KALATIA 4
4
Sa vauci keda eliu na vunau i Mosese; ia ni sa lako mai na Karisito, eda sa qai sereki mai na vunau, 111. Sa nanuma ko Paula na nodra loloma vei koya eliu: kei na nona loloma vei ira, 1220. Sa qai tukuna ni ra kawa vakayalo i Eparaama, 2131.
1Ia kau sa kaya, Ni sa gone tiko nai taukei emuri, sa tauvata kei na tamata walega, ia ka sa nona ga na ka kecega; 2a sa lewai koya ko ira nai vakavuvuli kei ira na qase, me yaco mada na gauna ka lokuca eliu ko tamana. 3Sa vakakina koi keda eliu, ni da a gone tiko, sa lewai keda na veivu ni ka sa vakavuravura me vaka eda bobula: 4ia ni sa yaco dina sara na kena gauna, sa qai tala yani na Luvena na Kalou, o koya sa sucu mai na yalewa, sa sucu me lewai koya na vunau, 5me voli ira kina sa lewai ira na vunau, me da vakabauti kina me da luvena bau. 6Ia ni dou sa qai luvena, sa tala na Kalou na Yalo ni Luvena ki na lomada, o koya sa daukaci, Apa, Tama i keimami. 7O koya oqo ko sa qai sega kina ni tamata walega, a luvena ga; ia kevaka ko sa luvena, ko sa qai taukei e na vuku ni Kalou.
8Ia eliu, ni dou a sega ni kila na Kalou, dou a dauqaravi ira sa sega ni nodra i tovo me kalou. 9Ia edaidai, ni dou sa qai kila na Kalou, se dina ga ni sa qai kilai kemudou na Kalou, dou sa qai lesu tale vakacava ki na veivu ni ka, sa malumalumu ka ka wale, ka dou sa vinakata mo dou qarava tale? 10Dou sa vakatabuya na siga eso, kei na vula eso, kei na gauna eso, kei na yabaki eso. 11Au sa yalolailai e na vukumudou, de sega ni yaga na noqu cakacaka vei kemudou.
12Oi kemudou na veiwekani, au sa masuti kemudou, mo dou vakataki au; niu sa vakataki kemudou: dou sa sega ni vakacacani au vakalailai. 13Ia dou sa kila, niu a vunautaka vei kemudou eliu nai tukutuku-vinaka, sa malumalumu na yagoqu. 14Ia e na vuku ni ka ni yagoqu sa vakatovolei kemudou, dou sa sega ni beci au se vakasisilataka; ia dou a vakacegui au me vaka kau sa agilose ni Kalou, me vakataki Karisito Jisu. 15Sa qai tu evei na nomudou marau eliu? niu sa vakadinadina vei kemudou, kevaka sa rawarawa, dou a leuta tani na matamudou, mo dou solia mai vei au. 16Au sa qai yaco beka meu nomudou meca, niu sa vosa dina vei kemudou?
17Era sa gumatua ni lomani kemudou, e segai e nai valavala vinaka, io era sa via tawasei kemudou tani, mo dou gumatua ni lomani ira. 18Ia sa ka vinaka na gumatua tikoga e na cakacaka vinaka, me kakua ni ia walega niu sa tiko vata kei kemudou. 19Na luvequ lalai, oi kemudou kau sa taratara tale kina, me buli mada na Karisito e na lomamudou! 20Ia kau sa via tiko vei kemudou edaidai ka me dua tani na domoqu; niu sa nuinuica e na vukumudou.
21Dou tukuna mai vei au, kemudou sa via vauci e na vunau, dou sa sega beka ni rogoca na vunau? 22Ni sa volai, sa lewe rua na luve i Eparaama ka tagane, a tinana e dua na vada, a tinana kadua na marama: 23ia ko koya sa luve ni vada, sa sucu vakatamata; ia ko koya sa luve ni marama, sa sucu e na vosa ni yalayala. 24Ia na ka oqo sa vakaibalebale: ni sa veiyalayalati e rua koi rau na yalewa oqo; e dua mai na ulu-ni-vanua ko Saineai, o koya sa vakasucu gone me ra bobula, oqori ko Eka. 25Ia ko Eka oqo na ulu-ni-vanua ko Saineai mai Arepea, a sa tautauvata kei Jerusalemi ka tu edaidai, a sa bobula tiko kei ira na luvena. 26Ia ko Jerusalemi maicake sai taukei, o koya na tinada kecega. 27Ni sa volai, Mo reki, ko iko na yava sa sega ni vakaluveni; Mo tabalaka na kaci, o iko sa sega ni taratara: Ni sa qai lewe vuqa na luvena ko koya ka biu, ka lewe lailai vua sa vakawati. 28Ia koi keda, na veiwekani, eda sa vakataki Aisake, ni da sa gone ni vosa ni yalayala. 29Ia na ka sa caka eliu sa caka talega edaidai, sa vakacacani koya sa vakayalo ko koya sa sucu vakatamata. 30Ia ka cava sa kaya nai Vola Tabu! Vakaseva tani na vada kei na luvena; ni rau na sega ni taukei vata na luve ni vada kei na luve ni marama.
31Sa vakaoqo, kemudou na veiwekani, eda sa sega ni luve ni vada, eda sa luve ni marama.
Currently Selected:
KALATIA 4: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
