tui Juta, e na kenai matai ni yabaki i Nepukanesa na tui Papiloni, sa yaco vei Jeremaia e dua na vosa sa baleti ira kecega na Juta: 2ka sa vosataka ko Jeremaia na parofita vei ira kecega na Juta, vei ira kece talega na kai Jerusalemi, ka vaka,
3Mai nai katinikatolu ni yabaki i Josaia na luve i Emoni na tui Juta, ka yacova na siga oqo, sa kenai karuasagavulu ka tolu ni yabaki, sa yaco tiko vei au na vosa i Jiova, ia ka'u a vosa tikoga vei kemudou, ka sou e na mataka me'u vosa; ia dou a sega ni vakarorogo. 4Ia sa tala vei kemudou ko Jiova na nonai talatala kecega na parofita, ka sou e na mataka me tala; ia dou sa sega ni vakarorogo, se vakatu daligamudou mo dou rogoca. 5Era daukaya, Dou dui lesu yadua edaidai mai na nonai tovo ca, kei na ca ni nonai valavala, ka tiko ga e na vanua sa solia ko Jiova vei kemudou kei ira na nomudou qase me sega ni mudu: 6ia dou kakua ni muria na kalou tani me qaravi ira, ka soro vei ira, dou kakua talega ni vakacudrui au e na cakacaka ni ligamudou; ka'u na qai sega ni vakacacani kemudou. 7Ia dou a sega ni vakarorogo vei au, sa kaya ko Jiova; mo dou sa vakacudrui au kina e na cakacaka ni ligamudou mo dou ca.
8O koya oqo sa kaya kina vakaoqo ko Jiova ni lewe vuqa; Ni dou sa sega ni rogoca na noqu vosa, 9raica, au na talaki ka kauti ira kecega na veimataqali mai na mata ni tokalau, kei Nepukanesa na tui Papiloni na noqu tamata, sa kaya ko Jiova, ia ka'u na kauti ira vakaivalu mai ki na vanua oqo, kei na lewena, kei na veimatanitu kecega oqo sa tiko vakavolivolita, ia ka'u na vakarusai ira sara, ka cakavi ira me ra vakurabuitaki, ka vakasiusiutaki, ka me vanua rusa ka sega ni mudu. 10Ia ka'u na vagalutaka vei ira na domo ni marau, kei na domo ni reki, na domo ni tagane kei na domo ni yalewa sa qai vakawati, na rorogo ni vatu i qaqi, kei na rarama ni cina. 11Ia na vanua taucoko oqo ena lala tu ga, ka vakurabuitaki; ka ra na qaravi tui Papiloni na veimatanitu oqo ka vitusagavulu na yabaki. 12Ia ni sa oti na yabaki e vitusagavulu, ka'u na qai cudruvi tui Papiloni, kei na matanitu ko ya, sa kaya ko Jiova, e na vuku ni nodra caka cala, kei na nodra vanua talega na kai Kalitia, ka vakalalataka ka sega ni mudu, sa kaya ko Jiova. 13Ia ka'u na vakayacora ki na vanua ko ya na noqu vosa kecega ka'u sa cavuta me yaco kina, io, na ka kecega sa volai e nai vola oqo, ka sa parofisaitaka ko Jeremaia me yacova na veimatanitu kecega. 14Ni ra na qali talega ki na veimatanitu e vuqa vei ira talega na turaga levu eso: ia ka'u na sauma vei ira me vaka na nodra i valavala, kei na cakacaka ni ligadra.
15Ni sa kaya vakaoqo vei au ko Jiova na nodra Kalou na Isireli; Mo taura na bilo waini ni cudru waqawaqa oqo mai na ligaqu, ka vagunuvi ira kina na veimatanitu, ka'u sa talai iko kina: 16me ra gunuva, ka yatayata, ka lialia, e na vuku ni seleiwau ka'u na vakayacora vei ira.
