ማቶሳ 23

ሙሴ ሂጊያ ታማሪሲያዋንቱኔ ፓሪሳዋቱዋ ኢታቴ

(ማር 12፡38-39፤ ሉቅ 11፡43-46፤ 20፡45-46)

1ሄዋፔ ጉዪያን፥ ዬሱሲ ሺቄዳ ኣሳዉኔ ባሬና ካሊያዋንቶ ሃዋዳን ያጊዴ ሃሳዬዳ፤ 2«ሂጊያ ታማሪሲያዋንቱኔ ፓሪሳዋቱ ሙሴ ሂጊያ ታማሪሲያ ማታና ዴዒኖ። 3ሄዋ ዲራው፥ ሂንቴንቱ ኦና ማላ፥ ኡንቱንቱ ሂንቴንታ ኣዛዚያ ኡባባ ኦቴኔ ቃሲ ናጊቴ፤ ሺን ኡንቱንቱ ኦያዋዳን ኦፒቴ፤ ኣያው ጎፔ፥ ኡንቱንቱ ባሬንቱ ኦዲያዋ ኦኪኖ። 4ቶካናው ዴፂያ ቶኩዋ ኡንቱንቱ ቃቺዴ፥ ኣሳ ቶሲኖ፤ ሺን ባሬንቱ ሁጲያን ሃራይ ኣቶ፥ ሄ ቶኩዋ ቢራያን ቦቻናዉካ ኮዪኪኖ።

5«ሺን ኡንቱንቱ ባሬንቱ ኦሱዋ ኡባ ኣሳይ ቤዓናዳን ኦኖ፤ ኣያው ጎፔ፥ ባሬንቱ ሶምዒያኒኔ ባሬንቱ ኩሺያ ቄሲያን ቃቺያ ፂቂሲያና ዴዒያ ኪታፋ ኣሲኖኔ ባሬንቱ ማዩዋ ማጫራካ ኣዱሲኖ። #ማት 6፡1፤ ፓይ 15፡37-41፤ ዛር 6፡8 6ኣሳይ ባሬንታ ሾቢዴ ኣፎሳን ቦንቾ ኡቱዋ ዶሲኖ፤ ቃሲ ኣዪሁዳ ዎሳ ጎሌቱዋኒካ ዳሮ ሎዒያ ኦይዲያ ዶሲኖ። 7ኣሳይ ጌዋን ባሬንታ ቦንቺዴ ሳሮታና ማላኔ ‹ታማሪሲያዎ› ጊዴ ባሬንታ ፄሳናዳን ኮዪኖ።

8«ሺን ሂንቴንታ ታማሪሲያዌ ኢቱዋ ፃላላ ጊዴዳ ዲራዉኔ ሂንቴንቱ ኡባይ ኢሻቱዋ ጊዴዳ ዲራው፥ ኢቱ ኢቱዋ፥ ‹ታማሪሲያዎ› ጊዴ ፄሶፒቴ። 9ሃ ሳዓን ኦናኔ ‹ኣዉዋ› ጊዴ ፄሶፒቴ፤ ኣያው ጎፔ፥ ሂንቴንቶ ሳሉዋን ዴዒያ ኢቲ ኣዉ ዴዔ። 10ኢቱ ኢቱዋ፥ ‹ታማሪሲያዎ› ጊዴካ ፄሶፒቴ፤ ኣያው ጎፔ፥ ሂንቴንቶ ኢቲ ጎዳይ፥ ኪሪስቶሳ ፃላላይ ዴዔ። 11ሂንቴንቱ ጊዶን ኡባፔ ዳሪያዌ ሂንቴንቶ ቆማ ጊዳናው ቤሴ። 12ባሬና ዳሪሲያዌ ኦኒኔ ቶሼታና፤ ቃሲ ባሬና ቶቺያዌ ኦኒኔ ቁ ጋና።

ሂጊያ ታማሪሲያዋንቱኔ ፓሪሳዋቱ ቦሬቴዲኖ

(ማር 12፡40፤ ሉቅ 11፡39-42፣ 44፣ 52፤ 20፡47)

13«ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ፥ ኣሳው ሳሉዋ ካዉቴ ሂንቴንቱ ጎርዲያ ዲራው፥ ሂንቴንቶ ኣዬሮ፤ ኣያው ጎፔ፥ ሂንቴንቱ ሁጴዉኔ ጌሊኪታ፤ ቃሲ ጌላናው ኮዪያዋንታካ ጌሊሲኪታ።

