1 TUI 19

Sa dro ko Ilaija, 1-8. Sa rairai vua mai Orepi ko Jiova, 9-18. Sa kacivi ko Ilaisa, 19-21.

1A sa tukuna vei Jesepeli ko Eapi na ka kecega ka cakava ko Ilaija, ka ni sa vakamatei ira kecega na parofita e nai seleiwau. 2A sa tala ko Jesepeli e dua na tamata kivei Ilaija, ka kaya, Me cakacaka vakakina vei au ko ira na kalou, ka vakaikuritaka, kevaka ka'u sa sega ni vakatautauvatataki iko kei na dua vei ira, e na gau-ni-siga vakaoqo e na mataka. 3Ia ni sa rogoca ko koya, sa cavu tu, ka dro yani me bula, ka yaco ki Pieri-sepa, ka nei Juta, ka laiva maikea na nona cauravou.

4A sa lako tu ko koya ka bogi dua e loma ni veikau, ia ni sa yaco kina sa la'ki tiko sobu e na dua na ruku ni junipa: a sa masu me mate yani ko koya; ka kaya, I Jiova sa rui levu; ni vakaotia ga na noqu bula; ni'u sa sega ni vinaka cake vei ira na noqu qase. 5Ia ni sa davo koto ka moce e na dua na ruku ni junipa; raica, sa qai tarai koya e dua na agilose, ka kaya vua, Mo duri cake; mo kana. 6A sa rai voli ko koya, ka raica, sa voleka ki na uluna e dua na keki sa tavu oti e na qilaiso, ka dua na saqa wai. A sa kana ko koya ka gunu, ka koto sobu tale. 7A sa baci lako vakarua mai na agilose i Jiova, ka tarai koya, ka kaya, Mo duri cake; mo kana; ni sa rui balavu vei iko na sala. 8A sa duri cake ko koya, ka kana ka gunu, ka lako e na kaukauwa ni kakana ko ya ka siga vasagavulu ka bogi vasagavulu, ki Orepi na ulu-ni-vanua ni Kalou.

9A sa la'ki curuma e dua na qara vatu maikea, ka moce kina; ka raica, sa vosa vua ko Jiova, ka kaya vua, A cava ko sa tiko kina eke, Ilaija? 10A sa kaya ko koya, Au a yalokatakata vakalevu e na vuku i Jiova na Kalou ni lewe vuqa: ni ra sa biuta na veiyalayalati kei kemuni ko ira na Isireli; era sa talaraka sobu na nomuni cabocabo-ni-soro, ka vakamatei ira na nomuni parofita e nai seleiwau; ia koi au, ka'u sa vo duaduaga; a ra sa segata tiko me ra vakamatei au. 11A sa kaya ko koya, Mo curu yani, ka la'ki tu e na dela ni ulu-ni-vanua e na mata i Jiova. Ka raica, sa lako voli ko Jiova, a sa dua na cagi levu ka kaukauwa sa sea na veiulu-ni-vanua, a sa vorolaka na veiuluvatu e na mata i Jiova; ia sa segai e na cagi ko Jiova: ni sa oti na cagi, sa qai tavuki na vanua; ia sa segai e na tavuki ni vanua ko Jiova; 12sa oti na tavuki ni vanua, sa qai dua na bukawaqa; ka sa segai e na bukawaqa ko Jiova; ia sa oti na bukawaqa, sa qai rogo mai e dua na domo lailai e vinaka: 13ia ni sa rogoca ko Ilaija, sa puloutaka na matana e nonai tutuvi, ka curu yani, ka la'ki tu e na mata ni qara vatu: ka raica, sa rogo vua e dua na vosa, ka vaka, A cava ko sa tiko kina eke, Ilaija? 14A sa kaya ko koya, Au a yalokatakata vakalevu e na vuku i Jiova na Kalou ni lewe vuqa: ni ra sa biuta na veiyalayalati kei kemuni ko ira na Isireli; era sa talaraka sobu na nomuni cabocabo-ni-soro, ka vakamatei ira na nomuni parofita e nai seleiwau; ia koi au, ka'u sa vo duaduaga; a ra sa segata tiko me ra vakamatei au. 15A sa kaya vua ko Jiova, Mo lako; mo lesu tale e na nomu lako e loma ni veikau ki Tamasiko: ia ni ko sa yaco kina, mo lumuti Eseeli me tui Siria: 16ka lumuti Jeu na luve i Nimesai me tui Isireli: ka lumuti Ilaisa na luve i Safati, na kai Epelimeola, me parofita me kemui sosomi. 17Ia ko koya sa dro bula mai nai seleiwau i Eseeli, ena vakamatea ko Jeu: kei koya sa dro bula mai nai seleiwau i Jeu, ena vakamatea ko Ilaisa. 18Ia ka'u sa maroroya me noqu e le vitu na udolu vei ira na Isireli, ko ira kecega sa sega ni tekiduru vei Peali, kei na gusudra kecega sa sega ni reguci koya.

19A sa lako tani maikea ko koya, a sa kunei Ilaisa na luve i Safati, sa taura tiko nai sivi yara, era sa yarataka tiko e ruasagavulu ka va na pulumokau, era noka vata vakayayarua, ka sa lako vata ko koya kei rau na kenai murimuri: a sa lako yani vei koya ko Ilaija, ka biuta vua na nonai tutuvi. 20A sa biuta tu na pulumokau ko koya, ka cicimuri Ilaija, a sa kaya, Me'u reguca mada na tamaqu kei na tinaqu, ka'u na qai muri iko. A sa kaya vua ko koya, Mo lesu tale yani: a cava ka'u sa kitaka vei iko? 21A sa lesu yani ko koya, ka kauta e rua na pulumokau, ka vakamatea, a sa vakasaqa na lewedrau e nai yaya ni pulumokau, ka solia vei ira na tamata, a ra sa kana. Sa qai cavu tu, ka la'ki muri Ilaija, ka qaravi koya.

Currently Selected:

1 TUI 19: FOV

Highlight

Copy