Takwiin 39

Yuusuf fi beet Fuutifaar al-Masri

1Wa l-Ismaaʼiiliyiin waddooh le Yuusuf fi Masir wa Fuutifaar al-Masri charaah. Wa Fuutifaar da, hu kabiir al-hurraas wa siid al-amaan hana Firʼoon malik Masir. 2Wa Allah gaaʼid maʼa Yuusuf wa achaan da bas, kulla cheyy al-yisawwiih da, yanjah. Wa sakan fi beet siidah al-Masri. 3Wa Fuutifaar irif kadar Allah gaaʼid maʼa Yuusuf wa Allah yanti al-najaah le Yuusuf fi kulla cheyy al-tisawwiih iidah. 4Wa Fuutifaar radyaan beyah wa khaddamah. Wa antaah le Yuusuf masʼuuliiyit beetah wa kulla maalah antaah leyah fi iideenah. 5Min wakit al-Fuutifaar wakkal Yuusuf, Allah baarak beetah wa maalah wa ziraaʼtah fi chaan Yuusuf. 6Achaan da bas, Fuutifaar anta kulla cheyy al-indah fi iideen Yuusuf. Wa Fuutifaar ma yisawwi cheyy fi beetah, illa yaji yaakul bas.

Yuusuf wa marit siidah Fuutifaar

Wa Yuusuf sabi jamiil wa tuulah kula sameh. 7Wa baʼad ayyaam, marit siidah chaafatah wa gaalat leyah : «Taʼaal, argud maʼaayi.» 8Wa Yuusuf gaal leeha : «La ! Abadan ! Siidi ma yihimm be cheyy fi beetah. Antaani masʼuuliiye hana kulla maalah fi iideeni. 9Wa ma fi naadum fi l-beet da masʼuul ziyaada minni ana, illa siidi. Wa siidi zaatah ma yadharni cheyy, illa inti bas achaan inti martah. Wa da kikkeef nisawwi cheyy haraam misil ke ? Wa kikkeef nisawwi zanib misil da giddaam Allah ?»

10Wa laakin daayman hi ma tikhalliih wa Yuusuf kula ma khassad abadan wa la yiʼaanis maʼaaha wa la yargud maʼaaha.

11Yoom waahid, Yuusuf dakhal fi l-beet le yakhdim. Wa l-khaddaamiin al-aakhariin ma fiihum. 12Wa marit Fuutifaar jaat karabat Yuusuf min khalagah wa gaalat leyah : «Taʼaal, argud maʼaayi !» Laakin Yuusuf talag leeha khalagah fi iideenha wa jara marag barra.

13Min chaafat talag leeha khalagah fi iideenha wa jara marag barra da, 14hi gammat sarakhat wa naadat khaddaamiinha wa gaalat : «Taʼaalu, chiifu ! Al-Ibraani al-siid beeti jaabah leena da, yidoor yalʼab maʼaana ! Gamma ja hini le yargud maʼaayi wa ana gammeet sarakht. 15Wa min simiʼ ana sarakht da, hu gamma jara barra wa khalla leyi khalagah.»

16Wa baʼad da, hi dammat khalag Yuusuf lahaddi siid beetha ja. 17Min hu ja, hi gammat ooratah nafs al-kalaam al-ooratah le l-khaddaamiin wa gaalat : «Ha ! Daahu abdak al-Ibraani al-jibtah leena da, ja leyi le yalʼab maʼaayi ! 18Laakin ana gammeet sarakht, hu gamma jara barra wa khalla leyi khalagah !» 19Wakit siid beetha simiʼ al-kalaam al-gaalatah fi Yuusuf da, hu gamma ziʼil. 20Wa karab Yuusuf fi l-sijin fi l-bakaan al-yidissu foogah masaajiin hana l-malik. Wa Yuusuf gaʼad fi l-sijin da.

Yuusuf fi l-sijin

21Wa fi l-sijin kula, Allah gaaʼid maʼa Yuusuf wa antaah rahma. Wa ligi rida min masʼuul al-sijin. 22Wa anta Yuusuf masʼuuliiyit kulla l-masaajiin fi iideenah wa kulla cheyy al-humman yisawwuuh illa be izin Yuusuf. 23Wa masʼuul al-sijin ma yihimm be khidimtah al-ammanaaha le Yuusuf achaan Allah gaaʼid maʼaayah. Wa Allah yanti al-najaah le Yuusuf fi kulla cheyy al-yisawwiih.

Currently Selected:

Takwiin 39: ADT19

Highlight

Copy