14«ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ ኣምዔቱዋ ጎሊያ ሂንቴንቱ ቦንቂዴ፥ ሂንቴንቶ ሎዓ ማላታናው ፆሳ ዎሳ ኣዱሲታ፤ ሄዋ ዲራው፥ ሂንቴንቶ ኣዬሮ፤ ኡባፔ ኣያ ፒርዳ ሂንቴንቱ ኣካና።

15«ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ ሂንቴንቱ ኢቲ ኡራ ኣማንናው ኣባኒኔ ሳዓን ዩዪያ ዲራዉኔ ቃሲ ሂንቴንቱ ኣ ኣማንያ ዎዴ፥ ሄ ኡራ ሂንቴንቱዋፔ ላዑ ኩሺያ ኢቴዳ ጋናሜው ናዓ ኦያ ዲራው፥ ሂንቴንቶ ኣዬሮ።

16« ‹ኦኒኔ ጌሻ ጎሊያን ጫቆፔ፥ ኣይኔ ባዋ፤ ሺን ጌሻ ጎሊያን ዴዒያ ዎርቃን ጫቆፔ፥ ሄ ጫቁ ኣ ጋኬ› ጊያ ሂንቴንቶ ቆቂ ኡቲዴ ኣሳ ካሌያዋንቶ፥ ሂንቴንቶ ኣዬሮ። 17ሃ ኤያቱ፥ ሃ ቆቃቱ፥ ዎርቃይ ኣዬ? ዎርቃ ጌሻ ኦያ ጌሻ ጎሊ ኣ? 18ቃሲ ሂንቴንቱ፥ ‹ኦኒኔ ያርሹዋ ያርሺያባን ጫቆፔ፥ ኣይኔካ ባዋ፤ ሺን ኦኒኔ ኣ ቦላ ዴዒያ ያርሹዋን ጫቆፔ፥ ሄ ጫቁ ኣ ጋኬ› ያጊዴ ታማሪሲታ። 19ሃ ኤያቱ፥ ሃ ቆቃቱ፥ ያርሹ ኣዬ? ዎይ ያርሹዋ ጌሻ ኦያ ኣ ያርሺያባይ ኣ? 20ሄዋ ዲራው፥ ያርሹዋ ያርሺያባን ጫቂያ ኡራይ ሄ ያርሺያዋኒካ ጫቄ፤ ቃሲ ኣ ቦላ ዴዒያ ኡባባንካ ጫቄ። 21ጌሻ ጎሊያን ጫቂያ ኡራይ፥ ሄ ጌሻ ጎሊያኒኔ ኣ ጊዶን ዴዒያ ፆሳን ጫቄ። 22ሳሉዋን ጫቂያ ኡራይ፥ ፆሳ ካዉቴ ኦይዲያኒኔ ሄ ኦይዲያን ኡቲያዋን ጫቄ። #ኢሳ 66፡1፤ ማት 5፡34

23«ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ፥ ሂንቴንቶ ኣዬሮ። ኣዪሲ ጎፔ፥ ካሬ ኣኑጋፔ፥ ሺላሪያፔኔ ኦካሺያፔ ኣሲራታ ሂንቴንቱ ኢሚታ፤ ሺን ሂጊያን ዴዒያ ዳሪ ኮሺያዋንታ ኣጊታ፤ ሄዋንቱ ፒርዳ፥ ማሮቴኔ ፂሎቴ። ሃራንታካ ኣጌናን፥ ሂንቴንቱ ኦናው ቤሲያ ዬዋቱ ሃዋንታ። 24ሂንቴንቶ ቆቂ ኡቲዴ፥ ኣሳ ካሌያዋንቶ፥ ሂንቴንቱ ኡሻፔ ኡዱንፂያ ጋጪዴ፥ ጋሉዋ ሚቲታ።

25«ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ፥ ሂንቴንቶ ኣዬሮ። ኣዪሲ ጎፔ፥ ሂንቴንቱ ሻታኔ ኬሪያ ቦላ ባጋ ጌሺታ፤ ሺን ኣ ጊዱዋን ቦንቂያኒኔ ኡዜቴን ኩንዲታ። 26ሃ ቆቃ ፓሪሳዌው፥ ሻታኔ ኬሪያ ጋርሳ ካሴታዴ ጌሻ ዲጋ፤ ሄዋፔ ጉዪያን፥ ቦላ ባጋይካ ጌሻ ጊዳናዋ።

