ማቶሳ 21
21
ዬሱሲ ዎልቃማ ቦንቹዋን ዬሩሳላሜ ጌሌዳ
(ማር 11፡1-11፤ ሉቅ 19፡28-40፤ ዮህ 12፡12-19)
1ኡንቱንቱ ዬሩሳላሜ ማቲዴ፥ ዴብሬ ዛይቴ ጌቴቲያ ዴሪያ ላንቂያን ዴዒያ ቤቴፋጌ ጌቴቲያ ቄሪ ካታማ ጋኬዲኖ፤ ዬሱሲ ባሬና ካሊያዋንቱፔ ላዑዋ ሲንው ኪቲዴ፥ 2ኡንቱንታ ሃዋዳን ያጌዳ፤ «ሂንቴንቱፔ ሲንን ዴዒያ ቄሪ ካታማ ቢቴ፤ ሄዋን ኢቲ ሃራታ ቃሹዋን ዴዔዉኖ ኢዚ ማራና ሂንቴንቱ ቢ ሲሞ ሳንካ ዴማኒታ፤ ኡንቱንታ ቢሊዴ፥ ታው ኣኪ ዪቴ። 3ኦኒኔ ሂንቴንታ ኦቾፔ፥ ‹ጎዳይ ሃዋንታ ኮዬ› ያጊቴ፤ ኤሌካ ኢ ኡንቱንታ ዬዲ ኣጋናዋ።» #21፡3 ጎዳይ፡ ሃራቱዋ ጎዳ ጉሳ። 4-5ቲምቢቲያ ኦዲያ ናቢ፥
«ፂዮኔ ካታማ ኣሳው፥
‹ቤዓ፥ ኔ ካቲ ኣሺኬ ጊዲዴ፥
ሃሪያ ቦላ፥ ሃሬ ማራ ቦላ ኡቲዴ፥
ኔኮ ዬ› ያጊቴ»
ያጊዴ ሃሳዬዳዌ ፖሌታና ማላ፥ ሃዌ ሃኔዳ። #ዛክ 9፡9
6ኣ ካሊያዋንቱ ቢዴ፥ ዬሱሲ ባሬንታ ኣዛዞዋዳን ኦዲኖ። 7ሃራቶኔ ሃሬ ማራ ኣሂዴ፥ ባሬንቱ ማዩዋ ኡንቱንቱ ዞኪያን ዎዲኖ፤ ሄዋፔ ሲሚና ዬሱሲ ቶጌዳ። 8ሄ ጮራ ኣሳፔ ዳሪያ ባጋይ ባሬ ማዩዋ ኦጊያን ሂፄዳ፤ ቃሲ ሃራንቱ ሚ ሃይ ካር ካሪዴ፥ ኦጊያን ዬጌዲኖ። 9ዬሱሳፔ ሲንና ሃሜቲያ ጮራ ኣሳይኔ ቃሲ ኣ ጌዱዋ ካሊያ ጮራ ኣሳይ፥ ባሬንቱ ኮሻ ቁ ኦዴ፥
«ዳዊታ ናዓይ ጋላቴቶ!
ጎዳ ሱንን ዪያዌ ኣንጄቴዳዋ!
ፆሳይ ጋላቴቶ!»
