KALATIA 5
5
Sa vakarota vei ira ko koya me ra tu dei e na lalaga sa yaco vei ira e na vuku i Jisu; me ra dauloloma, 115. Sa qai kaya me ra muria na Yalo Tabu, 1618. Sa qai tukuna na cakacaka ni tovo vakayago, 1921, kei na vua ni Yalo Tabu, 2226.
1O koya mo dou qai tu dei e na lalaga sa vakalalagataki keda kina na Karisito, ka mo dou kakua ni vakataotaki tale e nai vua mo dou bobula kina.
2Raica, oi au ko Paula au sa kaya vei kemudou, Kevaka dou sa ia tiko na veicilivi, ena vakatawayagataki kina vei kemudou na Karisito. 3Niu sa vakadinadina tale vei ira na tamata yadua sa cilivi, ni ra sa vauci tu me muria na vunau taucoko. 4Dou sa tawase tu maivei Karisito, oi kemudou kecega sa vaka mo dou vakadonui e na vunau; dou sa qai bale mai na loloma. 5Sa vakabauta eda sa waraka ka vakanuinui kina, e na veivuke ni Yalo Tabu, me da vakadonui. 6Ni da sa tu vata kei Karisito Jisu, sa sega ni yaga me cili, se me sega ni cili; sa yaga ga na vakabauta sa daucakacaka yaco e na loloma. 7Dou a cici vinaka eliu; o cei beka sa tarovi kemudou mo dou kakua ni talairawarawa kina ki nai vakavuvuli dina? 8A vakadinata oqo sa sega ni vu maivei koya sa kacivi kemudou. 9E dua na tiki ni leveni lailai sa vakalevenitaka nai buli taucoko. 10Au sa vakararavi ga vei kemudou e na vuku ni Turaga, ni dou na sega ni lomavakatani; ia ko koya ga sa vakayavalati kemudou, ena rawata na kenai sau, io ko koya yadua. 11Ia koi au, na veiwekani, kevaka kau sa vunautaka tiko na veicili, a cava kau sa vakacacani tiko kina? sa qai mudu na veivakatarabetaki e na vuku ni kauveilatai. 12Au sa vinakata me ra muduki ira tani ko ira era sa vakayavalati kemudou.
13Ni dou sa kacivi, na veiwekani, mo dou lalaga; ia dou kakua ni ia na lalaga me tubu kina na ka vakayago, ka dou ia tikoga na veivuke ni veilomani vakai kemudou. 14Ni sa caka sara na vunau taucoko e na vosa e dua bau, oqo ga: Mo lomana na kai nomu me vakataki iko. 15Ia kevaka dou sa veikata ka veikani vakai kemudou, dou raica vinaka de dou veivakarusai vakai kemudou.
16Ia kau sa kaya, Dou lako voli e na Yalo Tabu, ka dou na sega ni cakava kina na gagadre ca ni tovo vakayago. 17Ni sa veivala na gagadre ni tovo vakayago kei na Yalo Tabu, a sa veivala na Yalo Tabu kei nai tovo vakayago: ia sa veimecaki koi rau oqo; dou sa sega kina ni cakava na veika dou sa vinakata. 18Ia kevaka sa tuberi kemudou na Yalo Tabu, dou na sega ni lewai e na vunau.
19Ia sa votu na cakacaka ni tovo vakayago, ka sa vakaoqo: A dauveibutakoci, na daudara, nai valavala tawa-savasava, na daugarogaro, 20na dausoro ki na veimatakau, na daucakaisausau, na dauveicati, na dauveileti, na veiqati, na daucudrucudru, na dauveiba, na veisei vakavuravura, na veisei ni lotu, 21na dauvuvu, na daumateni, na daumarau vakalialia, kei na veika sa vakakina: a veika oqo au sa tukuna vei kemudou, me vaka kau a tukuna makawa talega ni na sega ni rawata na matanitu ni Kalou ko ira era sa kitaka na veika vakaoqo.
22Ia na vua ni Yalo Tabu na loloma, na reki, na vakacegu, na vosota vakadede, na yalomalua, na yalololoma, na vakabauta, 23na yalomalumalumu, nai valavala malua: sa sega na vunau sa cudruvi kina na veika oqo.
24Ia ko ira era nei Karisito era sa vakota ki na kauveilatai nai tovo vakayago kei na kena dodomo ca kei na kena gagadre ca. 25Kevaka eda sa bula e na Yalo Tabu, tou lako voli talega e na Yalo Tabu. 26Me da kakua ni gadreva me da dokai walega, se veicudruvi, se veivuvutaki.
Currently Selected:
KALATIA 5: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
