Markhus 3

Al-Masiih chafa naadum fi yoom al-sabt

1Wa Isa dakhal battaan fi beet al-sala. Wa naadum waahid iidah mayte gaaʼid daakhal. 2Wa naas waahidiin khatto baalhum fi Isa achaan yidooru yichiifu kan hu yachfiih walla la. Fi fikirhum, kan hu yachfi naadum fi yoom al-sabt, da yabga leehum fursa achaan yukhuttu foogah tuhma.

3Wa khalaas Isa hajja le l-raajil al-iidah mayte wa gaal : «Gumm foog giddaam al-naas». 4Wa Isa saʼalaahum wa gaal : «Chunu al-halaal fi yoom al-sabt ? Al-kheer walla l-charr ? Halaal leena ninajju al-naas walla naktuluuhum ?»

Wa humman ma raddo leyah cheyy. 5Wa hu allaffat fi usuthum be khadab wa hizin achaan ruuseehum gawiyiin. Wa hajja le l-raajil wa gaal : «Midd iidak». Wa l-raajil maddaaha wa khalaas iidah achchaafat marra waahid. 6Wa l-Fariiziyiin marago wa tawwaali achchaawaro maʼa naas hana hizib Hiruudus fi chaan kikkeef yaktulu Isa.

Naas katiiriin taabaʼo Isa

7Wa Isa gamma maʼa talaamiizah wa macha fi khachum al-bahar. Wa naas katiiriin marra waahid min daar al-Jaliil taabaʼooh. Wa fi naas min daar al-Yahuudiiya kula 8wa min Madiinat al-Khudus wa daar Adoom wa l-buldaan al-khaadi le bahar al-Urdun wa min turaab hana Suur wa Seeda. Wa l-naas dool jo leyah achaan simʼo khabar hana l-cheyy al-Isa gaaʼid yisawwiih. Wa adad al-naas bigi katiir marra waahid.

9Wa Isa amar talaamiizah yijahhuzu leyah markaba achaan yamrug min al-muʼaasara. 10Wa Isa chafa naas mardaaniin katiiriin wa fi chaan da, kulla l-naas al-mardaaniin gaaʼidiin yilʼaasaro wa yidooru yalhagooh wa yalmasooh. 11Wa ayyi naadum al-indah cheetaan sajad giddaam Isa wakit chaafah. Wa kulla l-chawaatiin aato wa gaalo : «Inta bas Ibn Allah.» 12Wa Isa amaraahum be chidde achaan ma yiʼooru al-naas hu yaatu.

Al-Masiih azal al-rusul al-atnaachar

13Wa Isa talaʼ fi l-hajar wa naada al-naas al-hu yidoorhum wa humman macho leyah. 14Wa azal minhum 12 raajil wa sammaahum rusul le yagoodu maʼaayah wa le yirassilhum le yiballukhu al-bichaara. 15Wa le yantiihum gudra achaan yaturdu al-chawaatiin. 16Wa l-atnaachar dool humman Simʼaan al-Isa sammaah Butrus 17wa Yaakhuub wileed Zabadi wa Yuuhanna akhu Yaakhuub wa Isa samma awlaad Zabadi dool Buwaan Arjis maʼanaatah awlaad al-dagdaag. 18Wa azal Andareeyas wa Filibbus wa Bartulma wa Matta wa Tuuma wa Yaakhuub wileed Halfa wa Taddaaya wa Simʼaan al-Sawri 19wa Yahuuza al-Iskhariyooti hu al-naadum al-yukhuun Isa.

Gaalo gudurtah min Ibliis

20Wa Isa macha al-beet. Wa battaan naas katiiriin marra waahid macho leyah lahaddi Isa wa talaamiizah ma ligo fursa hatta le yaakulu kula. 21Wa akhwaan Isa simʼo be l-khabar da wa gammo le yakurbuuh. Wa gaalo : «Hu raasah laffa khalaas.» 22Wa l-ulama al-jo min madiinat al-Khudus gaalo : «Ibliis karabah. Hu yatrud al-chawaatiin be gudrat kabiir al-chawaatiin».

23Wa Isa naadaahum wa hajja leehum be amsaal wa gaal : «Kikkeef Cheetaan yatrud Cheetaan ? 24Kan naas hana mamlaka yiddaawaso ambeenaathum, al-mamlaka di ma tagood saabte. 25Wa kan naas hana beet waahid wa yiddaawaso ambeenaathum, al-beet da, ma yagood saabit. 26Wa be misil da, kan al-Cheetaan yidaawis nafsah, hu yinfarig wa ma yagood saabit battaan wa khalaas tintahi marra waahid. 27Wa laakin ma fi naadum al-yadkhul fi beet raajil gawi wa yanhab khumaamah illa kan awwal rabat al-raajil al-gawi da. Wa kan rabatah khalaas, akiid yagdar yanhab kula khumaamah.

28«Wa nuguul leeku al-hagg. Allah yakhfir le l-naas kulla zunuubhum wa kulla kalaam al-kufur al-yuguuluuh 29laakin kan ayyi naadum yihajji kalaam kufur fi l-Ruuh al-Khudduus, al-zanib da abadan ma yinkhafir. Hu bigi khaati be zanib al-yagood fi raasah ila l-abad». 30Wa Isa gaal al-kalaam da achaan gaalo hu indah cheetaan.

Amm al-Masiih wa akhwaanah

31Wa amm Isa wa akhwaanah macho leyah. Wa wagafo barra min al-beet. Wa rassalo naadum achaan yinaadiih leehum. 32Wa naas katiiriin gaaʼidiin maʼa Isa wa hu gaaʼid fi usuthum. Wa gaalo leyah : «Ammak wa akhwaanak wa akhwaatak gaaʼidiin barra yinaaduuk».

33Wa hu radda leehum wa gaal : «Ammi yaati ? Wa akhwaani yaatu humman ?» 34Wa anlafat le l-naas al-gaaʼidiin maʼaayah wa gaal : «Chiifu. Dool bas humman ammi wa akhwaani. 35Wa ayyi naadum al-yisawwi hasab al-Allah yidoorah, hu da bas akhuuyi aw akhti aw ammi.»

Currently Selected:

Markhus 3: ADT19

Highlight

Copy