IPERIU 7
7
Sa tukuna ko koya ni sa uasivi cake ko Jisu vei ira na bete eliu, 1-28.
1Ia ko Melikiseteki oqo, sa tui Selemi, a bete ni Kalou Cecere sara, sa tavaki Eparaama ni sa tale mai na nona mokuti ira na tui, a sa vosavakalougatataki koya; 2sa solia talega vei koya ko Eparaama nai katini ni ka kecega: (nai balebale ni yacana na Tui ni caka dodonu, a yacana talega emuri na Tui Selemi, a kenai balebale na Tui ni veivakacegui; 3e sega ni tukuni na tamana, se na tinana, se na nona mataqali, sa sega ni vakatekivu na nona gauna, se oti na nona bula; a sa caka me vaka na Luve ni Kalou), a sa tiko ga me bete ka sega ni mudu.
4Dou vakasama na kena uasivi na tamata oqo, ni sa solia vei koya ko Eparaama na turaga qase nai katini ni kamunaga sa tokitaka. 5A sa dina vei ira na luve i Livai, era sa bete, ni sa vakaroti vei ira e na vunau, me ra vakaisigana maivei ira na tamata, io, maivei ira na wekadra, ia sa dina ga ni ra sa lako mai na kawa i Eparaama: 6ia ko koya oqo sa vakaisigana maivei Eparaama, a sa sega ni wili vata kei na nona mataqali, a sa vosavakalougatataki koya ka vosataki kina na yalayala. 7Ia sa sega ni vakatitiqataki rawa oqo, ni sa vosavakalougatataki koya sa uasivi sobu ko koya sa uasivi cake vei rau.
8Ia eke era sa taura nai sigana ko ira na tamata era sa dui mate; ia maikea sa tukuni e dua ni sa bula tiko. 9Io, kevaka e tara me'u vosa vakakina, ko Livai talega, o koya sa dautaura nai sigana, erau sa solia kei Eparaama nai sigana; 10ni sa bera ni sucu ko koya ni sa tavaki Melikiseteki ko tamana.
11Ia kevaka sa rawa me ra vinaka sara e na vuku ni cakacaka ni bete vaka-Livai, (ni sa tukuni vata kaya na vunau vei ira na tamata,) ena yaga vakacava me tubu e dua tale na bete me vaka nai valavala i Melikiseteki, ka me sega ni vakatokai me vaka nai valavala i Eroni? 12Ia ni sa qai vakaisosomitaki na bete, sa dodonu sara me vakaisosomitaki talega na vunau. 13Ia ko koya sa tukuni vakaoqo, sa dua tani na nona yavusa, sa sega maikina e dua na tamata sa qarava nai cabocabo-ni-soro. 14Ni sa macala sara sa tubu maivei ira na Juta na noda Turaga; ia na yavusa ko ya e sega ni vosa kina ko Mosese me ra bete. 15Ia sa macala vakalevu sara; ni sa tubu e dua tani tale na bete me vakataki Melikiseteki, 16o koya ka lesi, ka sega ni vaka na vunau vakavuravura, ko ya ga me vaka na kena mana ni bula tawa mudu. 17Ni sa tukuna ko koya, O iko na bete tawa mudu Me vaka nai valavala i Melikiseteki. 18Sa dina sa mudu na vunau sa liu ni sa malumalumu ka sega ni yaga: 19ni sa sega ni vinaka sara e dua na ka e na vuku ni vunau, ia sa kenai liuliu ni nuinui sa vinaka cake, o koya eda sa toro voleka kina vua na Kalou.
20Ka ni sa ia na bubului e na nona lesi me bete: 21(ni sa buli walega me ra bete ko ira oqori, ia ka segai e na bubului; ia ko koya oqo e na bubului; e na vuku i koya sa kaya vua, Sa bubului ko Jiova, ka na sega ni veivutuni, O iko na bete tawa mudu:) 22sa uasivi cake vakakina na veiyalayalati, o koya sa kenai vakadinadina ko Jisu.
23Ia ko ira oqori era lesi me ra bete, era sa lewe vuqa, ni sa tarova na nodra tiko na mate: 24ia ko koya oqo, sa sega ni vakaisosomitaki na nona cakacaka vakabete, ni sa tiko ga ka tawa mudu. 25O koya oqo sa rawarawa kina vua me vakabulai ira sara era sa lako mai vua na Kalou e na vukuna, ni sa bula tikoga ko koya me masulaki ira.
26Ni sa dodonu me noda e dua na bete sa vakaoqo, sa yalosavasava, sa yalovinaka, sa tawa ca, sa tawase tani maivei ira na tamatai valavala ca, a sa caka me uasivi cake kei lomalagi e na nona cecere: 27o koya e sega kina ni yaga e na veisiga, me vakacabora taumada nai soro ni nonai valavala ca, ia emuri nai soro ni nodra i valavala ca na tamata, me vakataki ira na bete levu: ni sa cakava oqo vakaduaga ko koya, ni sa vakacabori koya. 28Ia sa buli e na vunau na tamata era sa malumalumu me bete levu; ia na Luve ni Kalou sa caka me vinaka sara ka sega ni mudu e na bubului sa tarava na vunau.
Currently Selected:
IPERIU 7: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
