CAKACAKA 6

Era sa vinakata sara nai apositolo me ra gumatua e na vunau, a sa dredre kevaka era sa vakaogai e na veivotai yau vei ira na dravudravua, 1—4. A ra sa qai lesia na tamata eso me ratou vota nai yau, sa dua vei iratou ko Sitiveni, 5—7. Era sa cati Sitiveni ko ira eso, ka beitaka vakailasu vei ira na bete, 8—15.

1Ia e na gauna ko ya, ni sa lewe vuqa era sa lotu, era sa didi ko ira na vulagi ni veimatanitu tani vei ira na Iperiu, ni sa sega ni nanumi ko ira na nodra yada e na veivota ni yau e na veisiga. 2Sa qai vakasoqoni ira vata na lewe vuqa sa lotu ko ira na le tinikarua, ka kaya, Sa sega ni dodonu me keitou biuta na vosa ni Kalou, ka qarava na tepeli. 3O koya, koi kemudou na veiwekani, mo dou qai qara vei kemudou e lewe vitu na tamata sa rogorogo vinaka, eratou sinai e na Yalo Tabu kei na vuku, me keitou lesi iratou ki na cakacaka oqo. 4Ia koi keitou, keitou na gumatua sara e na masu, kei na vunautaka na vosa.

5A sa vinaka vei ira kecega na lewe vuqa na vosa oqo: a ra sa digitaki Sitiveni, e dua na tamata sa sinai e na vakabauta kei na Yalo Tabu, kei Filipi, kei Pirokoro, kei Nikanori, kei Taimoni, kei Parimina, kei Nikola, a tamata lotu vaka-Jiu mai Anitioki: 6a ra sa vakaturi iratou e na matadra nai apositolo: ia ni ra sa masu oti, era sa tabaki iratou e na ligadra. 7A sa gumatua na vosa ni Kalou; a sa vakalevutaki sara na kedrai wiliwili era sa lotu mai Jerusalemi; a sa lewe vuqa talega na bete era sa talairawarawa ki na vakabauta.

8A sa sinai e na vakabauta kei na kaukauwa ko Sitiveni, a sa kitaka eso na ka e veivakurabuitaki kei na cakacaka-mana levu e na kedra maliwa na tamata. 9Ia sa tu cake eso mai na nodra vale ni lotu, a yacadra Ko ira na Sereki, kei na kai Kirini eso, kei na kai Alekisadria eso, kei ira eso mai Silisia, kei Esia, a ra sa veileti kei Sitiveni, 10A ra sa sega ni qarava rawa na nona vuku kei na Yalo sa vosa kina ko koya. 11A ra sa qai kauta lo mai na tamata eso, era sa kaya, Keitou sa rogoci koya oqo ni sa vosavakacacataki Mosese kei na Kalou. 12A ra sa vakauqeti ira na tamata, kei ira na qase, kei ira na vunivola, a ra sa lako vakaukauwa vua, ka taura, a ra sa kauta vei ira na mataveilewai, 13a ra sa kacivi ira na dauveibeitaki vakailasu, ka ratou sa kaya, Sa sega ni mudu na tamata oqo ni sa vosavakacacataka na tikina tabu oqo, kei na vunau. 14Ni keitou a rogoca ni sa kaya, Ena vakarusa na tikina oqo ko Jisu oqo na kai Nasareci, ka na vukica sara nai valavala sa solia vei keda ko Mosese. 15Ia ko ira kecega sa tiko e na vale ni veilewai, ni ra sa vakaraica matua, era sa raica na matana ni sa tautauvata kei na mata ni agilose.

Currently Selected:

CAKACAKA 6: FOV

Highlight

Copy