IPERIU 8
8
Sa tukuna ko koya sa yaco ko Jisu me noda Bete Levu, a sa oti na kenai vakatakarakara sa kitaka eliu ko ira na Jiu, a sa uasivi cake sara na cakacaka i Karisito, 1-13.
1Ia sa kena levu ni veika sa vosataki oti: Sa vakaoqo na noda bete levu, sa tiko e na liga i matau ni tikotiko i Koya sa levu mai lomalagi; 2ai talatala e na tikina tabu, kei na vale tabu dina, sa sega ni tara na tamata, sa tara ga na Turaga.
3Ni ra sa lesi kecega na bete levu me vakacabora nai madrali kei nai soro: o koya oqo sa dodonu talega kina vei koya na bete levu oqo me dua na ka me vakacabora. 4Ia kevaka sa tiko ga e vuravura ko koya, ena sega ni bete, ni ra tiko na bete era vakacabora nai madrali me vaka na vunau: 5o ira sa kitaka nai vakatakarakara kei na yaloyalo ni veika vakalomalagi, me vaka sa vakatakila vei Mosese na Kalou ni sa voleka ni tara na vale tabu: ka kaya, Raica, mo cakava na ka kecega me tautauvata kei na kenai vakatakarakara ka vakatakilai vei iko e na ulu-ni-vanua. 6Sa qai nona na cakacaka vakabete e uasivi cake, me vaka sa dautataro talega ko koya e na dua na veiyalayalati e uasivi cake, o koya sa vakataudeitaka e na vosa ni yalayala e uasivi cake.
7Kevaka sa vinaka oqori sa taumada, e sega tale ni vakasaqarai e dua tani. 8Ia ni sa sega ni vinakata, sa kaya ko koya, Sa vosa ko Jiova, ena yaco na siga, Ka'u na cakava kina na veiyalayalati vou vei ira na mataqali nei Isireli kei na mataqali nei Juta: 9Ena sega ni vaka na veiyalayalati ka'u a cakava vei ira na nodra qase E na siga ka'u a taura kina na ligadra me tuberi ira mai na vanua ko Ijipita; Ni ra sa sega ni tu dei e na noqu veiyalayalati, A sa kaya kina ko Jiova, ka'u a sega ni maroroi ira. 10A sa kaya ko Jiova, Sa vakaoqo na veiyalayalati ka'u na cakava vei ira na mataqali nei Isireli ni sa oti na gauna ko ya; Au na tugana na noqu vunau ki na lomadra, Ka vola e na yalodra: Ia ka'u na yaco me nodra Kalou, Ia era na yaco me noqu tamata: 11Ia era na sega ni vakavulici ira yadua me nona lewe-ni-koro Kei na wekana, ka kaya, Mo kila na Turaga: Ni ra na kilai au kecega, ko ira sa tamata lalai kei ira talega sa turaga. 12Ni'u na yalovinaka vei ira sa sega ni dodonu, Ia ka'u na sega ni nanuma tale na nodra i valavala ca kei na nodra talaidredre.
13Ni sa cavuta ko koya e dua sa vou, sa vakamadrataka oqori ka taumada. Ia na ka sa qai madra mai ka makawa sa voleka ni takali sara.
Currently Selected:
IPERIU 8: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
