JEREMAIA 27
27
Sa vakatakila vei ira ni na vakamalumalumutaki na veivanua eso me ra qaravi tui Papiloni, 1-8. Sa vakaroti ira, kei Setekaia talega, me ra vakamalumalumu vua, me ra kakua ni vakadinati ira na parofita vakailasu, 9-18. Sa parofisaitaka ni na kau ga ki Papiloni nai yaya ni vale tabu sa vo tu, ka na toka vakadede kina, 19-22.
1Ni sa qai vakatekivu na lewa i Jioiakimi na luve i Josaia na tui Juta sa qai yaco maivei Jiova na vosa oqo vei Jeremaia, ka vaka,
2Sa kaya vakaoqo vei au ko Jiova; Mo cakava eso na nomu i vesu kei nai vua, ka qai vakataqara ki domomu, 3ka vakauta vei iratou na tui Itomi, kei na tui Moapi, kei na nodra tui na luve i Amoni, kei tui Taia, kei tui Saitoni, e na ligadra na mata eratou sa lako mai ki Jerusalemi vei Setekaia na tui Juta; 4ka vakaroti iratou me ratou kaya vei iratou na nodra turaga, Sa kaya ko Jiova ni lewe vuqa, na Kalou ni Isireli; Dou kaya vakaoqo vei iratou na nomudou turaga: 5Koi au ka'u a buli vuravura, kei na tamata, kei na manumanu e dela ni vanua, e na noqu kaukauwa levu kei na ligaqu e dodo yani, ka sa solia vei ira ka'u vaka e dodonu kina. 6Ia koi au, ka'u sa qai solia edaidai na veivanua kecega oqo ki na liga i Nepukanesa na tui Papiloni, na noqu tamata; ia na manumanu talega ni vanua ka'u sa solia vua me qaravi koya: 7ia na veivanua kecega, ena qaravi koya, kei na luvena, kei na makubuna, ka me yaco dina mada na kena gauna ni nona vanua: io ko koya tale, ena qai qarava ga na veivanua e vuqa kei na tui lelevu eso. 8Ia na vanua kei na matanitu ena bese ni qaravi Nepukanesa na tui Papiloni, ka bese ni vakataqara ki domodra nai vua i tui Papiloni, io na vanua ko ya ka'u na cudruva, sa kaya ko Jiova, e nai seleiwau, kei na viakana, kei na mate dauveiveitauvi, ka me'u vakaoti ira mada e na ligana.
9Ia koi kemudou, dou kakua kina ni rogoci ira na nomudou parofita, se ko ira na nomudou rairai, se ko ira na nomudou dautadra, se ko ira na nomudou daucaka mana lasu, se ko ira na nomudou daucakai sausau, era sa vosa vei kemudou, ka kaya, Dou na sega ni qaravi tui Papiloni: 10ni ra sa parofisaitaka vei kemudou na ka lasu, mo dou veiyawaki kina kei na nomudou vanua; ia me'u vakasevi kemudou tani, mo dou rusa. 11Ia na veimatanitu sa vakataqara ki domodra nai vua i tui Papiloni, me ra qaravi koya, ka'u na laivi ira ga me ra tiko e na nodra vanua, sa kaya ko Jiova; ka ra na wereca, ka tikotiko ga kina.
12Ia ka'u a cavuta vei Setekaia talega na tui Juta na vosa kecega oqo, ka kaya, Dou vakataqara ki na domomudou nai vua i tui Papiloni, ka qaravi koya kei ira na nona tamata, mo dou bula. 13A cava dou sa via mate kina, ko iko, kei ira na nomu tamata, e nai seleiwau, kei na viakana, kei na mate dauveiveitauvi, me vaka na ka sa tukuna ko Jiova ena yaco ki na matanitu sa bese ni qaravi tui Papiloni? 14O koya oqo dou kakua kina ni rogoca na nodra vosa na parofita era vosa vei kemudou, ka kaya, Dou na sega ni qaravi tui Papiloni: ni ra sa parofisaitaka vei kemudou na ka lasu: 15ni'u a sega ni talai ira, sa kaya ko Jiova, ka ra sa parofisaitaka na ka lasu e na yacaqu; me'u vakasevi kemudou tani kina, mo dou rusa, koi kemudou, kei ira na parofita era sa ia na parofisai vei kemudou.
16Ia vei ira na bete talega kei ira kece na tamata oqo ka'u a vosa, ka kaya, Sa kaya vakaoqo ko Jiova; Dou kakua ni vakarorogo ki na nodra vosa na nomudou parofita era ia na parofisai vei kemudou, ka kaya, Raica, nai yaya ni vale i Jiova ena kau vakusarawa tale mai Papiloni: ni sa ka lasu ga era sa parofisaitaka vei kemudou: 17dou kakua ni rogoci ira; dou qaravi tui Papiloni ga, mo dou bula: me lala mei cavai na koro oqo? 18Ia kevaka era sa parofita dina, kevaka sa tiko vei ira na vosa i Jiova, me ra ia mada na veimasulaki vei Jiova ni lewe vuqa, me kakua ga ni kau ki Papiloni nai yaya sa vo tu e na vale i Jiova, kei na vale i tui Juta, kei Jerusalemi.
19Ni sa kaya vakaoqo ko Jiova ni lewe vuqa e na vuku ni duru, kei na taqi levu, kei nai tutu parasa, kei na vo ni yaya sa tiko e na koro oqo, 20o koya ka sega ni kauta tani ko Nepukanesa na tui Papiloni, ni sa kauti Jekonaia na luve i Jioiakimi na tui Juta mai Jerusalemi ki Papiloni, kei ira kece na turaga ni Juta kei Jerusalemi; 21io, sa kaya vakaoqo ko Jiova ni lewe vuqa, na Kalou ni Isireli, e na vuku ni yaya sa vo tiko e na vale i Jiova, kei na vale i tui Juta, kei Jerusalemi: 22Sa na kau ga ki Papiloni, ka na tu ga maikea ka yacova na siga ka'u na talevi ira kina, sa kaya ko Jiova; ka'u na qai kauti ira cake mai, ka vakasuka tale ki na yasana oqo.
Currently Selected:
JEREMAIA 27: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