ያጌዳ። #ማዝ 118፡25፣ 26
10ዬሱሲ ዬሩሳላሜ ካታማ ጌሌዳ ዎዴ፥ ካታማን ዴዒያ ኣሳይ ኡባይ፥ «ሃዌ ኦኔ?» ያጊዴ ሻቢሬቴዲኖ።
11ኣሳይ፥ «ሃዌ ጋሊላን ዴዒያ ናዚሬቴ ጌቴቲያ ካታማፔ ዬዳ ናቢያ ዬሱሳ» ያጌዳ።
ዬሱሲ ጌሻ ጎሊያ ጌሌዳ
(ማር 11፡15-19፤ ሉቅ 19፡45-48፤ ዮህ 2፡13-22)
12ዬሱሲ ጌሻ ጎሊያ ጌሊዴ፥ ሄዋን ዛሊዒያዋንታኔ ሻሚያዋንታ ኡባ ካሬ ዬዴርሴዳ፤ ቃሲ ሚሻ ላሚያዋንቱ ፃራጴዛኔ ዶጎሙዋ ዛሊዒያዋንቱ ኦይዲያ ጉጲ ዬጊዴ፥ 13ኡንቱንታ፥ «ፆሳ ማፃፋን፥ ‹ታ ጎሊ ፆሳ ዎሲያ ጎሊያ ጌቴታና› ያጌቲዴ ፃፌቲ ኡቴዳ፤ ሺን ሂንቴንቱ ኣ ቦንቂያዋንቱ ቆሴቲያ ጎንጎሉዋ ኬሴዲታ» ያጌዳ። #ኢሳ 56፡7፤ ኤርም 7፡11
14ቆቃቱኔ ጌዲ ሲሌዳዋንቱ ዬሱሳኮ ጌሻ ጎሊያ ዪና፥ ኢ ኡንቱንታ ፓዳ። 15ሺን ቄሳቱዋ ካፓቱኔ ሂጊያ ታማሪሲያዋንቱ ዬሱሲ ኦያ ኦራባ ቤዔዳ ዎዴኔ፥ ጉ ናናይ ጌሻ ጎሊያን ባሬንቱ ኮሻ ቁ ኦዴ፥ «ዳዊታ ናዓይ ጋላቴቶ» ያጊያዋ ቤዔዳ ዎዴ ሃንቄቴዲኖ።
16ያቲዴ ዬሱሳ፥ «ሃዋንቱ ጊያዋ ሲሳይ?» ያጌዲኖ። #ማዝ 8፡2
ዬሱሲ፥ «ኤ ሲሳይ፤ ፆሳ ማፃፋይ፥ ‹ጉ ናናይኔ ሚያ ናናይ ኔና ጋላታና ማላ፥ ኡንቱንታ ኤሪሳዳ› ያጊያዋ ኡባካ ናባቢቤይኪቴ?» ያጌዳ። 17ዬሱሲ ኡንቱንታ ኣጊዴ፥ ሄ ካታማፔ ቢታኒያ ጌቴቲያ ካታማ ቢዴ፥ ያኒ ኣቄዳ።
ኣይፊ ዬዳ ባላሲያ ሚቶ
(ማር 11፡12-14፣ 20-24)
18ዬሱሲ ዎንታ ጉራና ካታማ ቤዳ ዲራው ኮሻቴዳ። 19ኦጊያ ዶናን ኢቲ ባላሲያ ጌቴቲያ ሚቶ ቤዒዴ፥ ኢኮ ቤዳ፤ ቢ ጋኪያ ዎዴ ሄ ሚቲን ሃይ ፃላላፔ ኣቲን፥ ኣይፊያ ኣይኔ ዴሚቤና፤ ኢዞ፥ «ላዔዋ ሜናዉካ ኣይፎፓ» ያጊና፥ ሄ ባላሳታ ማንዒያን ሜላ ኣጋዱ።
20ኣ ካሊያዋንቱ ሄዋ ቤዒዴ ማላሌቲዴ፥ «ሃ ባላሳታ ዋናዴ ኢቲ ኩን ሜላ ኣጋዴ?» ያጌዲኖ።
21ዬሱሲ ዛሪዴ፥ «ታኒ ሂንቴንቶ ቱሙዋ ጋይ፤ ሂንቴንቱ ኣማኑ ዴዒያዋንታኔ ሲናዋንታ ጊዶፔ፥ ሃ ባላሳቶ ታኒ ኦዳዋ ማላ ፃላላ ኦኪታ፤ ሺን ሃራይ ኣቶ ሂንቴንቱ ሃ ዴሪያ፥ ‹ዴንዳዴ ኣባን ኩንዳ› ጊንቶካ ሃናና፤ 22ሂንቴንቱ ኣማኒዴ ፆሳ ዎሲያዋ ኣያ ጊዲንቶካ ኣካና» ያጌዳ።
