ማቶሳ 22
22
ኣካኔ ጌሉዋ ኦዱዋ ሌሚሱዋ
(ሉቅ 14፡15-24)
1ዬሱሲ ኣሳው ላዔዋ ሌሚሱዋን ሃዋዳን ያጊዴ ሃሳዬዳ፤ 2«ሳሉዋ ካዉቴይ ባሬ ናዓው ማቺያ ኢማናው ኡባባ ማኬዳ ካቲያ ማላ። 3ሄ ካቲ ቡላቻው ኦዲ ዎዳ ኣሳቱዋ ፄሳናው ባሬ ቆማቱዋ ኪቴዳ፤ ሺን ኣሳቱ ያናው ኮዪቤይኪኖ።
4«ቃሲ ሃራ ቆማቱዋ፥ ‹ፄሴቴዳዋንታ፥ «ታኒ ቁማ ጊጊሳዲ፤ ታ ሳንጋቱኔ ታ ሞ ሚያቱ ሹኬቴዲኖ፤ ኡባባይካ ማኬቴዳ። ቡላቻ ሃ ዪቴ» ያጊቴ› ያጊዴ ኪቴዳ። 5ሺን ፄሴቴዳዋንቱ ኮዬናን ኢፂዴ፥ ባሬንቱ ኦሶ ቤዲኖ፤ ኢቱ ባሬ ጎሻው ቢና፥ ዮኩ ባሬ ዛሊዔው ቤዳ። 6ኣቴዳዋንቱ ቃሲ ካቲያ ቆማቱዋ ኦይቂ ዋዴ ዎዲኖ።
7«ካቲ ዳሮ ሃንቄቴዳ፤ ቃሲ ባሬ ዎታዳራቱዋ ዬዲዴ፥ ሄ ሼምፑዋ ዎዳዋንታ ዎሲዴ፥ ኡንቱንቱ ካታማ ጉዲሴዳ። 8ሄዋፔ ጉዪያን፥ ባሬ ቆማቱዋ፥ ‹ቡላቻይ ማኬቴዳ፤ ሺን ፄሴቴዳዋንቱ ቡላቻው ቤሲያ ኣሳ ጊዲኪኖ። 9ሄዋ ዲራው፥ ዎጋ ቃ ቢዴ፥ ሂንቴንቱ ዴሜዳ ኣሳ ኡባ ቡላቻው ፄሲቴ› ያጌዳ። 10ሄ ቆማቱ ቃ ቢዴ፥ ባሬንቱ ዴሜዳ ኣሳ ኡባ ሎዑዋ ኢታ ሺሺዴ፥ ቡላቻ ዳሲያ ኩንዲኖ።
11«ሺን ካቲ ቁማ ማናው ኡቴዳ ኣሳ ቤዓናው ጌሌዳ ዎዴ፥ ቡላቻ ማዩዋ ማዪቤና ኢቲ ቢታኒያ ሄዋን ቤዒዴ፥ 12‹ታ ላጌው፥ ቡላቻ ማዩዋ ማዬናን ዋናዴ ሃዋ ጌላዲ?› ያጊና ቢታኒ ጮዑ ጌዳ።
13«ሄዋፔ ጉዪያን፥ ካቲ ባሬ ቆማቱዋ፥ ‹ሃ ቢታኒያ ኩሺያኔ ጌዲያ ቃቺዴ፥ ካሬ ማ ኬሲ ኦሊቴ፤ ኢ ሄዋን ዬካናኔ ኣቻ ቃና› ያጌዳ።
14«ኣዪሲ ጎፔ፥ ፄሴቴዳዋንቱ ዳራ፤ ሺን ዶሬቴዳዋንቱ ጉ» ያጌዳ።
ጊራ ዎቲ ጊራኔንቶ ኦቼዳ ኦሻ
(ማር 12፡13-17፤ ሉቅ 20፡20-26)
15ሄዋፔ ጉዪያን፥ ፓሪሳዋቱ ቢዴ፥ ኣ ሃሳያፔ ባላ ዴሚዴ፥ ኣ ኦይቃና ማላ ማቄቴዲኖ። 16ቃሲ ባሬንታ ካሊያዋንቱፔኔ ሄሮዲሳ ባጋቱዋፔ ኣማሬዳዋንታ ኣኮ ኪቴዲኖ። ኡንቱንቱ፥ «ታማሪሲያዎ፥ ኔኒ ቱሙዋ ሃሳዪያዋኔ ፆሳ ኦጊያ ቱማቴን ታማሪሲያዋ ኑኒ ኤሬቶ፤ ኣያው ጎፔ፥ ኔኒ ኣሳፔ ኣሳ ሻካካኔ ዱማያካ። 17ኔ ቆፋይ ኣዬንቶ ኑሲ ኦዳ፤ ኑኒ ሮሜ ጋዲያ ካቲያ ቄሳሬው ጊራ ጊሪያዌ ዎጌዬ ዎጋ ጊዴኔ?» ያጌዲኖ።