17Au a qai taura na bilo mai na liga i Jiova, ka vagunuvi ira kina na veimatanitu, ka talai au kina ko Jiova: 18io, ko Jerusalemi, kei na veikoro e Juta, kei na nodra tui, kei na nodra turaga, me cakava me ra lala tu, me ra vakurabuitaki, ka vakasiusiutaki, ka vosavosacati; me vaka e na siga oqo; 19ko Fero na tui Ijipita, kei ira na nona tamata turaga, kei ira na kena turaga, kei ira kecega na nona tamata; 20kei ira kecega era dui kaikai, kei ira kecega na tui ni vanua ko Usi, kei na tui kecega ni nodra vanua na kai Filisitia, io ko Asikiloni, kei Kesa, kei Ekironi, kei na kedra vo ni Asitoti: 21ko Itomi, kei Moapi, kei ira na luve i Amoni, 22kei ira kecega na tui mai Taia, kei ira kece na tui mai Saitoni, kei ira na tui ni veiyanuyanu mai na tai kadua ni wasawasa, 23ko Titana, kei Tima, kei Pusa, kei ira kece mai na sausau kei vuravura; 24kei ira kece na tui mai Arepea, kei ira kece na nodra tui era dui kaikai era tiko mai veikau, 25kei ira kece na tui mai Simirai, kei ira kece na tui mai Ilama, kei ira kece na nodra tui na Mitia; 26kei ira kece na tui mai na mata ni tokalau, ko ira sa tiko vakayawa, kei ira sa tiko voleka, na tamata kei na kai nona, kei ira kecega na veimatanitu kei vuravura, era sa tiko e na dela ni vanua: ia ko tui Sesaki ena qai gunu emuri.
27O koya oqo mo kaya kina vei ira, Sa kaya ko Jiova ni lewe vuqa na Kalou i Isireli: Dou gunu, mo dou mateni, ka lua, ka bale, ka kakua ni duri tale, e na vuku ni seleiwau ka'u na vakayacora vei kemudou.
28Ia kevaka era bese ni taura na bilo mai na ligamu me ra gunu, mo qai kaya vei ira, Sa vaka ko Jiova ni lewe vuqa; Dou na gunu vakaidina ga. 29Ia raica, na koro oqo sa vakatokai e na yacaqu, ka'u sa qai vakatekivu me'u vakayacora kina na ca, ia koi kemudou, dou na sega li ni cudruvi? Dou na cudruvi ga: ni'u na kaciva nai seleiwau me tauci ira kecega na kai vuravura, sa kaya ko Jiova ni lewe vuqa.
30Ia ko iko mo parofisaitaka na vosa kece oqo vei ira, ka kaya vei ira, Ko Jiova, ena kurukuru maicake, ia mai na nonai tikotiko tabu ena vakarogoya mai na domona; ena kurukuru vakaukauwa ki na nonai tikotiko; na kaila, me vaka na nodra era sa sikaraka na vua ni vaini, ena rogo ga yani vei ira kece era tiko e vuravura. 31Ena yaco yani na ue ki nai yalayala kei vuravura; ni sa dua na ka e veiletitaka ko Jiova, kei ira na veimatanitu, ena ia na veilewai ko koya kei ira na tamata kecega; ena soli ira na tamata ca ki nai seleiwau, sa kaya ko Jiova.
32Sa kaya vakaoqo ko Jiova ni lewe vuqa, Raica, na ca ena lako voli yani mai na matanitu ki na matanitu, ia na cava levu ena vakatuburi mai nai yalayala kei vuravura. 33Ia na vuetaki kei Jiova era na davo tu yani e na siga ko ya mai nai yalayala kei vuravura e dua ki nai yalayala kei vuravura kadua: era na sega ni tagicaki, se kau vata mai, se buluti; era na vaka na de-ni-manumanu e na dela ni vanua. 34Dou qoqolou, nai vakatawa, ka tagi; ka qiqi voli e na dravusa, koi kemudou sa liutaka na qele ni sipi: ni sa yaco sara mai na gauna mo dou vakamatei ka veisei kina; ia dou na lutu ga me vaka na bilo domoni. 35Ia ena sega na sala me ra dro kina nai vakatawa, se me ra bula kina ko ira era liutaka na qele ni sipi. 36A domo ni nodra tagi nai vakatawa, kei na nodra qoqolou era liutaka na qele ni sipi! ni sa vakacacana ko Jiova na nodra vanua veico: 37ka sa vagalutaki nai tikotiko ni sautu e na vuku ni cudru waqawaqa i Jiova: 38sa biuta laivi ko koya, me vaka na laioni, na nonai kotokoto: ni sa rusa na nodra vanua e na vuku ni nona yalokatakata na dauvakacaca, e na vuku talega ni nona cudru waqawaqa.
Currently Selected:
JEREMAIA 25: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
