ማቶሳ 26
26
ዬሱሳ ቦላ ማቄቴዲኖ
(ማር 14፡1-2፤ ሉቅ 22፡1-2፤ ዮህ 11፡45-53)
1ዬሱሲ ሃ ቲሚርቲያ ኡባ ዉሪሴዳ ዎዴ፥ ባሬና ካሊያዋንታ፥ 2«ላዑ ጋላሳፔ ጉዪያን፥ ፓሲጋ ባላ ቦንቺያ ጋላሳ ጊዲያዋ ኤሪታ። ሄ ጋላሲ ታና፥ ኣሳ ናዓ፥ ኣሳይ ማስቃሊያ ቦላ ሚሲማሪያን ሺዴ ካቃናው ኣዴ ኢማና» ያጌዳ። #ኬስ 12፡1-27
3ሄ ዎዴ ቄሳቱዋ ካፓቱኔ ጋዲያ ጪማቱ ቃያፋ ጌቴቲያ ቄሳቱዋ ኡባቱዋ ካፑዋ ዎጋ ጎሊያን ሺቂዴ፥ 4ኣሳይ ኤሬናን ዬሱሳ ኦይቂዴ፥ ዎናው ማቄቴዲኖ። 5ሺን ኡንቱንቱ፥ «ኣሳይ ዋላሳ ኬሴና ማላ፥ ፓሲጋ ቦንቺያ ጋላሲ ሄዋ ኦኮ» ያጌዲኖ።
ኢቲ ማጫ ሚሺራታ ዬሱሳ ሺቱዋ ጫጫፋዱ
(ማር 14፡3-9፤ ዮህ 12፡1-8)
6ዬሱሲ ቢታኒያ ካታማን ኦሉዋ ሃርጊያ ሲሞና ሶዪን ዴዒሺን፥ 7ኢቲ ሚሺራታ ኣልባስፂሮሳ ጌቴቲያ ሹቻፔ ኦሴቴዳ ቢልቃሲያ ኩሜዳ ዳሪ ኣልዖ ሺቱዋ ኣካዴ ዬዳዉና ቁማ ኢ ሚና፥ ሄ ሺቱዋ ዬሱሳ ሁጲያን ጫጫፋዱ። 8ሺን ዬሱሳ ካሊያዋንቱ ሄዋ ቤዒዴ፥ «ሃ ሺቱዋ ጮ ባዪዙሳይ ኣያሴ? 9ኣዪሲ ጎፔ፥ ሃ ሺቱዋ ኣልዖ ጋቲያን ዛሊዒዴ፥ ሚሻ ሂዬሳው ኢማናው ዳንዳዬቴ» ያጌዲኖ።
10ዬሱሲ ኡንቱንቱ ጊያዋ ኤሪዴ፥ ኡንቱንታ ሃዋዳን ያጌዳ፤ «ሃ ሚሺራቶ ኣያው ዋዪሲቴ? ኢዛ ታው ሎዖባ ኦዱ። 11ሂዬሳቱ ኡባ ዎዴ ሂንቴናና ዴዒኖ፤ ሺን ታኒ ሂንቴናና ኡባ ዎዴ ዴዒኬ፤ #ዛር 15፡11 12ኢዛ ሃ ሺቱዋ ታ ቦላ ቲጊያዌ ታና ሞጋናው ጊጊሳናሳ። 13ታኒ ሂንቴንቶ ቱሙዋ ኦዳይ፤ ሳዓ ኡባን ሃ ዎንጋላ ሚሺራቹዋ ኦዲያሳን ሃቃኒኔ፥ ኣሳይ ኢዞ ዎዛና ኣና ማላ፥ ኢዛ ኦዳዌ ኦዴታናዋ» ያጌዳ።
ዪሁዳይ ዬሱሳ ኣዴ ኢማናው ዬዉዋን ጊጌዳ
(ማር 14፡10-11፤ ሉቅ 22፡3-6)
