IPERIU 6
6
Sa vakarota vei ira ko koya me ra vuku sara e na lotu, de ra ca tale, 1-8.
1Sa vakavulici ira me ra tu dei, ka gumatua sara, me ra kakua ni yalowai, ni sa vosa dina sara na Kalou ni sa yalataka na ka vinaka, 9-20. O koya oqo me da qai laiva nai vakatekivu ni vakavuvuli kei Karisito me da toro cake me da matua sara; me da kakua ni tauyavutaka tale e na veivutuni e na vuku ni valavala eda mate kina, e na vakabauta talega na Kalou, 2ai vakavuvuli ni veipapitaisotaki, kei na veitabaki liga, kei na nodra tu cake talega, ko ira na mate, kei na lewa ka sega ni mudu. 3Ia na ka oqo eda na cakava, kevaka e vinaka vua na Kalou. 4Ni sa dredre sara me vakavoui tale me ra veivutuni ko ira ka vakararamataki eliu, era a tovolea nai solisoli vakalomalagi, ka rawata na Yalo Tabu, 5ka tovolea na vosa vinaka ni Kalou, kei na kaukauwa ni bula ena muri mai, 6a ra sa qai vuki tale; ni ra sa vakota tiko vakai ira na Gone ni Kalou ki na kauveilatai, ka beci koya e na matanavotu.
7Ni sa vakalougatataka na Kalou na qele sa gunuva na uca sa lako wasoma kina, sa vakatubura na kau sa yaga vei ira era sa kelia: 8ia sa sega ni vakabau ka sa vo e lailai me biu sara oqori sa vakatubura na kau votovotoa kei na soni; ia na kenai otioti me visa.
9Ia koi kemudou ga, sa lomani, e dina ga keitou sa vosa vakaoqo, ia keitou sa nanumi kemudou ni dou sa vinaka cake, ka ni na tu vei kemudou na ka sa lako vata kei na bula. 10Ni sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana ni dou a qaravi ira era sa lotu, ia dou sa qarava tikoga.
11Ia keitou sa vinakata mo dou dui gugumatua vakakina, mo dou vakanuinui matua sara kina ka me yacova nai vakataotioti: 12mo dou kakua ni vucesa, mo dou muri ira ga era sa qai taukei ni veika ka yalataki ni ra a vakabauta ka vosota vakadede.
13Ia ni sa yalayala vei Eparaama na Kalou, ka ni sa sega ni cavuta rawa e dua sa uasivi cake, sa qai cavuti koya ga e na nona bubului, 14ka kaya, E dina ka'u na vakalougatataki iko vakalevu, ka vakalewevuqataki iko vakalevu sara. 15Sa vaka ga kina, ni sa vosota vakadede mada ko koya, sa qai yaco mei taukei ni ka ka yalataki. 16Ia ni sa bubului ko ira na tamata, era sa daucavuta na ka sa levu cake: a sa oti vei ira na veileti e na bubului mei vakadinadina. 17Sa vakakina na Kalou, ni sa vinakata ko koya me vakatakila dina sara kivei ira era na taukena na ka ka yalataki ni sa tu dei na nona lewa, sa vakadinadinataka e na bubului: 18me rua kina na ka sa tu dei sara, sa sega ni rawa kina me vosa lasu na Kalou, me da vakacegui sara kina, koi keda eda sa laki vakaruru ni da sa taura nai nuinui sa viritu e matada: 19ko ya sa tu vei keda mei kelekele ni yaloda, ni sa dina ka kaukauwa, ia ka sa curu sara ki loma ni lati: 20a tikina ko ya sa curu kina e na vukuda ko Jisu, me nodai liuliu, ni sa qisi me bete levu ka tawa mudu me vaka nai valavala i Melikiseteki.
Currently Selected:
IPERIU 6: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