ዬሱሳ ማታይ ዬዳሳ
(ማር 11፡27-33፤ ሉቅ 20፡1-8)
23ዬሱሲ ጌሻ ጎሊያ ዪዴ ታማሪሲሺን፥ ቄሳቱዋ ካፓቱኔ ኣዪሁዳ ጪማቱ ኣኮ ዪዴ፥ «ኔኒ ሃዋ ኦናው ኔው ኣይ ማታይ ዴዒ? ኔው ሃ ማታ ኦኔ ኢሜዳዌ?» ያጌዲኖ።
24ዬሱሲ ዛሪዴ ኡንቱንታ፥ «ታኒካ ሂንቴንታ ኢቲባ ኦቻና፤ ሂንቴንቱ ታው ሄዋ ኦዶፔ፥ ታኒ ሃዋ ኣይ ማታኒ ኦይታንቶ፥ ሂንቴንቶ ኦዳና፤ 25ዮሃኒሲ ፃማቂያ ማታይ ሃቃፔ ዬዴ? ፆሳፔ ዬዴዬ ኣሳፔ ዬዴ?» ያጌዳ።
ኡንቱንቱ ባሬንቱ ጊዱዋን ፓሉማ ዶሚዴ፥ «ኑኒ፥ ‹ፆሳፔ ዬዳ› ያጎፔ ኢ ኑና፥ ‹ያቶፔ፥ ዮሃኒሲ ኦዴዳዋ ኣያው ኣማኒቤይኪቴ?› ያጋናዋ። 26ሺን ኑኒ፥ ‹ኣሳፔ ዬዳ› ያጎፔ፥ ኣሳይ ኡባይ ዮሃኒሲ ናቢያ ጊዴዳዋ ኤሪያ ዲራው፥ ኣሳው ያዬቶ» ያጌዲኖ። 27ኡንቱንቱ ዬሱሳው፥ «ኑኒ ኤሮኮ» ያጊዴ ዛሬዲኖ።
ዬሱሲ፥ «ታኒካ ሃዋ ኣይ ማታኒ ኦይታንቶ፥ ሂንቴንቶ ኦዲኬ» ያጌዳ።
ላዑ ናና ሌሚሱዋ
28«ሺን ሂንቴንቱ ኣያ ቆፒቴ? ላዑ ናናይ ዴዒያ ኢቲ ቢታኒ ዴዔ፤ ሄ ቢታኒ ባይራ ናዓኮ ቢዴ፥ ‹ታ ናዓው፥ ሃቼ ባዴ ታ ዎዪኒያ ቱራ ኦ› ያጌዳ። 29ናዓይ ዛሪዴ፥ ‹ቢኬ› ጌዳ፤ ሺን ጉዬፔ ባሬ ዎዛናን ቆፒ ኣኪዴ፥ ዎዪኒያ ቱራ ኦናው ቤዳ። 30ኣዉ ዮኮ ናዓኮ ቢዴ፥ ባይራው ጌዳዋዳንካ ኣው ጌዳ፤ ቴፋ ናዓይ ዛሪዴ፥ ‹ሎዓ ታ ጎዳው› ያጌዳ፤ ሺን ቢቤና። 31ሃ ላዑ ናናፔ ባሬ ኣዉ ኮዬዳዋ ኦዳዌ ሃቃዌ?» ያጌዳ።
ኡንቱንቱ፥ «ባይራ» ያጌዲኖ።
ዬሱሲ ኡንቱንታ ሃዋዳን ያጌዳ፤ «ታኒ ሂንቴንቶ ቱሙዋ ጋይ፤ ቃራፃ ኣኪያዋንቱኔ ዎሹሚያዋንቱ ሂንቴፔ ሲንቲዴ፥ ፆሳ ካዉቴ ጌላና። 32ኣዪሲ ጎፔ፥ ፃማቂያ ዮሃኒሲ ፂሎቴ ኦጊያ ታማሪሲዴ፥ ሂንቴኮ ዪና፥ ኢ ጊያዋ ኣማኒቤይኪታ። ሺን ቃራፃ ኣኪያዋንቱኔ ዎሹሚያዋንቱ ኢ ጊያዋ ኣማኔዲኖ፤ ሂንቴንቱ ሃራይ ኣቶ ሄዋ ቤዒዲካ፥ ሂንቴንቱ ናጋራፔ ሲሚዴ፥ ኢ ጊዪያዋ ኣማኒቤይኪታ» ያጌዳ።
ዎዪኒያ ቱራ ጊዶን ኦያ ጎሻንቻቱዋ ሌሚሱዋ
(ማር 12፡1-12፤ ሉቅ 20፡9-19)