14ሄ ዎዴ ታማኔ ላዑ ዬሱሳ ካሊያዋንቱፔ ኢቱ ዪሁዳ ኣስቆሮቱ ያጌቲያዌ ቄሳቱዋ ካፓቱዋኮ 15ቢዴ፥ «ታኒ ሂንቴንቱሲ ዬሱሳ ኦይፔ፥ ታው ኣያ ኢማኒቴ?» ያጊና ኡንቱንቱ ኣው ሃታሙ ቢራ ቆፒዴ ኢሜዲኖ። #ዛክ 11፡12 16ሄዋፔ ጉዪያን፥ ዪሁዳይ ዬሱሳ ኣ ኢማናው ኢንጄቲያ ዎዲያ ዎቼ።
ዬሱሲ ኣዪሁዳቱ ፓሲጋ ካዉዋ ባሬና ካሊያዋንቱና ሜዳ
(ማር 14፡12-21፤ ሉቅ 22፡7-14፣ 21-23፤ ዮህ 13፡21-30)
17ባላ ዳቡዋ ሚያ ጋላሳ ቦንቺያ ኮይሮ ጋላሲ፥ ዬሱሳ ካሊያዋንቱ ኣኮ ዪዴ፥ «ፓሲጋ ቦንቺያ ጋላሲ ኔኒ ማና ቁማ ሃቃን ጊጊሳኔ?» ያጌዲኖ።
18ሄዋፔ ጉዬ ዬሱሲ ኡንቱንታ፥ «ካታማ ቢዴ፥ ኢቲ ቢታኒያ፥ ‹ታማሪሲያዌ ኔና፥ «ታው ዎዲ ጋኬዳ፤ ታኒ ታና ካሊያዋንቱና ፓሲጋ ቦንቺያ ጋላሳ ኔ ሶዪን ኣና» ጌዳ› ጊቴ» ያጌዳ።
19ኣ ካሊያዋንቱ ዬሱሲ ባሬንታ ኣዛዞዋዳን ኦዴ፥ ፓሲጋ ቦንቺያ ጋላሲ ማና ቁማ ጊጊሴዲኖ።
20ሳዓይ ኦማርሴዳ ዎዴ፥ ዬሱሲ ታማኔ ላዑ ኣ ካሊያዋንቱና ቁማ ማናው ኡቴዳ። 21ኡንቱንቱ ሚሺን፥ ዬሱሲ ኡንቱንታ፥ «ታኒ ሂንቴንቶ ቱሙዋ ኦዳይ፤ ሂንቴፔ ኢቲ ኡራይ ታና ኣዴ ኢማናዋ» ያጌዳ።
22ኡንቱንቱ ዳሪ ዳጋሚዴ፥ ሁጲያን ሁጲያን፥ «ጎዳው፥ ቱሙ ታኔሻ?» ጉሳ ዶሜዲኖ።
23ዬሱሲ ዛሪዴ፥ «ባሬ ኩሺያ ታናና ኢቲፔ ዎጪቲያፔ ዬዲዴ ቱሺያዌ ታና ኣ ኢማና። #ማዝ 41፡9 24ታኒ፥ ኣሳ ናዓይ፥ ፆሳ ማፃፋይ ሃይቃና ጌዳዋዳን ሃይቃና፤ ሺን ታና፥ ኣሳ ናዓ፥ ኣ ኢሚያ ኡራው ኣዬሮ፤ ሄ ኡራይ ዬሌቴናን ኣቴዴንቶ ኣው ሎዓሺን» ያጌዳ።
25ኣ ኣ ኢሚያ ዪሁዳይ ዛሪዴ፥ «ታማሪሲያዎ፥ ኔኒ ጊያዌ ታኔ?» ያጌዳ።
ዬሱሲ ዛሪዴ ኣ፥ «ኔኒ ኔ ሁጲያን ጋዳ» ያጌዳ።
ጎዳ ካዉዋ ኣኪያ ዎጋ
(ማር 14፡22-26፤ ሉቅ 22፡15-20፤ 1ቆር 11፡23-25)
26ኡንቱንቱ ሚሺን፥ ዬሱሲ ዳቡዋ ኣኪዴ፥ ፆሳ ጋላቴዳ፤ ሄ ዳቡዋ ሜንሬዴ፥ ባሬና ካሊያዋንቱሲ ኢሚዴ፥ «ሄይቴ፤ ሚቴ፤ ሃዌ ታ ኣሹዋ» ያጌዳ።