18ሺን ዬሱሲ ኡንቱንቱ ኢታ ቆፋ ኤሪዴ፥ «ሃ ሎዓ ማላቲያ ኢታ ኣሳቶ፥ ኣያው ታና ፓጪቴ? 19ጊራ ጊሪያ ሚሻ ታና ቤሲቴ» ያጌዳ። ሄዋፔ ጉዬ ኡንቱንቱ ቢራ ሳንቲሚያ ኣው ኣሄዲኖ። 20ኢ፥ «ሃ ማላይኔ ሱንይ ኦዌ?» ያጌዳ።
21ሄዋፔ ሲሚዴ ኡንቱንታ ኦቺና፥ ኡንቱንቱ፥ «ሮሜ ጋዲያ ካቲያ ቄሳሬዋ» ያጌዲኖ።
ሄዋፔ ጉዪያን፥ ዬሱሲ ኡንቱንታ፥ «ያቶፔ፥ ቄሳሬዋ ቄሳሬሲ፥ ፆሳዋ ፆሳሲ ኢሚቴ» ያጌዳ። 22ኡንቱንቱ ሄዋ ሲሴዳ ዎዴ፥ ማላሌቲዴ ኣ ኣጊዴ ቤዲኖ።
ሃይቄዳዋንቱ ዴንዱዋባ
(ማር 12፡18-27፤ ሉቅ 20፡27-40)
23ሃይቄዳ ኣሳይ ዴንዴና ጊያ ሳዱቃዋናቱዋፔ ኢቲ ኢቲ ኣሳቱ ሄ ጋላሲ ዬሱሳኮ ዪዴ፥ ሃዋዳን ያጊዴ፥ ኣ ኦቼዲኖ፤ 24«ታማሪሲያዎ፥ ሙሴ፥ ‹ኢቲ ኣሳይ ናዓ ዬሌናን ሃይቆፔ፥ ሄ ሃይቄዳዋ ኢሻይ ኣ ማቻቶ ላቲዴ፥ ባሬ ኢሻው ናዓ ዬላናው ቤሴ› ያጌዳ። #ዛር 25፡5 25ኑናና ላፑ ኢሻቱ ዴዒኖ፤ ባይራይ ማቻቶ ኣኪዴ፥ ናዓ ዬሌናን ሃይቄዳ፤ ሄዋፔ ጉዪያን ኣ ማቻቶ ኣ ኢሻይ ኣኬዳ። 26ቃሲ ላዔያዌካ ሃይቄዳ፤ ሄዜያዌካ፥ ላፑን ጋካናዉካ ሄዋዳን ሃኔዲኖ። 27ኡባፔ ጉዪያን፥ ሄ ሚሺራታ ሃይቃዱ። 28ያቲና፥ ሃይቄዳ ኣሳይ ሃይቁዋፔ ዴንዲያ ጋላሲ ሄ ሚሺራታ ላፑናቱዋፔ ሃቃዎ ማቼ ጊዳኔ? ኣዪሲ ጎፔ፥ ላፑናቱ ኡባይካ ኢዞ ኣኬዲኖ» ያጌዲኖ።
29ዬሱሲ ዛሪዴ፥ ሃዋዳን ያጌዳ፤ «ፆሳ ማፃፋቱዋ ዎይ ኣ ዎልቃ ሂንቴንቱ ኤሬና ዲራው ባሊታ። 30ኣዪሲ ጎፔ፥ ሃይቄዳ ኣሳይ ሃይቁዋፔ ዴንዲያ ጋላሲ፥ ሳሉዋን ዴዒያ ኪታንቻቱዋ ማላ ጊዳናፔ ኣቲን፥ ኣቱማ ኣሳይኔ ኣኬና፤ ማጫ ኣሳይኔ ጌሌና። 31-32ሺን ሃይቄዳዋንቱ ዴንዱዋባ ጊዶፔ፥ ፆሳይ፥ ‹ታኒ ኣብራሃሜ ፆሳ፥ ዪሳቃ ፆሳ፥ ያዪቆባ ፆሳ› ያጊዴ ሂንቴው ኦዴዳዋ ኡባካ ናባቢቤይኪቴ? ፆሳይ ፓፃ ዴዒያዋንቱ ፆሳ ጊዲያዋፔ ኣቲን፥ ሃይቄዳዋንቱ ፆሳ ጊዴና» ያጌዳ። #ኬስ 3፡6
