Markhus 2

Al-Masiih khafar le l-maʼduur zunuubah

1Wa baʼadeen, Isa gabbal fi hillit Kafar Naahuum. Wa l-naas simʼo kadar hu gaaʼid. 2Wa naas katiiriin jo lammo foogah wa l-beet anmala lahaddi khachum al-baab wa ma faddal bakaan le naadum yagood foogah. Wa Isa gaaʼid yikallim leehum be l-bichaara. 3Wa arbaʼa rujaal jo leyah chaayliin naadum mukarsah. 4Wa ma gidro yigarrubu le Isa be sabab al-naas al-katiiriin al-saddo leehum al-derib. Wa achaan da, rikbo fi raas al-beet wa gaddooh wa sawwo fatiig foog le l-bakaan al-Isa gaaʼid foogah. Wa khalaas dallo al-mukarsah be furaachah fi lubb al-beet. 5Wa Isa chaaf iimaanhum wa hajja le l-raajil al-mukarsah wa gaal : «Ya wileedi, zunuubak ankhafaro».

6Wa fi ulama waahidiin fi lubb al-beet. Fakkaro fi guluubhum wa gaalo : 7«Kikkeef yihajji kalaam ma adiil misil da ? Da kalaam kufur. Al-insaan ma yagdar yakhfir zunuub al-insaan, illa Allah». 8Wa tawwaali Isa irif fikirhum al-fi guluubhum. Wa saʼalaahum wa gaal : «Maala tifakkuru fi guluubku misil da ? 9Weenu al-hayyin nuguulah le l-maʼduur ? Nuguul : ‹Zunuubak ankhafaro› walla nuguul : ‹Gumm chiil furaachak wa ruukh› ? 10Wa laakin nidoor intu taʼarfu kadar ana, Ibn al-Insaan, indi sulta fi l-ard achaan nakhfir le l-naas zunuubhum». Wa gaal le l-mukarsah : 11«Nuguul leek gumm chiil birchak wa amchi beetak».

12Wa tawwaali al-raajil al-mukarsah gamma foog wa chaal birchah wa marag giddaamhum. Wa kulla l-naas alʼajjabo wa gammo yachkuru Allah. Wa gaalo : «Abadan ma chifna cheyy misil da».

Al-Masiih naada Laawi

13Wa Isa marag battaan wa macha fi khachum al-bahar. Wa naas katiiriin jo leyah wa hu allamaahum. 14Wa fi ruwaakhtah, hu chaaf naadum waahid usmah Laawi wileed Halfa al-gaaʼid yakhdim fi maktab al-daraayib. Wa Isa gaal leyah : «Taʼaal taabiʼni». Wa khalaas Laawi gamma foog wa taabaʼah.

15Wa Isa macha fi beet Laawi wa alʼachcha maʼaayah. Wa fi naas hana daraayib katiiriin wa muznibiin aakhariin gaaʼidiin yaakulu maʼa Isa wa talaamiizah, achaan naas katiiriin minhum gaaʼidiin yitaabuʼuuh. 16Wa ulama waahidiin min al-Fariiziyiin chaafo Isa yaakul maʼa l-muznibiin wa naas al-daraayib. Wa saʼalo talaamiizah wa gaalo : «Maala yaakul maʼa naas al-daraayib wa l-muznibiin ?»

17Wa Isa simiʼ kalaamhum wa gaal : «Al-naas al-taybiin ma hawjaaniin daktoor, illa l-mardaaniin bas. Ana ma jiit achaan ninaadi al-saalihiin laakin jiit le ninaadi al-muznibiin le l-tooba.»

Al-Masiih saʼalooh min al-siyaam

18Wa fi wakit talaamiiz Yahya wa l-Fariiziyiin saaymiin, naas waahidiin macho le Isa saʼalooh wa gaalo : «Talaamiiz Yahya wa talaamiiz al-Fariiziyiin yusuumu. Wa maala talaamiizak inta ma yusuumu ?» 19Wa Isa radda leehum wa gaal : «Kan naas gaaʼidiin fi iris wa l-ariis maʼaahum, humman yusuumu walla ? La ! Akiid humman ma yusuumu kan al-ariis lissaaʼ gaaʼid maʼaahum. 20Wa laakin yaji yoom waahid al-ariis yichiiluuh minhum wa khalaas fi l-wakit daak, yusuumu.

21«Ma fi naadum al-yargaʼ khalag gadiim be gitʼe jadiide. Kan naadum yisawwi misil da, al-rugʼa al-jadiide di ticharrit al-khalag al-gadiim wa l-gadd yabga ziyaada min awwal. 22Wa ma fi naadum yusubb khamar jadiid fi girbe gadiime. Wa kan yisawwi misil da, al-khamar al-jadiid yuchugg al-girbe wa l-khamar yidaffig wa l-girbe tatlaf. Wa laakin al-khamar al-jadiid yusubbuuh illa fi girbe jadiide».

Suʼaal fi churuut yoom al-sabt

23Wa yoom waahid, Isa raayikh fi ust al-ziraaʼa maʼa talaamiizah. Wa da yoom al-sabt wa talaamiizah gammo yagtaʼo min ganaadiil al-gameh. 24Wa l-Fariiziyiin chaafoohum wa saʼalo Isa wa gaalo leyah : «Maala humman gaaʼidiin yisawwu al-khidme al-ma halaala fi yoom al-sabt ?»

25Wa Isa radda leehum wa gaal : «Ma gareetu fi l-Kitaab al-cheyy al-Dawuud sawwaah wakit hu wa jamaaʼtah jiiʼaaniin wa hawjaaniin walla ? 26Wa fi wakit Abiyaatar kabiir rujaal al-diin, Dawuud dakhal fi beet Allah. Wa akal al-khubza al-gaddamooha al-naas le Allah.#2:26 akal al-khubza al-gaddamooha le Allah Al-taariikh da talgooh fi 1 Samuwiil 21:2-7. Wa da ma halaal le ayyi naadum illa le rujaal al-diin. Wa Dawuud anta minha le jamaaʼtah wa humman kula akalo».

27Wa Isa gaal leehum : «Allah khalag yoom al-sabt le l-insaan. Wa ma khalag al-insaan le yoom al-sabt. 28Wa Ibn al-Insaan hu Rabb yoom al-sabt wa ana bas hu».

Currently Selected:

Markhus 2: ADT19

Highlight

Copy