ማቶሳ 24

ዬሱሲ ጌሻ ጎሊ ኮሌታናዋ ካሴቲዴ ኦዴዳ

(ማር 13፡1-2፤ ሉቅ 21፡5-6)

1ዬሱሲ ጌሻ ጎሊያፔ ኬሲዴ ቢያ ዎዴ፥ ጌሻ ጎሊያ ዲርሳ ጊዶን ዴዒያ ጎሊያ ቤሳናው ኣ ካሊያዋንቱ ኣኮ ዬዲኖ። 2ዬሱሲ ዛሪዴ ኡንቱንታ፥ «ሄዋ ኡባ ቤዒቴ? ታኒ ሂንቴንቶ ቱሙዋ ኦዳይ፤ ሃ ጎሌቱዋን ዴዒያ ኢቲ ሹቻይኔ ኣቴናን ኡባይ ኮሌታና» ያጌዳ።

ዎዲያ ዉርሴባ

(ማር 13፡3-13፤ ሉቅ 21፡7-19)

3ዬሱሲ ዴብሬ ዛይቴ ጌቴቲያ ዴሪያ ቦላን ኡቲዴዒሺን፥ ኣ ካሊያዋንቱ ባሬንቱ ፃላላ ኣኮ ዪዴ ኣ፥ «ሄዌ ኣዉዴ ሃናኔንቶ፥ ኑሲ ኦዳሪኪ፤ ቃሲ ኔ ዩሳዉኔ ዎዲያ ዉርሴው ማላይ ኣያ ጊዳኔ?» ያጌዲኖ።

4ዬሱሲ ዛሪዴ፥ ኡንቱንታ ሃዋዳን ያጌዳ፤ «ሂንቴንታ ኦኒኔ ባሌና ማላ ናጌቲቴ። 5ኣዪሲ ጎፔ፥ ዳሮ ኣሳይ ታ ሱንን፥ ‹ታኒ ኪሪስቶሳ› ያጊዴ ያና፤ ያቲዴ ዳሮ ኣሳ ባሌና። 6ማታን ዴዒያ ኦላ ዋሱዋኔ ሃኩዋን ዴዒያ ኦላ ኦዱዋ ሲሳናው ሂንቴንቱ ዴዒታ፤ ሄዋ ማላባይ ሃናናው ቤሲያ ዲራው፥ ናጌቲቴ፤ ሂርጎፒቴ፤ ሺን ዉርሴይ ቢራ። 7ኣዪሲ ጎፔ፥ ኢቲ ጋዲያ ኣሳይ ሃራ ጋዲያ ኣሳና ኦሌታና፤ ቃሲ ኢቲ ካዉቴይ ሃራ ካዉቴና ኦሌታና፤ ኮሻይኔ ቢታ ቃይ ኡባሳን ዴዓናዋ። 8ሄዌ ኡባይካ ኮይሮ ኦይ ማላ።

9«ኣሳይ ሄ ዎዴ ሂንቴንታ ዋዪሳናኔ ዎናዋ፤ ታ ሱን ዲራው፥ ጋዴ ኡባይ ሂንቴንታ ኢፃናዋ። #ማት 10፡22 10ሄ ዎዴ ጮራ ኣሳይ ኣማኑዋ ኣጋናዋንታ፤ ባሬንቱ ጊዶን ኢቱ ኢቱዋ ኣዴ ኢማናኔ ኢቱ ኢቱዋ ኢፃናዋ። 11ቃሲ ዎርዶ ናባቱ ጮራቱ ዴንዲዴ፥ ዳሮ ኣሳ ጪማናዋንታ። 12ማካላይ ዳሪያ ዲራው፥ ጮራ ኣሳ ሲቁ ኢርፃናዋ። 13ሺን ዉርሴይ ጋካናው ጌንጪያ ኡራይ ኣታናዋ። 14ኣሳው ኡባው ማርካ ጊዳና ማላ፥ ካዉቴ ዎንጋላ ሚሺራቹ ሳዓ ኡባን ኦዴታናዋ፤ ሄዋፔ ጉዪያን፥ ዉርሴይ ጋካናዋ።

ባሻ ቱናቴ

(ማር 13፡14-23፤ ሉቅ 21፡20-24)

15«ሄዋ ዲራው፥ ናቢያ ዳኔል ኦዴዳ ባሻ ቱናቴይ ጌሻ ሳን ኤቄዳዋ ሂንቴንቱ ቤዓና፤ ሄዌ ዋጊያዌንቶ፥ ናባቢያዌ ኣኬኮ። #ዳን 9፡27፤ 11፡31፤ 12፡11

16«ዪሁዳ ጋዲያን ሄ ዎዴ ዴዒያዋንቱ ዴሪያኮ ኬሲኖ። 17ጎሊያ ሁጲያን ዴዒያ ኡራይካ ባሬ ሶዪን ዴዒያዋ ኣካናው ዎፖ። 18ጋዴን ዴዒያዌ ባሬ ማዩዋ ኣካናው ጉዬ ሲሞፖ። 19ሄ ዎዴ ሻሃራ ማጫዋንቱሲኔ ንያ ማጫዋንቱሲ ኣዬሮ። 20ባልጉዋን ዎይ ሳምባታን ሂንቴንቱ ቤቴና ማላ፥ ፆሳ ዎሲቴ፤ 21ኣያው ጎፔ፥ ኣላሚ ሜቶዴፔ ሃቼ ጋካናው ዴዒቤናባይኔ ቃሲ ሃዋፔ ሲንዉካ ኡባ ዴዔና ኢታ ዋዪ ሄ ዎዴ ዴዓናዋ። #ዳን 12፡11፤ ሳፅ 7፡14 22ፆሳይ ሄ ጋላሳቱዋ ፓይዱዋ ጉያዌ ባዌንቶ፥ ኣሳ ጊዴዳ ኦኒኔ ኣቴና፤ ሺን ኢ ባሬ ዶሬዳ ኣሳቱዋ ዲራው፥ ሄ ጋላሳቱዋ ፓይዱዋ ጉናዋ።

23«ሄ ዎዴ ኦኒኔ ሂንቴንታ፥ ‹ቤዒቴ። ኪሪስቶሲ ሃዋን ዴዔ› ዎይ፥ ‹ሄዋን ዴዔ› ያጎፔ ኣዋ ኣማኖፒቴ። 24ኣዪሲ ጎፔ፥ ዎርዶ ኪሪስቶሳቱኔ ዎርዶ ናባቱ ዴንዳና፤ ያቲዴ ባሬንቶ ዳንዳዬቶፔ፥ ሃራይ ኣቶ ፆሳይ ዶሬዳዋንታካ ባሌናው ዎልቃማ ማላታኔ ማላሊሲያባ ቤሳናዋ። 25ቤዒቴ፥ ታኒ ሂንቴው ሄዋ ካሴታዴ ኦዳዲ።

26«ሄዋ ዲራው፥ ኣሳይ ሂንቴንታ፥ ‹ቤዒቴ፥ ኪሪስቶሲ ባዙዋን ዴዔ› ጎፔ፥ ያ ቦፒቴ፤ ዎይ ሂንቴንታ፥ ‹ቤዒቴ፥ ቆልዖን ዴዔ› ጊንቶካ፥ ኡንቱንቱባ ኣማኖፒቴ። 27ኣዪሲ ጎፔ፥ ዋልቃንይ ኣዋይፊ ዶሊያ ባጋፔ ዋልቃሚዴ፥ ኣዋይፊ ዉሊያ ባጋ ጋካናው ጶልቁጊያዋዳን፥ ታ ዩሳይ፥ ኣሳ ናዓ ዩሳይ፥ ሄዋዳን ሃናናዋ።

28«ባኩታይ ዴዒያሳ ሾርቲ ሺቃና።

ኣሳ ናዓይ፥ ኪሪስቶሲ ላዔዋ ያና

(ማር 13፡24-27፤ ሉቅ 21፡25-28)

29«ሄ ዎዴ ዋዪያፔ ጉዪያን፥

ማንዒያን ኣዋይ ማና፤

ኣጌናይ ፖዒያዋ ኣጋናዋ፤

ፆሊንታቱ ሳሉዋፔ ኩንዳናዋንታ፤

ቃሲ ሳሉዋን ዴዒያ ዎልቃቱካ ቃፄታናዋንታ። #ኢሳ 13፡10፤ 34፡4፤ ሂዝ 32፡7፤ ኢዩ 2፡10፣ 31፤ 3፡15፤ ሳፅ 6፡12-13

30ሄ ዎዴ ታ ማላይ፥ ኣሳ ናዓ ማላይ፥ ሳሉዋን ቤታናዋ፤ ሳዓን ሄ ዎዴ ዴዒያ ኣሳ ዛሪ ኡባይ ዬካናዋንታ። ቃሲ ታኒ፥ ኣሳ ናዓይ፥ ዎልቃናኔ ዎልቃማ ቦንቹዋና ሳሉዋፔ ሻሪያ ጊዶና ዪሺን፥ ኡንቱንቱ ቤዓና። #ዳን 7፡13፤ ዛክ 12፡10-14፤ ሳፅ 1፡7 31ኢ ባሬ ኪታንቻቱዋ ዎልቃማ ማላካታና ኪታና፤ ኪታንቻቱ ኣላሜው ሃ ጋፃፔ ያ ጋፃ ጋካናው፥ ቃሲ ሳዓን ኦይዱ ባጋፔ ኣው ዶሬቴዳ ኣሳ ሺሻናዋ።

ጎዳይ ያና ጋላሳ ማላታ

(ማር 13፡28-31፤ ሉቅ 21፡29-33)

32«ሌሚሱዋ ባላሳቶ ጌቴቲያ ሚቲፔ ኣኬኪቴ፤ ባላሳታ ኣጪያ ዎዴኔ ኢዚ ሃይይ ቆሌቲያ ዎዴ፥ ቦኒ ማቴዳዋ ሂንቴንቱ ኤራኒታ። 33ሄዋዳንካ፥ ሂንቴንቱ ሄ ኡባባ ቤዒያ ዎዴ፥ ኢ ማቲዴ ፔንጊያ ሺቄዳዋ ኤሪቴ። 34ታኒ ሂንቴንቶ ቱሙዋ ኦዳይ፤ ሃ ኡባባይ ሃናና ጋካናው፥ ሃ ዎዲያ ኣሳይ ሃይቂዲጌና። 35ሳሉኔ ሳዓይ ኣና፤ ሺን ታ ቃላይ ኡባካ ኣና።

ጎዳይ ያና ጋላሳ ኦኒኔ ኤሬና

(ማር 13፡32-37፤ ሉቅ 17፡26-30፣ 34-36)

36«ሺን ሄ ጋላሳኔ ሄ ሳቲያ ኣዉዋ ፃላላፔ ኣቲን፥ ሃራይ ኣቶ ሳሉዋን ዴዒያ ኪታንቻቱዋ ጊዲና፥ ዎይ ታና ናዓ ጊዲናካ ኦኒኔ ኤሪያዌ ባዋ። 37ታ ዩሳይ፥ ኣሳ ናዓ ዩሳይ፥ ኖሄ ዎዴ ሃኖዋ ማላ ጊዳናዋ። #ዶም 6፡5-8 38ኣዪሲ ጎፔ፥ ባሻ ሃ ዩሳፔ ካሴ ዎዴ፥ ኖሄ ማርካቢያን ጌሌዳ ጋላሳይ ጋካናው፥ ኣሳይ ሜኔ ኡሼኔ፤ ቃሲ ኣቱማ ኣሳይ ኣኬኔ ማጫ ኣሳይ ኣሲና ጌሌ። 39ባሻ ሃይ ዪዴ፥ ኡንቱንታ ኡባ ኣፋና ጋካናው፥ ኡንቱንቱ ኣኬኪ ቤይኪኖ፤ ታኒ፥ ኣሳ ናዓይ፥ ዪያ ዎዲ፥ ሄዋ ማላ ጊዳናዋ። #ዶም 7፡6-24

40«ሄ ዎዴ ላዑ ኣሳቱ ጋዴን ኦያዋንቱፔ ኢቱዋ ኣፋና፤ ኢቱ ኣታናዋ። 41ላዑ ማጫዋንቱ ዎፃን ጋጪያዋንቱፔ ኢቲኖ ኣፋና፤ ኢቲና ኣታና።

42«ሲሚ ሂንቴ ጎዳይ ኣይ ጋላሲ ያናዌንቶ ሂንቴንቱ ኤሬና ዲራው፥ ናጊ ኡቲቴ። 43ሺን ካዪሱ ቃማፔ ዎይሳ ዎዲያን ያኔንቶ ጎሊያ ጎዳይ ኤሬዴንቶ፥ ባሬ ጎሊ ቦኬቴና ማላ፥ ቤጎቲዴ ናጊ ኡታናዋ ኤሪቴ። 44ሄዋ ዲራው፥ ሂንቴንቱካ ጊጊ ኡቲቴ፤ ኣያው ጎፔ፥ ታኒ፥ ኣሳ ናዓይ፥ ሂንቴንቱ ቆፔና ሳቲያን ያና።

ኢታኔ ሎዖ ቆማ ሌሚሱዋ

(ሉቅ 12፡41-48)

45«ያቲና፥ ባሬ ሶይ ኣሳው ቁማ ኮሺያ ዎዲያን ኢማና ማላ፥ ኣ ጎዳይ ሱንዳ ኣማኔቴዳ ዎዛናማ ቆማይ ኦኔ? 46ኢ ሄዋዳን ኦሺን፥ ኣ ጎዳይ ዪዴ ዴሚያ ቆማይ ኣንጄቴዳዋ። 47ታኒ ሂንቴንቶ ቱሙዋ ኦዳይ፤ ጎዳይ ሄ ቆማ ባሬዋ ኡባ ቦላ ሱንና። 48ሺን ቆማይ ኢታ ጊዶፔ፥ ‹ታ ጎዳይ ጋሚዒዴ ያናዋ› ያጊዴ ባሬ ዎዛናን ቆፒዴ፥ 49ባሬ ላጌ ቆማቱዋ ዋ ዶሞፔ፥ ማቲያዋንቱና ሞፔኔ ኡሾፔ፥ 50ሄ ቆማ ጎዳይ ኢ ቆፒቤና ጋላሳኒኔ ኢ ኤሪቤና ሳቲያን ያና። 51ሄዋፔ ጉዪያን ኣ ቃንፄሬዴ፥ #24፡51 ኣ ቃንፄሬዴ፥ ጉሳይ ኬሲ ካሬ ኦላናዋ ጊያዋ። ሎዓ ማላቲያ ኢታ ኣሳቱ ዴዒያሳን ዎና፤ ሄዋን ኢ ዬካናኔ ኣቻ ቃና።

Currently Selected:

ማቶሳ 24: dwrENT

Highlight

Copy