1 TUI 18

Sa talai ko Ilaija me tukuna na uca, 1-6; a sa kauti koya ko Opetaia vei Eapi, 7-15. Sa moku ko ira na parofita i Peali, 17-40. Sa soli na uca e na masu i Ilaija, 41-46.

1Sa bogi vuqa, sa qai yaco mai na vosa i Jiova vei Ilaija e na kenai katolu ni yabaki, ka kaya, Mo lako, mo rairai mada vei Eapi; ia ka'u na vakatauca tale na uca ki vuravura. 2A sa lako ko Ilaija, me rairai vei Eapi. A sa ka levu na dausiga mai Samaria. 3A sa kacivi Opetaia ko Eapi, o koya ka lewa na lewe ni vale: (ia sa rerevaki Jiova vakalevu ko Opetaia; 4ka sa yaco eliu ni sa vakamatei ira tiko na parofita i Jiova ko Jesepeli, sa kauta e le dua na drau na parofita ko Opetaia, ka vunitaki ira vakayayalimasagavulu e na qara vatu, ka vakani ira e na madrai kei na wai.) 5A sa kaya vei Opetaia ko Eapi, Mo lako voli e na vanua, ki na mata ni wai vure kecega, kei na uciwai kecega; de daru na kunea na co me vakabula na ose kei na meule, me kakua ni mate kece na noda manumanu. 6A rau sa wasea rua na vanua, me rau dui lako voli kina: sa lako vakataki koya e na dua na sala ko Eapi, a sa lako vakataki koya e na dua na sala tani ko Opetaia.

7Ia ni sa lako tu e na sala ko Opetaia, raica, sa tavaki koya ko Ilaija; a sa kilai koya, a sa cuva vakatoboicu, ka kaya, O iko beka na noqu turaga ko Ilaija? 8A sa kaya vua, Koi au ga: ia mo la'ki kaya vua na nomu turaga, Raica, sa tiko ko Ilaija. 9Sa qai kaya ko koya, A cava na noqu cala, ko sa via solia kina na nomu tamata ki na liga i Eapi, me vakamatei au? 10Me vaka sa bula ko Jiova na nomu Kalou, sa sega e dua na vanua se matanitu sa sega ni talaki kina na noqu turaga me vakasaqarai iko: ia ni ra sa kaya, Sa yali; sa qai vakabubuluitaki ira ko koya na matanitu kei na vanua ko ya, ni ra sa sega ni kunei iko. 11Ia ko sa kaya oqo, Mo la'ki kaya vua na nomu turaga, Raica, sa tiko ko Ilaija. 12Ia ni'u sa lako tani vei iko, ena kauti iko tani na yalo i Jiova, ia ka'u na sega ni kila se ko sa kau kivei; ia ni'u sa lako ka tukuna vei Eapi, ka sega ni kunei iko ko koya, ena qai vakamatei au: ia koi au na nomu tamata, au sa rerevaki Jiova ni'u sa cauravou, ka yacova na gauna oqo. 13Sa sega beka ni tukuni vei iko na noqu turaga na ka ka'u a kitaka ni sa vakamatei ira na parofita i Jiova ko Jesepeli, ni'u a vunia e le dua na drau na tamata vei ira na parofita i Jiova, ka vakayayalimasagavulu e na qara vatu, ka vakani ira e na madrai kei na wai? 14Ia ko sa kaya oqo, Mo la'ki kaya vua na nomu turaga, Raica, sa tiko ko Ilaija; ia ena qai vakamatei au ko koya. 15Sa qai kaya ko Ilaija, Me vaka sa bula ko Jiova ni lewe vuqa, o koya ka'u sa tu e matana, au na vakaraitaki au vakaidina vua edaidai.

16A sa la'ki tavaki Eapi ko Opetaia, a sa tukuna vua: a sa la'ki tavaki Ilaija ko Eapi. 17Ia ni sa raici Ilaija ko Eapi, sa kaya vua ko Eapi, ko iko beka ko koya ka vakararawataki ira na Isireli? 18A sa kaya ko koya, Au sa sega ni vakararawataki ira na Isireli; koi kemuni ga, kei na mataqali i tamamuni, ni kemuni sa biuta na vunau i Jiova, ka sa muri ira na Peali. 19Ia oqo, mo ni talaki, mo ni vakasoqoni ira kecega na Isireli vei au, ki na ulu-ni-vanua ko Kameli, kei ira na parofita i Peali era sa lewe va na drau ka limasagavulu, kei ira na parofita ni kalouyalewa ni veikau era sa lewe va na drau, era sa kana tiko mai na tepeli i Jesepeli. 20A sa talaki ko Eapi vei ira kecega na Isireli, ka vakasoqoni ira vata na parofita ki na ulu-ni-vanua ko Kameli.

21A sa toro voleka vei ira kecega na tamata ko Ilaija, ka kaya, E bogi vica mada kemuni na lomalomarua tiko kina? kevaka sa Kalou ko Jiova, mo ni muri koya: ia kevaka ko Peali, mo ni muri koya. A ra sa sega ni kaya vua e dua na vosa ko ira na tamata. 22A sa kaya vei ira na tamata ko Ilaija, Oi au duaduaga, ka'u sa vo tiko na parofita i Jiova; ia na parofita i Peali, era sa le va na drau ka limasagavulu. 23Ia me ra solia vei keda e rua na pulumokau; me ra qai digitaka vei ira e dua na pulumokau, ka me talaka mada, ka vakotora e na dela ni buka, ia me kakua ni viri kina na bukawaqa: ia ka'u na vakarautaka na pulumokau kadua, ka vakotora e na dela ni buka, ia ka'u na sega talega ni viria kina e dua na bukawaqa; 24ia mo ni masu ki na yaca ni nomuni kalou, ia ka'u na masu ki na yaca i Jiova; ia na kalou sa vosa mai e na bukawaqa, me Kalou ga ko koya. A ra sa vosa kecega na tamata, ka kaya, Sa vinaka na vosa.

