ማቶሳ 25

ታሙ ዎዶራቱዋ ሌሚሱዋ

1«ሄ ዎዴ ሳሉዋ ካዉቴይ ባሬንቱ ኩራዚያ ኦይቂዴ፥ ማቻቶ ኣኪያዋ ሞካናው ካሬ ኬሴዳ ታሙ ዎዶራቱዋ ማላታና። 2ኡንቱንቱፔ ኢቼሻቱ ቦዛቱዋ፤ ቃሲ ኢቼሻቱ ጪንጫ። 3ቦዛቱ ባሬንቱ ኩራዚያ ኦይቄዲኖ፤ ሺን ላምባ ኦይቂቤይኪኖ። 4ሺን ጪንጫቱ ባሬንቱ ኩራዚያኔ ፃሩሙሲያን ላምባ ኦይቄዲኖ። 5ማቻቶ ኣኪያዌ ዬናን ጋሚዒና፥ ሄ ዎዶራቱ ባሬንታ ጌሚዒሺሲና ጊሲ ኣጌዲኖ።

6«ቢላሄ ጊዴዳ ዎዴ፥ ‹ቤዒቴ፥ ማቻቶ ኣኪያዌ ጋኬዳ፤ ኣ ሞካናው ካሬ ኬሲቴ› ያጊያ ዎልቃማ ጫቡ ዴንዴዳ።

7«ሄ ዎዴ ሄ ዎዶራቱ ኡባቱ ቤጎቲዴ፥ ባሬንቱ ኩራዚያ ጊጊሴዲኖ። 8ቦዛቱ ጪንጫቱዋ፥ ‹ኑ ኩራዚ ቶዓና ሃኒያ ዲራው፥ ሂንቴንቱ ላምባፔ ኑሲ ኢሜሪኪቴ› ያጌዲኖ።

9«ሺን ጪንጫቱ ዛሪዴ ኡንቱንታ፥ ‹ኣጊቴ፥ ኑሲኔ ሂንቴንቱሲ ጊዴና፤ ሄዋ ዲራ ሂንቴው ዛሊዒያዋንቱኮ ቢዴ ሻሚ ኣኪቴ› ያጌዲኖ። 10ሄዋፔ ጉዬ ቦዛ ዎዶራቱ ላምባ ሻማናው ቢዲጊና፥ ማቻቶ ኣኪያዌ ፑቱ ጊና፥ ጊጊ ኡቴዳ ኢቼሹ ዎዶራቱ ኣናና ኢቲፔ ቡላቻ ጎሊያ ጌሌዲኖ፤ ኢፒይካ ጎርዴቲ ኣጌዳ።

11«ጉዬፔ ቃሲ ዮኮ ዎዶራቱ ዪዴ፥ ‹ጎዳው፥ ጎዳው፥ ኑሲ ዶያሪኪ› ያጌዲኖ።

12«ሺን ማቻቶ ኣኪያዌ ዛሪዴ፥ ‹ታኒ ሂንቴንቶ ቱሙዋ ኦዳይ፤ ታኒ ሂንቴንታ ኤሪኬ› ያጌዳ።

13«ሲሚ ታኒ፥ ኣሳ ናዓይ፥ ያና ጋላሳ ዎይ ሳቲያ ሂንቴንቱ ኤሬና ዲራው፥ ናጊ ኡቲቴ።

ሄዙ ቆማቱዋ ሌሚሱዋ

(ሉቅ 19፡11-27)

14«ኣዪሲ ጎፔ፥ ሳሉዋ ካዉቴይ ባሬ ቆማቱዋ ፄሲዴ፥ ባሬው ዴዒያዋ ኡንቱንቶ ሼዴ፥ ኦጊያ ባና ሃኒያ ቢታኒያ ቤሴ። 15ኡንቱንቱ ሁጲያን ሁጲያን ኡንቱንቱ ዎልቃ ኬና ኢቶ ኢቼሹ ሻዓ ቢራ፥ ኢቶ ላዑ ሻዓ ቢራ፥ ቃሲ ኢቶ ኢቲ ሻዓ ቢራ ኢሚዴ፥ ባሬ ኦጊያ ቤዳ። 16ኢቼሹ ሻዓ ቢራ ኣኬዳ ቆማይ ኤሌካ ቢዴ ዛሊዒዴ፥ ሃራ ኢቼሹ ሻዓ ቢራ ዎሴዳ። 17ሄዋዳንካ፥ ቃሲ ላዑ ሻዓ ቢራ ኣኬዳ ቆማይ ሃራ ላዑ ሻዓ ቢራ ዎሴዳ። 18ሺን ኢቲ ሻዓ ቢራ ኣኬዳዌ ቢዴ፥ ኦላ ቦኪዴ፥ ባሬ ጎዳ ሚሻ ሞጊ ኣጌዳ።

19«ዳሮ ዎዲያፔ ጉዪያን፥ ሄ ቆማቱዋ ጎዳይ ዪዴ፥ ባሬ ሚሻ ኡንቱንቱና ሄቴቴዳ። 20ኢቼሹ ሻዓ ቢራ ኣኬዳ ቆማይ ዪዴ፥ ሃራ ኢቼሹ ሻዓ ቢራ ሼዴ፥ ‹ታ ጎዳው፥ ኔኒ ታው ኢቼሹ ሻዓ ቢራ ኢማዳ፤ ቤዓ፥ ሃራ ኢቼሹ ሻዓ ቢራ ዎሳዲ› ያጌዳ። 21ኣ ጎዳይ ኣ፥ ‹ሃያናሾ! ኔኒ ሎዓኔ ኣማኔቲያ ቆማ፤ ኔኒ ጉባን ኣማኔታዳ። ታኒ ኔና ዳሮባው ካፖ ኦና፤ ሃ ጌላዴ ኔ ጎዳና ናሼታ› ያጌዳ።

22«ቃሲ ላዑ ሻዓ ቢራ ኣኬዳዌካ ዪዴ፥ ‹ታ ጎዳው፥ ኔኒ ታው ላዑ ሻዓ ቢራ ኢማዳ፤ ቤዓ፥ ታኒ ሃራ ላዑ ሻዓ ቢራ ዎሳዲ› ያጌዳ። 23ኣ ጎዳይ ኣ፥ ‹ሃያናሾ! ኔኒ ሎዓኔ ኣማኔቲያ ቆማ፤ ኔኒ ጉባን ኣማኔታዳ። ታኒ ኔና ዳሮባው ካፖ ኦና፤ ሃ ጌላዴ ኔ ጎዳና ናሼታ› ያጌዳ።

24«ኢቲ ሻዓ ቢራ ኣኬዳዌ ቃሲ ዪዴ፥ ‹ታ ጎዳው፥ ኔኒ ዜራቤናሳፔ ቆይጪያ ኣሳ ጊዲያዋኔ ካ ላላቤናሳፔ ማፂያ ሜቄ ባይና ኣሳ ጊዲያዋ ታኒ ኤራይ። 25ታኒ ያያዲ፤ ያታዴ ባዴ ኔ ቢራ ቢታን ሞጋዲ፤ ቤዓ፥ ኔ ቢራይ ሃዌኩ› ያጌዳ።

26«ኣ ጎዳይ ዛሪዴ፥ ኣ ሃዋዳን ያጌዳ፤ ‹ሃ ኢታ ኣዛላ ኣሺካሬው፥ ታኒ ዜራቤናሳፔ ቆይጪያ ኣሳ ጊዲያዋኔ ካ ላላቤናሳፔ ማፂያ ኣሳ ጊዲያዋ ኤራዲ? 27ያቲና፥ ኔኒ ታ ሚሻ ዎሲያዋንቱ ማታን ዎዳዋ ጊዲንቶ፥ ታኒ ሲሚያ ዎዴ ታ ሚሻ ዎያና ኣካናዋሺን ኣቴዳ። 28ሄዋ ዲራው፥ ሄ ሚሻ ኣፔ ዎ ኣኪዴ፥ ታሙ ሻዓ ቢራይ ዴዒያዎ ኢሚቴ። 29ኣዪሲ ጎፔ፥ ዴዒያ ኡባው ሃራይ ጉጄታና፤ ኢ ባሬው ጊዲያዋፔ ዳሪሲዴ ኣካና፤ ሺን ባይናዎ ሃራይ ኣቶ፥ ሄ ኣው ዴዒያ ጉይካ ኣፔ ኣኬታናዋ። 30ጎዔና ቆማ ካሬ ማ ኬሲ ኦሊቴ፤ ሄዋን ኢ ዬካናኔ ባሬ ኣቻ ቃና› ያጌዳ።

ዎዲያ ዉርሴን ሃናና ፒርዳ

31«ታኒ፥ ኣሳ ናዓይ፥ ኪታንቻቱዋ ኡባቱዋና ቦንቹዋን ዪያ ዎዴ፥ ታ ቦንቾ ካዉቴ ኦይዲያን ኡታና። #ማት 16፡27፤ 19፡28 32ሳዓን ዴዒያ ኣሳይ ኡባይ ታ ሲን ሺቃናዋንታ፤ ሄሚያዌ ዶርሳቱዋ ዴሻቱዋፔ ሻኪያዋዳን፥ ታኒ ሄ ኣሳ ላዑ ኬሳዴ ሻካና። 33ቃሲ ዶርሳቱዋ ታፔ ኡሼቻ ባጋና ኤሳዴ፥ ዴሻቱዋ ታፔ ሃዲርሳ ባጋና ኤሳና።