33ቃሲካ ዬሱሲ ሃዋዳን ያጌዳ፤ «ሃራ ሌሚሱዋካ ሲሲቴ፤ ዎዪኒያ ጌቴቲያ ቱራ ቶኬዳ ኢቲ ቢታኒ ዴዔ፤ ዎዪኒያ ቱራ ዩሺ ኣዴ ዲሬዳ፤ ቃሲ ሄ ዎዪኒያ ጉሚዒያ ኦላካ ቦኬዳ፤ ሄዋ ናጊያ ኣሳው ኣዱሳ ሹቻ ጊምቤዳ። ሄዋፔ ጉዪያን፥ ኮ ኦያ ኣሳው ኢሚዴ፥ ሃራ ጋዴ ቤዳ። #ኢሳ 5፡1-2 34ዎዪኒያ ኣይፊያ ማፂያ ዎዲ ጋኪና፥ ባሬና ጋኪያዋ ኣኪዴ ያና ማላ፥ ባሬ ቆማቱዋ ባሬ ኮዋቱዋኮ ኪቴዳ። 35ኮዋቱ ኣ ቆማቱዋ ኦይቂዴ፥ ኢቱዋ ዎዲኖ፤ ቃሲ ዮኩዋ ሹቻን ጳልቄዲኖ። 36ቃሲካ ሄ ቢታኒ ካሴዋንቱፔ ዳሪያ ሃራ ቆማቱዋ ኪቴዳ፤ ኮዋቱ ሄ ቆማቱዋካ ካሴዋንቱዋዳን ኦዲኖ።
37«ሺን ዉርሴን ኢ፥ ‹ታ ናዓ ኡንቱንቱ ቦንቻናዋንታ› ያጊዴ ባሬ ናዓ ኡንቱንቱኮ ኪቴዳ።
38«ሺን ኮዋቱ ናዓ ቤዒዴ፥ ባሬንቱ ጊዱዋን፥ ‹ጋዲያ ላታናዌ ሃዋ፤ ቢዴ ኣ ዎዴ፥ ጋዲያ ኑኒ ላታና› ያጌዲኖ። 39ናዓ ኦይቂዴ፥ ዎዪኒያ ቱራ ጊዶፔ ጋፃ ኬሲዴ ዎዲኖ።
40«ሲሚ ዎዪኒያ ቱራ ጎዳይ ዪያ ዎዴ፥ ሄ ኮዋቱዋ ዎታኔ?» ያጊዴ ኦቼዳ።
41ኡንቱንቱ፥ «ኢ ሄ ኢታ ኣሳቱዋ ዎ ዉርሲዴ፥ ዎዪኒያ ቱራይ ኣይፊያ ዎዴ ባሬና ጋኪያዋ ዎዲያን ሼያ ሃራ ኮዋቱዋሲ ኢማና» ያጌዲኖ።
42ዬሱሲ ኡንቱንታ ሃዋዳን ያጌዳ፤
« ‹ጊምቢያዋንቱ ካዴ ኢፄዳ ሹቻይ
ጎዳ ፃጱዋ ሚኒሲያ፥ ኡባፔ ኣያ ሹቻ ጊዴዳ።
ሃዌ ጎዳይ ኦዳዋ፤
ቃሲ ኑ ፄላዉካ ማላሊሲያዋ›
ያጊያዋ ፆሳ ማፃፋፔ ኡባካ ናባቢቤይኪቴ? #ማዝ 118፡22-23
43«ሄዋ ዲራው፥ ታኒ ሂንቴንቶ ኦዳይ፤ ፆሳ ካዉቴይ ሂንቴፔ ኣኬቲዴ፥ ሎዖ ኣይፊያ ኢሚያ ኣሳው ኢሜታናዋ። 44ሄ ሹቻ ቦላ ኩንዲያ ኡባይ ሜዔሬታና፤ ቃሲ ሄ ሹቻይ ኣሳ ቦላ ኩንዶፔ፥ ሄ ኩንዴዳ ኡራ ሊቂሳና» ያጌዳ።
45ቄሳቱዋ ካፓቱኔ ፓሪሳዋቱ ዬሱሲ ኦዴዳ ሌሚሱዋ ሲሴዳ ዎዴ፥ ባሬንቱዋ ሃሳዪያዋ ኤሬዲኖ። 46ኡንቱንቱ ዬሱሳ ኦይቃናው ኮዬዲኖ፤ ሺን ዬሱሳ ዳሮ ኣሳይ ናቢያ ጊዴ ቆፒ ኡቴዳ ዲራው፥ ሄ ኣሳው ያዬዲኖ።
Currently Selected:
ማቶሳ 21: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa
