CAKACAKA 4

Erau sa biu ko Pita kei Joni ki na vale ni veivesu, 1—4. E na mataka erau sa lewai, a sa tukuni Jisu ko Pita, 5—22. Era sa masu na lewe ni lotu kecega, a ra sa vakasinaiti e na Yalo Tabu, a sa bibi na vunau; a ra sa veilomani sara na tamata lotu, 23—37.

1Ia ni rau sa vosa tiko vei ira na tamata, sa lako mai vei rau ko ira na bete, kei na turaga ni vale ni soro, kei ira nai tokani i Setoki, 2ni ra sa cudru ni rau sa vakavulici ira na tamata, ka vunautaka na tu cake tale mai na mate e na vuku i Jisu. 3A ra sa tauri rau, ka biuta ki na vale ni veivesu me mataka mada; ni sa qai yakavi. 4Ia ka lewe vuqa era sa rogoca na vunau, era sa vakabauta; ia na kedrai wiliwili na tagane sa le lima beka na udolu.

5Ia ni sa mataka, era sa soqoni vata mai Jerusalemi ko ira na nodra turaga, kei ira na qase, kei ira na vunivola, 6kei Anasa na bete levu, kei Kaiafa, kei Joni, kei Alekisada, kei ira kecega na mataqali ni bete levu. 7Ia ni ra sa vakaturi rau e na kedra maliwa, era sa taroga, A kaukauwa cava, se na yaca i cei, drau sa cakava kina na ka oqo? 8Sa qai sinai ko Pita e na Yalo Tabu, a sa kaya vei ira, Oi kemuni na nodra turaga na tamata, kei na nodra qase na Isireli, 9kevaka keirau sa tarogi e na siga edaidai e na cakacaka vinaka vua na tamata lokiloki, se cava sa qai bula kina; 10mo ni kila kecega, kei ira kecega na Isireli, ni sa yaca i Jisu Karisito na kai Nasareci, ko koya kemuni a vakota ki na kauveilatai, ko koya sa vakatura cake tale na Kalou mai na mate, io, e na vukuna ga sa tu kina eke ko koya oqo e na matamuni ka sa bula vinaka. 11O koya na vatu kemuni a cata sara koi kemuni na matai ni vale, ko ya sa yaco me kenai vakadei ni yavu e na tutu ni vale. 12A sa sega na bula e na vukuna e dua tani: ni sa sega sara e dua tale na yaca e ruku i lomalagi sa soli kivei ira na tamata, me da bula rawa kina.

13Ia ni ra sa raica na nodrau doudou ko Pita kei Joni, ni ra sa kila talega erau sa sega so ni vuku, se tamata vuli, era sa kurabui kina; a ra sa qai vakasami rau, ni ratou a dautiko vata kei Jisu. 14Ia ni ra sa raica na tamata ka vakabulai, ni sa wavu tu vata kei rau, era sa sega ni vakatitiqataka rawa. 15Ia ni ra sa vakatalai rau me rau lako tani e na vale ni veibose, era sa qai bose vakai ira, 16ka kaya, A cava me da kitaka vei rau na tamata oqo? ni ra sa kila ko ira kecega sa tiko e Jerusalemi, ni sa dua na cakacaka-mana rogo erau sa cakava; ia eda sa sega ni vakatitiqataka rawa. 17Ia de tukuni vakalevu vei ira na tamata, me da kaya ga, me rau cudruvi sara kevaka erau vakavuvuli tale vua e dua na tamata e na yaca oqo. 18A ra sa kacivi rau, ka vakarota vei rau me rau kakua sara ni vosa se vakatavuvuli e na yaca i Jisu.

19Sa qai vosa ko Pita kei Joni, a rau sa kaya vei ira, Mo ni lewa ga se sa dodonu se segai e na mata ni Kalou me keirau vakarorogo vei kemuni ka kua vua na Kalou: 20ni sa dredre vei keirau me keirau kua ni tukuna na veika keirau a raica ka rogoca. 21Ia ni ra sa sega ni kunea e dua na ka me rau cudruvi kina, era sa vosavakacudrucudruya tale vei rau, a ra sa qai sereki rau me rau lako, e na vukudra na tamata ni ra sa vakarokorokotaka na Kalou ko ira kecega e na vuku ni ka sa qai caka. 22Ni sa vasagavulu ka mani vakacaca na nona yabaki, ko koya na tamata sa caka vua na cakacaka-mana oqo ka bula kina.

23Ia ni rau sa sereki, erau sa lako vei ira na nodraui tokani, ka tukuna na ka kecega era a vosataka vei rau ko ira na bete levu kei ira na qase. 24Ia ni ra sa rogoca, era sa lomavata ka tabalaka cake na domodra vua na Kalou, ka kaya, Kemuni na Turaga, koi kemuni na Kalou, ko ni a buli lomalagi, kei vuravura, kei na waitui, kei na ka kecega sa tu kina: 25e na gusu i Tevita na nomuni tamata ko ni a kaya, Sa daucudru na veimatanitu e na vuku ni cava, Ka sa vakananuma na ka wale ko ira na lewe ni veivanua? 26Era sa tuvai valu na tui kei vuravura, A ra sa soqoni vata ko ira na turaga Me ra veivala kei Jiova, kei na nona Karisito. 27Ni sa dina era sa soqoni vata e na koro oqo me ra veivala kaya na Luvemuni yalosavasava ko Jisu, ko koya ko ni a lumuta, koi rau ko Eroti kei Ponitio Pailato, kei ira na veimatanitu, kei ira na Isireli, 28me ra kitaka kecega na ka ko ni a lesia eliu me caka, me vaka na nomuni kaukauwa kei na nomuni naki. 29Ia oqo, Kemuni na Turaga, mo ni raica na nodra vosa vakacudrucudruya, ka solia kivei ira na nomuni talatala, me ra doudou vakalevu ni ra tukuna na nomuni vosa, 30ni kemuni sa dodoka tiko na ligamuni me ia na veivakabulai, me caka talega nai vakatakilakila eso kei na ka e veivakurabuitaki, e na yaca ni Luvemuni yalosavasava ko Jisu.

31Ia ni ra sa masu oti, sa vakayavalati na vale era sa soqoni vata kina: a ra sa dui vakasinaiti kecega e na Yalo Tabu, a ra sa doudou kina ni ra sa tukuna na vosa ni Kalou.

32Ia ko ira na lewe vuqa era sa vakabauta, era sa lomavata ka yalovata; a sa sega e dua e kaya me nona duaduaga na ka sa tu vua; a ra sa taukena vata na nonai yau yadua. 33A sa levu na nodra kaukauwa nai apositolo, ni ra sa tukuna sa tu cake tale mai na mate na Turaga ko Jisu: a sa vinakati vakalevu ko ira kecega. 34Ni sa sega e dua vei ira sa dravudravua; ko ira kecega sa taukena na vanua se na veivale, era sa volitaka, a ra sa kauta nai voli ni ka era sa volitaka, 35a ra sa tauca ki na yavadra nai apositolo: a sa votai vei ira kecega me vaka na nodra dui dravudravua.

36Ko Josese talega, ko koya era sa vakatoka ko ira nai apositolo me Panapasa, (a kenai balebale, A gone ni vakacegu,) a luve i Livai, a kai Kipiro, 37ko koya sa taukena e dua na tiki ni vanua, sa volitaka, ka kauta na kenai voli, ka tauca ki na yavadra nai apositolo.

Currently Selected:

CAKACAKA 4: FOV

Highlight

Copy