33ዳሮ ኣሳይ ሄዋ ሲሲዴ፥ ኣ ቲሚርቲያን ማላሌቴዲኖ።
ኡባፔ ኣያ ኣዛዙዋ
(ማር 12፡28-34፤ ሉቅ 10፡25-28)
34ሺን ዬሱሲ ሳዱቃዋናቱዋ ጮዑ ኦዳዋ ፓሪሳዋቱ ሲሴዳ ዎዴ፥ ኢቲሳ ሺቄዲኖ። 35ኡንቱንቱ ጊዶፔ ሂጊያ ታማሪሲያ ኢቱ፥ ዬሱሳ ፓጫናው ኢቲባ ኦቼዳ። 36«ታማሪሲያዎ፥ ሂጊያ ጊዱዋን ኡባፔ ኣያ ኣዛዙ ሃቃዌ?» ያጊዴ ኣ ኦቼዳ።
37ዬሱሲ ዛሪዴ፥ ሃዋዳን ያጌዳ፤ « ‹ኔኒ ጎዳ ኔ ፆሳ ኔ ኩሜን ዎዛናፔ፥ ኔ ኩሜን ሼምፑዋፔ፥ ኔ ኩሜን ቆፋፔ ሲቃ› ያጌዳ። #ዛር 6፡5 38ሄዌ ኡባፔ ዳሪያ ኣዛዙዋኔ ቃሲ ኡባፔ ኣያ ኣዛዙዋ። 39ቃሲ ላዔያ ኣዛዙካ ኣ ማላ፤ ሄዌ፥ ‹ኔኒ ኔ ሾሩዋ ኔ ሁጲያዳን ሲቃ› ጊያዋ። #ዎግ 19፡18 40ሙሴ ሂጊያ ኡባይኔ ናባቱዋ ቲሚርቲ ሃ ላዑ ኣዛዛቱዋን ቃሼቴ» ያጌዳ።
ኪሪስቶሳባ ኦቼዳ ኦሻ
(ማር 12፡35-37፤ ሉቅ 20፡41-44)
41-42ፓሪሳዋቱ ኢቲሳ ሺቄዳሳን ዬሱሲ ኡንቱንታ፥ «ኪሪስቶሳባ ዋጊዴ ቆፒቴ? ኢ ኦ ናዔ?» ያጊዴ ኦቼዳ።
ኡንቱንቱ፥ «ኪሪስቶሲ ዳዊታ ናዓ» ያጌዲኖ።
43ዬሱሲ ኡንቱንታ፥ «ያቲና፥ ዳዊቴ ባሬና ጌሻ ኣያናይ ሃሳዪሲና ኪሪስቶሳ ዋጊዴ፥ ‹ጎዳ› ጊዴ ፄሲ? ቃሲካ ዳዊቴ፥
44‹ጎዳይ ታ ጎዳ፥
«ታኒ ኔ ሞርኬቱዋ ኔኒ ዬ ኤቂያዋ ኦና ጋካናው፥
ሃዋን ታፔ ኡሼቻ ባጋና ኡታዴ ታናና ኢቲፔ ዳናታ» ጌዳ›
ያጌዳ። #ማዝ 110፡1 45ዳዊቴ ኪሪስቶሳ፥ ‹ጎዳ› ጊዴ ፄሶፔ፥ ያቲና፥ ኪሪስቶሲ ዋኒዴ ዳዊታ ናዓ ጊዲ?» ያጌዳ።
46ዬሱሳው ኢቲ ቃላ ዛራናው ዳንዳዬዳ ኢቲ ኣሳይኔ ባዋ፤ ቃሲ ሄ ጋላሳፔ ዶሚና፥ ሃራ ኦሻ ኣ ኦቻናው ፃሌዳዌ ኦኒኔ ባዋ።
Currently Selected:
ማቶሳ 22: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa
