CAKACAKA 3

Erau sa vakabula e dua sa lokiloki ko Pita kei Joni, 1—11. Sa tukuna ko Pita ni sa bula ko koya e na vuku i Jisu, ko koya era a vakamatea, 12—18. Sa qai vakavulici ira me ra veivutuni, 19—26.

1Ia erau sa lako vata ko Pita kei Joni ki na vale ni soro e na aua sa dauia kina na masumasu, e na kenai kaciwa. 2A sa dua na tamata sa lokiloki mai na kete i tinana sa colati voli, ko koya era sa vakadavora e na veisiga e na mata ni katuba ni vale ni soro, sa vakatokai ko Lagilagi, me kere ka-ni-loloma vei ira sa curu ki na vale ni soro; 3ko koya, ni sa raici Pita kei Joni ni rau sa voleka ni curu ki na vale ni soro, sa kerekere me dua na ka-ni-loloma. 4A rau sa vakaraica matua ko Pita kei Joni, ka kaya, Raici keirau mai. 5A sa vakasami rau ko koya, ni sa nanuma ena rawata maivei rau e dua na ka. 6Sa qai kaya ko Pita, A siliva kei na koula e sega ni tu vei au; ia na ka ga sa tu vei au ka’u na solia vei iko: E na yaca i Jisu Karisito na kai Nasareci mo tu cake ka lako. 7Sa qai taura na ligana i matau, a sa tubera cake: sa qai vakaukauwataki sara na yavana kei na nona qurulasawa. 8Sa qai rika cake ko koya ka wavu tu, ka lako voli, a sa curu vata kei rau ki na vale ni soro, a sa lako, ka rika, ka vakarokorokotaka na Kalou. 9A sa raici koya ko ira na tamata kecega, ni sa lako voli ka vakarokorokotaka na Kalou: 10a ra sa kila ni sai koya ka dautiko e na mata ni katuba ko Lagilagi, mai na vale ni soro, me kere ka-ni-loloma: a ra sa rere ka kurabui sara e na vuku ni ka sa qai yaco vua.

11Ia ni sa tauri Pita kei Joni na tamata lokiloki sa qai vakabulai, era sa cici vata ko ira kecega na tamata kivei iratou ki na varada sa vakatokai Na nei Solomoni, a ra sa kurabui vakalevu.

12Ia ni sa raica ko Pita, sa kaya vei ira na tamata, Oi kemudou na tamata na Isireli, dou sa kurabui e na ka oqo e na vuku ni cava? se cava dou sa vakaraici keirau matua kina, me vaka sa neirau kaukauwa se yalododonu, keirau sa kitaki koya kina oqo me lako rawa? 13A Kalou i Eparaama, kei Aisake, kei Jekope, a nodra Kalou na noda qase, sa vakarokorokotaka na Luvena ko Jisu: ko koya dou a solia yani, ka cakitaka e na mata i Pailato, ni sa lewa ko koya me sereka. 14Ia dou a cakitaki koya na Yalosavasava ka Dodonu, ka masuta me soli vei kemudou e dua na daulaba: 15ka dou a vakamatea na Vu-ni-bula, ko koya sa vakatura cake tale mai na mate na Kalou; ia keitou sai vakadinadina e na ka oqo. 16Ia na yacana, e na vuku ni sa vakabauti na yacana, sa vakaukauwataki kina ko koya oqo, ko koya dou sa raica ka kila: io, ni sa vakabauti koya, sa soli vua na bula vinaka sara oqo e na matamudou vakaaduaga.

17Ia oqo, koi kemudou na veiwekani, au sa kila ni dou a cakava ni dou sa sega ni kila, me vakataki ira talega na nomudou turaga. 18Ia na veika oqori sa vakatakila eliu na Kalou, e na gusudra kecega na nona parofita, ni na mate na nona Karisito, sa qai vakayacora vakakina ko koya.

19O koya mo dou qai veivutuni ka saumaki mai, me bokoci kina na nomudoui valavala ca, me yaco kina na gauna ni vakacegu mai na mata ni Turaga; 20ka talai Karisito ko koya, io ko Jisu ka vunautaki eliu vei kemudou: 21ko koya e dodonu me tiko mada ga mai lomalagi, me yaco mada na gauna ena caka tale me vinaka kina na ka kecega, ka vosa kina na Kalou e na gusudra kece na nona parofita yalosavasava, e na gauna makawa.

22Ni sa dina sa kaya ko Mosese, Ena vakatubura cake vei kemudou ko Jiova na nomudou Kalou, maivei ira na wekamudou, e dua na parofita me vakataki au; ko koya dou na rogoca e na ka vakaaduaga ena vosataka vei kemudou: 23ia ena yaco, a tamata yadua sa na sega ni rogoca na parofita ko ya, ena vakarusai tani maivei ira na tamata. 24Ia ko ira talega na parofita kecega, sa kenai vakatekivu ko Samuela kei ira talega sa tarava, ko ira kecega era sa vosa, era sa tukuna eliu na gauna oqo. 25Oi kemudou sa luvedra na parofita, kei na vosa ni veiyalayalati ka cakava na Kalou vei ira na noda qase, ni sa kaya vei Eparaama, Ena kalougata na veimataqali kecega e vuravura e na vuku ni nomu kawa. 26Sa tala na Luvena ko Jisu na Kalou, ka liu vei kemudou, ni sa vakatura cake, me vakalougatataki kemudou, ni sa saumaki kemudou yadua mai na nomudoui valavala ca.

Currently Selected:

CAKACAKA 3: FOV

Highlight

Copy