27«ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ፥ ሂንቴንቶ ኣዬሮ። ኣዪሲ ጎፔ፥ ካሬ ባጋና ቦሺንቻን ኦኬቲዴ፥ ሎዒ ኡቲዴ፥ ቃሲ ጋርሳ ባጋና ሃይቄዳ ኣሳ ሜቄይኔ ዎቄዳባይ ኡባባይ ኩሜዳ ዱፎቱዋ ማላቲታ። 28ሄዋዳንካ፥ ቃሲ ቦላ ባጋና ኣሳ ኡባው ፂሉዋ ማላቲታ፤ ሺን ሂንቴንቶ ጋርሳ ባጋና ሎዓ ማላቲያ ኢታቴይኔ ማካላይ ኩሚ ኡቴዳ።

29«ሎዓ ማላቲያ ኢታቶ፥ ሂጊያ ታማሪሲያዋንቶኔ ፓሪሳዋቶ፥ ሂንቴንቶ ኣዬሮ። ኣዪሲ ጎፔ፥ ናባቱዋ ዱፉዋ ቦላ ጎሊያ ኬፂታ፤ ቃሲ ፂላቱዋ ዱፉዋካ ሎይታ። 30ቃሲ ሂንቴንቱ፥ ‹ኑኒ ቤኒ ኑ ኣዎቱዋ ዎዴ ዴዔዳዋንታ ጊዲንቶ፥ ኡንቱንቱና ኢቲፔ ናባቱዋ ዎኮ ሺን› ያጊታ። 31ሄዋ ጊዶፔ፥ ናባቱዋ ዎዳዋንቱ ናና ሂንቴንቱ ጊዴዳዋ ሂንቴንቱ ሁጲያን ማርካቲታ። 32ሲሚ ሂንቴንቱ ኣዎቱ ዶሜዳዋ ፖሊኪቴ!

33«ሃ ሾሻቶ፥ ሾሻ ናናው፥ ጋናሚያ ፒርዳፔ ዋኒዴ ኣታኒቴ? 34ሄዋ ዲራው፥ ቤይቴ፥ ታኒ ናባቱዋ ኣ ኤራንቻቱዋኔ ሂጊያ ታማሪሲያዋንታ ሂንቴኮ ኪታና። ኡንቱንቱፔ ኢቱዋ ኢቱዋ ሂንቴንቱ ዎናኔ ማስቃሊያ ቦላ ሚሲማሪያን ሺዴ ካቃኒታ፤ ቃሲ ኢቱዋ ኢቱዋ ሂንቴንቱ ዎሳ ጎሌቱን ሊሱዋን ሾጫኒታኔ ካታማፔ ካታማ ዬዴርሳኒታ። 35ሄዋ ዲራው፥ ፂሉዋ ኣቤላ ዎዴፔ ዶሚዴ፥ ጌሻ ጎሊያፔኔ ያርሺያሳፔ ጊዱዋን ሂንቴንቱ ዎዳ ባራኪያ ናዓ ዛካራሳ ዎዲያ ጋካናው፥ ሃይቄዳ ፂላቱዋ ኡባቱዋ ሱ ዲራው፥ ሂንቴንቱ ሙሬታኒታ። #ዶም 4፡8፤ 2ኦድ 24፡20-21 36ታኒ ሂንቴንቶ ቱሙዋ ኦዳይ፤ ሃ ኡባባይ ሃ ዎዲያ ኣሳ ቦላ ጋካናዋ።

ዬሩሳላሜሲ ኦዴቴዳ ሚኖ ኦዱዋ

(ሉቅ 13፡34-35)

37«ዬሩሳላሜ ካታማ ኣሳው፥ ዬሩሳላሜ ካታማ ኣሳው፥ ናባቱዋ ሂንቴንቱ ዎታ፤ ፆሳይ ሂንቴንቱኮ ኪቴዳዋንታካ ሹቻን ጫዲታ፤ ኩታታ ባሬ ማራቱዋ ባሬ ቄፊያን ሃጲያዋዳን፥ ታኒ ሂንቴንቱ ኣሳ ኢቲሳ ሺሻናው ኣፑ ካላ ኮያዲታ! ሺን ታና ዲጌዲታ። 38ቤዒቴ፥ ሂንቴንቱ ጎሊ ኡባካ ኦና ጊዳናዋ። #ኤርም 22፡5 39ኣዪሲ ጎፔ፥ ታኒ ሂንቴንቶ ኦዳይ፤ ሂንቴንቱ፥ ‹ጎዳ ሱንን ዪያዌ ኣንጄቴዳዋ ጋና ጋካናው፥ ላዔንዋ ታና ቤዒኪታ› ጋይ» ያጌዳ። #ማዝ 118፡26

Currently Selected:

ማቶሳ 23: dwrENT

Highlight

Copy