34«ሄዋፔ ጉዪያን፥ ታኒ ካቲ ታፔ ኡሼቻ ባጋና ዴዒያዋንታ ሃዋዳን ያጋና፤ ‹ታ ኣቡ ኣንጄዳዋንቶ፥ ሃ ዪዴ ሳዓይ ሜቶዴፔ ሃቼ ጋካናው፥ ሂንቴንቶ ጊጌዳ ካዉቴ ላቲቴ። 35ኣዪሲ ጎፔ፥ ታኒ ኮሻቲና ሚዜዲታ፤ ሳሜቲና ኡሼዲታ፤ ኢማ ጊዳዴ ቢናካ ሞኬዲታ። 36ታኒ ካሎቲና ማዪዜዲታ፤ ሃርጊና ቤዔዲታ፤ ቃሼቲና ታኮ ጋኪዴ ኦቼዲታ› ያጋና።

37«ሄዋፔ ጉዪያን፥ ፂላቱ ዛሪዴ፥ ኣ ሃዋዳን ያጋና፤ ‹ጎዳው፥ ኔኒ ኮሻቲና፥ ኣዉዴ ቤዒዴ ሚዜዶ? ዎይ ኔኒ ሳሜቲና፥ ኣዉዴ ቤዒዴ ኡሼዶ? 38ኔኒ ኢማ ጊዳዴ ዪና ኣዉዴ ቤዒዴ ሞኬዶ? ዎይ ኔኒ ካሎቲና ኣዉዴ ማዪዜዶ? 39ቃሲ ኔኒ ሃርጊና፥ ዎይ ቃሼቲና ኔኮ ቢዴ ኣዉዴ ኔና ቤዔዶ?› ያጋናዋንታ። 40ታኒ ካቲ ዛራዴ፥ ‹ታኒ ሂንቴንቶ ቱሙዋ ኦዳይ፤ ሂንቴንቱ ሃ ታ ኢሻቱዋ ኡባፔ ሃራይ ኣቶ፥ ላፊያ ኢቶ ኦዳዋ ጊዲንቶካ፥ ሄዋ ታው ኦዲታ› ያጋና።

41«ሄ ዎዴ፥ ታፔ ሃዲርሳ ባጋና ዴዒያዋንታ ታኒ ያጋና፤ ‹ሃ ሼቄቴዳዋንቶ፥ ታ ማታፔ ኪቺቴ፤ ቢዴ ፃላሂያ ካፖኔ ኣ ኪታንቻቱዋሲ ጊጌዳ ሜና ታማን ጌሊቴ። 42ኣዪሲ ጎፔ፥ ታኒ ኮሻቲና፥ ታና ሚዚቤይኪታ፤ ሳሜቲና ኡሺቤይኪታ። 43ታኒ ኢማ ጊዳዴ ቢና፥ ታና ሞኪቤይኪታ፤ ካሎቲና ማዪዚቤይኪታ፤ ቃሲ ሃርጊና፥ ቃሼቲናካ ታና ቤዒቤይኪታ› ያጋና።

44«ሄ ዎዴ ኡንቱንቱ ቃሲ ሃዋዳን ያጊዴ ዛራናዋንታ፤ ‹ጎዳው፥ ኔኒ ኮሻቲና ዎይ ሳሜቲና፥ ዎይ ኢማ ጊዳዴ ቢና ዎይ ካሎቲና፥ ዎይ ሃርጊና ዎይ ቃሼቲና፥ ኣዉዴ ቤዒዴ፥ ኔና ማዴናን ኢፄዶ?› ያጋናዋንታ።

45«ሄ ዎዴ ታኒ ካቲ ዛራዴ ኡንቱንታ፥ ‹ታኒ ሂንቴንቶ ቱሙዋ ኦዳይ፤ ሂንቴንቱ ሃ ኡባፔ ላፊያ ኢቱዋ ማዴናን ኢፄዳዌ፥ ታና ማዴናን ኢፄዳዋ› ያጋና። 46ሄዋንቱ ሜና ሙራው ባና፤ ሺን ፂላቱ ሜና ዴዖ ባና» ያጌዳ። #ዳን 12፡2

Currently Selected:

ማቶሳ 25: dwrENT

Highlight

Copy