27ፁዓ ኣኪዴ፥ ፆሳ ጋላቴዳ። ኡንቱንቶ ኢሚዴ፥ «ኡባይ ሃዋፔ ኡሺቴ፤ 28ኣያው ጎፔ፥ ሃዌ ዳሮ ኣሳ ናጋራይ ኣቶ ጌቴታና ዲራው ጉኪያ ታ ሱ፤ ታ ሱይ ኦራ ጫቁዋ። #ኬስ 24፡8፤ ኤርም 31፡31-34 29ሺን ታኒ ሂንቴንቶ ኦዳይ፤ ታኒ ታ ኣቡ ካዉቴን ኦራ ዎዪኒያ ኤሳ ሂንቴንቱና ኡሻና ጋላሳይ ጋካናው፥ ላዔዋ ሃ ዎዪኒያ ኤሳ ኡባካ ኡሺኬ» ያጌዳ።
30ማዚሙሪያ ዬፆዋፔ ጉዪያን፥ ዴብሬ ዛይቴ ጌቴቲያ ዴሪያ ቤዲኖ።
ዬሱሲ ጴፂሮሲ ካዳናዋ ካሴቲዴ ኦዴዳ
(ማር 14፡27-31፤ ሉቅ 22፡31-34፤ ዮህ 13፡36-38)
31ዬሱሲ ሄ ዎዴ ኡንቱንታ፥ «ሃቼ ቃማ ሂንቴንቱ ኡባይ ታና ኣጊዴ ኪቻና፤ ኣያው ጎፔ፥ ፆሳ ማፃፋይ፥
‹ፆሳይ ዶርሳ ሄሚያዋ ዎናዋ፤
ሄዋፔ ጉዪያን ዶርሳ ዉዲ ላሌታናዋ›
ያጌ። #ዛክ 13፡7 32ሺን ታኒ ሃይቁዋፔ ዴንዶዋፔ ጉዪያን፥ ሂንቴፔ ካሴታዴ ጋሊላ ባና» ያጌዳ።
33ጴፂሮሲ ዛሪዴ፥ «ኡንቱንቱ ኡባቱ ኔና ኣጊዴ ኪቻናዋንታ፤ ታኒ ኔና ኡባካ ዬጋዴ ኪቺኬ» ያጌዳ።
34ዬሱሲ ጴፂሮሳ፥ «ታኒ ኔው ቱሙዋ ኦዳይ፤ ሃቼ ቃማ ኩቱ ዋሳናፔ ካሴ፥ ኔኒ ታና ሄዙ ካላ ካዳናሳ» ያጌዳ።
35ጴፂሮሲ ዛሪዴ፥ «ታኒ ሃራይ ኣቶ፥ ኔናና ኢቲፔ ሃይቂንቶካ፥ ኔና ኡባካ ካዲኬ» ያጌዳ። ቃሲ ዬሱሳ ካሊያዋንቱ ኡባቱካ ሄዋዳን ጌዲኖ።
ዬሱሲ ጌቴሴማኒያን ዎሴዳ
(ማር 14፡32-42፤ ሉቅ 22፡39-46)
36ዬሱሲ ሄ ዎዴ ባሬና ካሊያዋንቱና ጌቴሴማኒያ ጌቴቲያሳ ቢዴ ኡንቱንታ፥ «ታኒ ሂኒ ባዴ ፆሳ ዎሲሺን፥ ሂንቴንቱ ሃዋን ኡቲሺቴ» ያጌዳ። 37ሄዋፔ ጉዬ ጴፂሮሳኔ ዛቢዲዮሳ ናና ላዑዋ ባሬናና ኣፊዴ፥ ዳሮ ካዩዋኔ ኡጋ ዶሜዳ። 38ቃሲ ኡንቱንታ፥ «ታኒ ሃይቃና ጋካናሲካ ካዮታይ፤ ሃዋን ቤጎቲዴ፥ ታናና ናጊቴ» ያጌዳ።
