CAKACAKA 5

Sa mate ko Ananaiasa kei Safaira e na vuku ni rau sa vosa lasu, 1—11. Sa kitaka na cakacaka-mana e vuqa ko ira nai apositolo, a sa lewe vuqa na tamata sa lotu, 12—16. Sa biuti iratou ki na vale ni veivesu ko ira na bete levu; a sa vakabulai iratou na agilose ni Kalou, 17—25. Eratou sa qai lewai tale, 26—42.

1A sa dua na tamata ko Ananaiasa na yacana, kei Safaira na watina, sa volitaka e dua na vanua, 2a sa vunia eso na kenai voli, e bau kila talega na watina, a sa kauta eso, ka tauca ki na yavadra nai apositolo. 3A sa kaya ko Pita, Ananaiasa, e vakaevei ni sa vakasinaita na yalomu ko Setani mo lasu kina vua na Yalo Tabu, mo vunia eso nai voli ni vanua? 4Ni sa tu ga eliu, sa sega li ni nomu ga? ia ni sa volitaki oti, ko sa sega li ni veitalia ga kina? e vakaevei ni ko sa vakananuma kina na ka oqo e na lomamu? ko sa sega ni lasu kivei ira na tamata, ko sa lasu ga vua na Kalou. 5Ia ni sa rogoca na vosa oqo ko Ananaiasa, sa bale sobu, ka ciba: a ra sa rere vakalevu kina ko ira kecega sa rogoca na ka oqo. 6A sa tu cake ko iratou na cauravou, ka solegi koya, ka colata ki tautuba, ka buluta.

7Ia ni sa oti e tolu beka na aua, sa qai curu mai na watina, a sa sega ni kila na ka sa caka. 8A sa kaya vua ko Pita, Tukuna mai vei au se drau sa volitaka na vanua e nai lavo vaka ko ya, se segai? A sa kaya ko koya, Io, e vaka ga ko ya. 9Sa qai kaya vua ko Pita, E vakaevei ni drau sa lomavata mo drau vakatovolea vakaca na Yalo ni Turaga? raica, sa tu e katuba na yavadratou eratou sa buluta na watimu, eratou na colati iko talega ki tautuba. 10Sa qai bale sobu sara ki yavana ko koya, ka ciba: a ratou sa curu mai na cauravou, ka kunea ni sa ciba ko koya, a ratou sa colata yani, ka buluta vata kei na watina. 11A ra sa rere vakalevu kina ko ira kece nai soqosoqo lewe ni lotu, kei ira vakaaduaga era sa rogoca na veika oqo.

12A sa caka nai vakatakilakila kei na ka e veivakurabuitaki e vuqa e na ligadra nai apositolo vei ira na tamata; a ra sa tiko lomavata kecega e na varada nei Solomoni: 13a sa sega e dua vei ira sa vo sa doudou me to vata kei ira; a sa vakarokorokotaki ira ko ira na tamata: 14a sa vakaikuritaki vakalevu vua na Turaga na tamata eso era vakabauta, era lewe vuqa na tagane kei na yalewa talega; 15a ra sa kauti ira kina era sa tauvi-mate ki na veigaunisala, a ra sa vakadavora e nai mocemoce lelevu kei nai mocemoce lailai, me vakaruruga eso vei ira na yaloyalo i Pita ni sa lako yani kina. 16Era lewe vuqa talega sa lako mai na veikoro sa vakavolivoliti Jerusalemi, a ra sa kauta mai na tamata eso sa tauvi-mate, kei ira sa vakararawataki ira na yalo velavela eso: a ra sa vakabulai vakaaduaga.

17Sa qai tu cake na bete levu, kei ira kecega era sa dautiko vata kaya, (ko ira nai tokani i Setoki,) a ra sa sinai e na cudru, 18a ra sa tauri iratou nai apositolo, ka biuti iratou ki na vale ni veivesu. 19Ia ni sa qai bogi sa dolava na katuba ni vale ni veivesu e dua na agilose ni Turaga, ka kauti iratou maikina, ka kaya, 20Dou lako, ka laki tu e na vale ni soro, ka tukuna vei ira na tamata na vosa kecega ni Bula oqo. 21Ia ni ratou sa rogoca, eratou sa curu ki na vale ni soro, ni sa kida na mataka, ka vakatavuvuli. A sa lako mai na bete levu, kei ira era sa dautiko vata kaya, a ra sa vakasoqoni ira vata na mataveilewai, kei ira kecega na nodra qase na luve i Isireli, a ra sa tala eso ki na vale ni veivesu me kauti iratou mai. 22A ratou sa tadu na ovisa, a ratou sa sega ni kunei iratou e na vale ni veivesu; a ratou sa lesu tale, ka tukuna, 23ka kaya, Keitou sa kunea dina ni sa sogo vakaukauwa tu na vale ni veivesu, a ra sa tu talega nai vakatawa e na mata ni katuba etautuba; ia ni keitou sa dolava, e sega e dua keitou sa kunea eloma.