25A sa kaya ko Ilaija vei ira na parofita i Peali, mo ni digitaka e dua na nomuni pulumokau, vakarautaka mada eliu; ni kemuni sa lewe vuqa; ni qai masu ki na yaca ni nomuni kalou, ia kakua ni viria kina e dua na bukawaqa. 26A ra sa kauta na pulumokau sa soli vei ira, a ra sa vakarautaka, a ra sa qai masu ki na yaca i Peali e na mataka, ka sigalevutaka, a ra sa kaya, I Peali, mo rogoci keimami mai. A sa sega na domo e rorogo, se dua e vosa mai. A ra sa ladeva nai cabocabo-ni-soro sa caka. 27Ia ni sa siga levu, sa qai vakalialiai ira ko Ilaija, ka kaya, Dou kaci vakadomoilevu: ni sa kalou ko koya: sa vakanananu tiko, se sa tiko tani, se sa lako tu ki na dua na vanua; se sa moce beka, ka sa yaga me vakayadrati. 28A ra sa kaci vakadomoilevu, ka tavalaki ira e nai seleiwau kei nai sele, me vaka na nodra i valavala, a sa dave mai na nodra dra. 29Ia ni sa oti na siga levu, era sa parofisai tiko ka yacova na gauna sa dauvakacabori kina nai soro; a sa sega na domo e rorogo, se dua e vosa mai, se dua e rogoca.

30A sa kaya vei ira kecega na tamata ko Ilaija, Ni toro mai vei au. A ra sa toro vua ko ira na tamata kecega: a sa vakavinakataka ko koya nai cabocabo-ni-soro i Jiova, ka sa talaraki sobu. 31A sa kauta ko Ilaija na vatu e tinikarua, me vaka nai wiliwili ni nodra veimataqali na luve i Jekope, o koya ka yaco vua na vosa i Jiova, ka kaya, Ena vakatokai na yacamu ko Isireli; 32a sa cakava ko koya e na veivatu ko ya nai cabocabo-ni-soro e na yaca i Jiova: a sa kelia e dua na keli me volita nai cabocabo-ni-soro, ka me rauta e rua nai vakarau ni sila. 33A sa virikotora na buka, ka tamusumusuka na pulumokau, ka vakotora e dela ni buka, 34ka kaya, Ni vakasinaita e va na saqa e na wai, ka sova ki nai soro kama, kei na buka. A sa kaya, Ni vakaruataka: a ra sa vakaruataka: A sa kaya ko koya, Ni vakatolutaka: a ra sa vakatolutaka. 35A sa dave vakavolivolita nai cabocabo-ni-soro na wai; a sa vakasinaiti talega na keli e na wai.

36Ia e na gauna sa dauvakacabori kina nai soro ni yakavi, sa toro kina ko Ilaija na parofita, ka kaya, Kemuni Jiova na Kalou i Eparaama, kei Aisake, kei Isireli, me kilai mada edaidai ni kemuni sa Kalou e Isireli, ka ni'u sa nomuni tamata talega koi au, ka sa nomuni vosa ka'u sa cakava kina na ka kecega oqo: 37mo ni rogoci au, I Jiova, mo ni rogoci au; me ra kila na tamata oqo ni ko sa Kalou koi kemuni, Jiova, ka ni kemuni sa saumaka tale na yalodra. 38Sa qai lutu sobu mai na bukawaqa i Jiova, ka kania nai soro kama, kei na buka, kei na vatu, kei na kuvu-ni-qele, ka dramica na wai e na keli.

39Ia ni ra sa raica ko ira na tamata kecega, era sa cuva vakatoboicu; a ra sa kaya, Sa Kalou ga ko Jiova; Sa Kalou ga ko Jiova. 40A sa kaya vei ira ko Ilaija, Ni tauri ira mada na parofita i Peali, me kakua ni dro bula e dua vei ira. A ra sa tauri ira; a sa kauti ira sobu ko Ilaija ki na uciwai ko Kisoni, ka vakamatei ira maikea.

41A sa kaya vei Eapi ko Ilaija, Mo lako cake; mo kana ka gunu; ni sa kere mai e dua na uca levu. 42A sa lako cake ko Eapi me kana ka gunu: a sa lako cake ki na dela i Kameli ko Ilaija; a sa cuva ki na qele, ka vakacuva na matana ki na macawa ni duruna. 43A sa kaya vua na nona cauravou, Mo lako cake mada, mo rai vaka ki na wasawasa. A sa lako cake ko koya, ka rai voli, a sa kaya, Sa sega na ka e kune, A sa kaya ko koya, Mo lako tale ka vakavitu. 44Ia e na kenai kavitu, sa kaya ko koya, Raica, sa lako cake mai na wasawasa e dua na o lailai, sa vaka na liga ni tamata. A sa kaya ko koya, Mo lako cake, mo kaya vei Eapi, Mo ni vakarautaka na nomuni qiqi vakaturaga, ka lako sobu, de tarovi kemuni na uca. 45A sa loaloa mai na lomalagi, e na veiyasana kecega, e na o kei na cagi, a sa tau na uca levu. A sa vodo ko Eapi, ka lako ki Jesirieli. 46A sa tiko kei Ilaija na liga i Jiova; a sa vauca ko koya na tolona, ka cici ka liutaki Eapi ki nai bili mai Jesirieli.

Currently Selected:

1 TUI 18: FOV

Highlight

Copy