39ላፋ ሲንኮ ሺቂዴ፥ ሳዓን ጉፋኒዴ፥ «ታ ኣቦ፥ ዳንዳዬቲያዋ ጊዶፔ፥ ሃ ፁዓ ታፔ ዲጋ፤ ሺን ኔኒ ኮዪያዋዳን ሃኖፔ ኣቲን፥ ታኒ ኮዪያዋዳን ሃኖፖ» ያጊዴ ፆሳ ዎሴዳ።
40ዬሱሲ ባሬና ካሊያዋንቱኮ ሲሚዴ ዬዳ፤ ጌሚዒሾዋንታ ዴሚዴ ጴፂሮሳ፥ «ሂንቴንቱ ኢቲ ሳቴንቶኔካ ጌሚዒሼናን ታናና ናጋናው ዳንዳዪቤይኪቴ? 41ፓጪያን ሂንቴንቱ ጌሌና ማላ፥ ሚኒቴኔ ፆሳ ዎሲቴ፤ ኣያናይ ጊጊ ኡቴዳ፤ ሺን ኣሳቴ ኤሻይ ዳቡራንቻ» ያጌዳ።
42ዬሱሲ ቃሲ ላዔንዋ ቢዴ፥ «ታ ኣቦ፥ ታኒ ሃ ዎሊቃማ ሜቱዋ ኣኬናን ዴዒሺን ፁዓ ዴንናው ዳንዳዬቴናዋ ጊዶፔ፥ ኔኒ ጊያዌ ሃኖ» ያጊዴ ፆሳ ዎሴዳ። 43ቃሲካ ሲሚ ዪዴ፥ ኣ ካሊያዋንቱ ኣይፊያ ጌሚዒሹ ጎዚ ዎዳ ዲራው፥ ጌሚዒሾዋንታ ዴሜዳ።
44ቃሲካ ኡንቱንታ ዬጊ ቢዴ፥ ሄዜንዋ ካሴ ቃላ ዛሪዴ፥ ፆሳ ዎሴዳ። 45ሄዋፔ ጉዪያን፥ ባሬና ካሊያዋንቶ ዪዴ፥ «ሃዒ ጋካናዉካ ጌሚዒሺቴኔ ሼምፒቴ? ቤዒቴ፥ ታና፥ ኣሳ ናዓ፥ ናጋራንቻ ኣሳቱዋሲ ኣዴ ኢሚያ ዎዲ ጋኬዳ። 46ዴንዲና ቦይቴ፤ ቤዒቴ፥ ታና ኣ ኢሚያዌ ሃዌኩ ጋኬዳ» ያጌዳ።
ዬሱሲ ባሬ ሞርኬቱዋን ኦይቄቴዳ
(ማር 14፡43-50፤ ሉቅ 22፡47-53፤ ዮህ 18፡3-12)
47ዬሱሲ ሄዋ ቢሮ ሃሳዪሺን፥ ታማኔ ላዑ ኣ ካሊያዋንቱፔ ኢቱ፥ ዪሁዳይ፥ ጋኪ ዎዳ፤ ቃሲ ቄሳቱዋ ካፓቱኔ ጋዲያ ጪማቱ ኪቲና፥ ማሻኔ ፃምዓ ኦይቄዳ ጮራ ኣሳይ ኣናና ኢቲፔ ዬዳ። 48ዬሱሳ ኣ ኢሚያዌ ሄ ጮራ ኣሳ፥ «ታኒ ዬሪያዌ ኣ፤ ኣ ኦይቂቴ» ያጊዴ ማላ ኦዲ ዎዳ።
49ኤሌካ ዬሱሳኮ ሺቂዴ፥ «ታማሪሲያዎ፥ ሳሮ ዴዓይ» ያጊዴ ኣ ዬሪ ኣኬዳ።
50ዬሱሲ ዪሁዳ፥ «ታ ላጌው፥ ኔኒ ኦናባ ኦ ኣጋ» ያጌዳ።