24Ia ni ra sa rogoca na veika oqo na turaga ni vale ni soro kei ira talega na bete turaga, era sa kidroa kina se na tubu beka me vakaevei na ka oqo. 25Sa qai lako mai e dua, ka tukuna vei ira, Raica, ko iratou na tamata dou a biuta ki na vale ni veivesu eratou sa tu e na vale ni soro, ka vakavulici ira na tamata.

26Sa qai lako na turaga kei iratou na ovisa, ka kauti iratou mai, ia eratou sa sega ni cakava vakaukauwa: ni ratou sa rerevaki ira na tamata, de ra vakaviriki iratou e na vatu. 27Ia ni ratou sa kauti iratou mai, eratou sa vakatura e na matadra na mataveilewai: a sa tarogi iratou na bete levu, 28ka kaya, Keitou a sega beka ni vakarota matua vei kemudou, mo dou kakua ni vakatavuvuli e na yaca oqo, oi? ka raica, dou sa vakasinaiti Jerusalemi e na nomudoui vakavuvuli, dou sa nakita talega me keitou tarogi e na dra ni tamata oqo.

29Sa qai vosa ko Pita kei iratou nai apositolo, ka kaya, Sa kilikili kei keitou me keitou talairawarawa vua na Kalou, me kakua ga vei ira na tamata. 30A nodra Kalou na noda qase sa vakaturi Jisu cake tale mai, ko koya dou a vakamatea ni dou a vakarubeca e na dua na kau. 31Ko koya sa vakaceceretaka na Kalou e na ligana i matau me Turaga kai Vakabula, me solia kina na veivutuni kivei ira na Isireli, kei na vakabokoci ni valavala ca. 32Keitou sa yaco talega me dauvakadinadina e na veika oqo; ka sa vaka kina na Yalo Tabu, ko koya sa solia na Kalou vei ira sa talairawarawa vua.

33Ia ni ra sa rogoca, era sa cudru vakalevu, a ra sa bose me ra vakamatei iratou. 34Sa qai tu cake e dua e na kedra maliwa na mataveilewai, a Farisi, ko Kamelieli na yacana, a vu-ni-vunau, sa rogorogo vinaka vei ira na tamata kecega, a sa kaya me kau vakalailai ga ki tuba ko iratou nai apositolo; 35ka sa qai kaya vei ira, Oi kemudou na tamata na Isireli, dou lewai kemudou vinaka e na vuku ni ka dou sa nanuma mo dou kitaka vei iratou na tamata oqo. 36Ni sa tubu cake eliu ko Cuta, a sa dautukuni koya me ka levu, a ra sa laki to vata kaya na tamata eso, era sa wili vata era sa lewe va beka na drau; a sa qai vakamatei ko koya oqo; kei ira kecega, era sa talairawarawa vua, era sa vakasesei, ka oti yani. 37Sa oti oqo sa qai tubu cake ko Jutasa na kai Kalili e na gauna sa volai kina na tamata, a ra sa lewe vuqa sa kauta vakatani ko koya me ra muri koya: sa rusa talega ko koya oqo: kei ira vakaaduaga era sa talairawarawa vua, era sa vakasesei. 38Ia oqo, au sa kaya vei kemudou, Dou kakua soti ni kitaki iratou na tamata oqo, dou laivi iratou ga: ia kevaka e ka mai na tamata nai naki oqo se na cakacaka oqo, ena vakarusai ga: 39ia kevaka e ka mai vua na Kalou, dou sa sega ni vakarusa rawa; de dou na kunei beka ni dou sa veivala kei na Kalou.

40A ra sa qai yalovata kaya: ia ni ra sa kacivi iratou nai apositolo, ka vakanakuitataka, era sa vakarota matua vei iratou me ratou kakua sara ni vosa e na yaca i Jisu, a ra sa qai sereki iratou me ratou lako. 41Ia ni ratou sa lako tani e matadra na mataveilewai, eratou sa reki ni ratou sa yaga me ratou vakacacani e na vuku ni yacana. 42Ia e na veisiga kecega e na vale ni soro, kei na veivale kecega, era sa sega ni mudu ni vakatavuvuli ka vunautaki Jisu ni sai koya na Karisito.

Currently Selected:

CAKACAKA 5: FOV

Highlight

Copy