ሄዋፔ ጉዪያን፥ ሄ ጮራ ኣሳይ ሺቂዴ፥ ዬሱሳ ሎይ ኦይቄዳ። 51ዬሱሳና ዴዒያዋንቱፔ ኢቱ ባሬ ማሻ ኬሲዴ ቄሳቱዋ ኡባቱዋ ካፑዋ ቆማ ሃይ ቃንፂ ኦሌዳ። 52ዬሱሲ ሄ ዎዴ ኣ ሃዋዳን ያጌዳ፤ «ኔ ማሻ ኣኬዳሳኒ ዛራዴ ዎ፤ ኣያው ጎፔ፥ ማሻ ዴንያ ኡባይ ማሻን ሃይቃና። 53ታ ኣቡ ዳሮ ሻዓ ኪታንቻቱዋ ኢቲ ኩን ዬዲዴ፥ ታና ማዳና ማላ፥ ታኒ ኣ ዎሳናው ዳንዳዪያዋ ኤሪኪ? 54ያቲና፥ ፆሳ ቃላይ ሃዋዳን ሃናናው ቤሴ ያጌዳዌ ዋኒዴ ፖሌታናው ዳንዳዪ?» ያጌዳ።
55ሄዋፔ ጉዪያን፥ ዬሱሲ ሄዋን ሺቄዳ ጮራ ኣሳ ሃዋዳን ያጌዳ፤ «ታና ካዪሶ ኬሲዴ፥ ካዪሱዋ ኦይቂያዋዳን ኦይቃናው ማሻኔ ፃምዓ ኦይቂዴ ዬዲቴ? ታኒ ጌሻ ጎሊያን ታማሪሳዴ፥ ጋላሳን ጋላሳን ሂንቴንቱና ኦያ ዎዴ ታና ኦይቂቤይኪታ፤ 56ሺን ሃዌ ኡባይ ሃኔዳዌ ናባቱ ፆሳ ቃላን ፃፌዳዌ ፖሌታናሳ» ያጌዳ።
ዬሱሳ ካሊያዋንቱ ሄ ዎዴ ኡባቱ ኣ ዬጊ ቤዲኖ።
ዬሱሲ ፒርዳ ሻንጎ ኣዳ
(ማር 14፡53-65፤ ሉቅ 22፡54-55፣ 63-71፤ ዮህ 18፡13-14፣ 19-24)
57ዬሱሳ ኦይቄዳዋንቱ ቄሳቱዋ ኡባቱዋ ካፑዋ ቃያፋኮ፥ ሂጊያ ታማሪሲያዋንቱኔ ጪማቱ ሺቄዳሳ ኣኪዴ ቤዲኖ። 58ሺን ጴፂሮሲ ቄሳቱዋ ኡባቱዋ ካፑዋ ዲርሳ ጊዶ ጋካናው፥ ሃኩዋን ኣ ካሌዳ፤ ዬዉዋ ዉርሴ ቤዓናው ዲርሳ ጊዶ ጌሊዴ፥ ናጊያዋንቱና ኡቲ ኣጌዳ።
59ቄሳቱዋ ካፓቱኔ ሺቄዳ ኣሳይ ኡባይ ዬሱሳ ዎናው ኣ ቦላ ዎርዱዋ ማርካ ዴማናው ኮዬዲኖ። 60ሺን ሃራይ ኣቶ ጮራ ኣሳይ ዪዴ፥ ኣ ቦላ ዎርዱዋን ማርካቲናካ ኣፔ ኣይኔ ዴሚቤይኪኖ። ጉዬፔ ላዓቱ ዪዴ፥ 61«ሃ ቢታኒ፥ ‹ታኒ ፆሳ ጌሻ ጎሊያ ኮላዴ፥ ሄዙ ጋላሳን ዛራዴ ኬፃናው ዳንዳያይ› ጌዳ» ያጌዲኖ።
62ቄሳቱዋ ኡባቱዋ ካፑ ዴንዲ ኤቂዴ ዬሱሳ፥ «ሃዋንቱ ኔና ሞቲያ ሞቶ ኔው ዛሪያባይ ባዌ?» ያጌዳ። 63ሺን ዬሱሲ ጮዑ ጌዳ፤ ቃሲካ ቄሳቱዋ ኡባቱዋ ካፑ ኣ፥ «ታኒ ኔና ዴዑዋ ፆሳ ሱንን ጫላይ፤ ኔኒ ፆሳ ናዓ ኪሪስቶሳ ጊዶፔ ኑሲ ኦዳ» ያጌዳ።
64ዬሱሲ ዛሪዴ፥ «ኔኒ ኔ ሁጴዉካ ጋዳ፤ ሺን ታኒ ሂንቴንቱሲ ኦዳይ፤ ሃዋፔ ሲንን፥ ሂንቴንቱ ታና፥ ኣሳ ናዓ፥ ዎልቃማ ፆሳፔ ኡሼቻ ባጋና ኡቴዳዋኔ ሳሉዋ ሻሪያና ዪሺን ቤዓና» ያጌዳ። #ዳን 7፡13
65ሄዋፔ ጉዪያን፥ ቄሳቱዋ ኡባቱዋ ካፑ ባሬ ማዩዋ ጴ ኦሊዴ፥ «ሃዌ ቦሬዳ፤ ኑና ሃዋፔ ሲንን ኣያው ሃራ ማርካ ኮሺ? ኢ ሃዒ ቦሪያዋ ሂንቴንቱ ሲሴዲታ። 66ሂንቴንቱ ቆፋይ ኣዬ?» ያጌዳ።
ኡንቴንቱ፥ «ኣው ሃይቁ ቤሴ» ያጊዴ ዛሬዲኖ። #ዎግ 24፡16
67ሄዋፔ ጉዪያን፥ ኡንቱንቱ ኣ ዴሙዋን ጩቺዴ፥ ኣ ዴቼዲኖ፤ ሃራንቱ ቃሲ ኣ ባቂዴ፥ #ኢሳ 50፡6 68«ኪሪስቶሳ! ኔን ኔና ናቤ ጋሳሺን፥ ኔና ሾጬዳዌ ኦኔንቶ ኣኔ ኑሲ ኦዳ!» ያጌዲኖ።
ጴፂሮሲ ዬሱሳ ካዴዳ
(ማር 14፡66-72፤ ሉቅ 22፡56-62፤ ዮህ 18፡15-18፣ 25-27)
69ጴፂሮሲ ጎሊያፔ ካሬና ዲርሳ ጊዶን ኡቲዴዒሺን፥ ኢቲ ኣሺካራታ ኣኮ ያዴ፥ «ኔኒካ ጋሊላ ዬሱሳና ኢቲፔ ዴዓ» ያጋዱ።
70ሺን ኢ ኡንቱንቱ ኡባ ሲንን ሄ ኣሺካራቶ፥ «ኔኒ ጊያዌ ኣዬንቶ ታኒ ኤሪኬ» ያጊዴ ካዴዳ።
71ቃሲ ቢዴ ዲርሳ ፔንጊያኮ ኬሲሺን፥ ሃራ ኣሺካራታ ኣ ቤዓዴ፥ ሄዋን ዴዒያ ኣሳቱዋሲ፥ «ሃ ቢታኒ ናዚሬቲያ ዬሱሳና ዴዔ» ያጋዱ።
72ጴፂሮሲ ላዔንዋ ጫቂዴ፥ «ታኒ ሄዋ ቢታኒያ ኤሪኬ» ያጌዳ።
73ላፋ ጋሚዒሺን፥ ሄዋን ኤቄዳ ኣሳይ ጴፂሮሳኮ ዪዴ፥ «ኔኒካ ቱማ ኡንቱንቱና ኢቲፔ ዴዓ፤ ኣያው ጎፔ፥ ኔኒ ሃሳዪያ ሃሳያይካ ኔና ኤሪሴ» ያጌዲኖ።
74ሄዋፔ ጉዪያን ጴፂሮሲ፥ «ታኒ ሄዋ ቢታኒያ ኤሪኬ!» ያጊዴ፥ ባሬና ሼቃኔ ጫቁዋ ዶሜዳ።
ሄ ዎዴ ኤሌካ ኩቱ ዋሲ ኣጌዳ። 75ጴፂሮሲ ባሬና ዬሱሲ፥ «ኔኒ ኩቱ ዋሳናፔ ካሴ ሄዙ ካላ ታና ካዳናሳ» ጌዳዋ ሃሳዪዴ፥ ካሬ ኬሲዴ፥ ሴሌቲ ዬኬዳ።
Currently Selected:
ማቶሳ 26: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa
