Takwiin 38

Yahuuza wa Taamaar

1Wa fi l-wakit da, Yahuuza farag min akhwaanah wa macha bakaan raajil waahid usmah Hiira min hillit Adullaam. 2Wa fi l-bakaan da, Yahuuza chaaf bineeye waahide wa abuuha min Kanʼaan usmah Chuuʼ. Wa Yahuuza akhad al-bineeye di wa dakhal beeha. 3Wa hi bigat khalbaane wa wildat leyah wileed wa Yahuuza sammaah Iir. 4Wa battaan bigat khalbaane wa wildat wileed wa sammatah Unaan. 5Wa battaan kula wildat wileed wa sammatah Chiila. Wa fi l-wakit al-hi wildat foogah da, humman gaaʼidiin fi hillit Kaziib.

6Wa Yahuuza akhad le Iir, wileedah al-bikir, mara usumha Taamaar. 7Wa laakin Iir, bikir Yahuuza, hu naadum fasil giddaam Allah wa be sabab fasaaltah di, Allah jaʼal leyah al-moot. 8Wa baʼad da, Yahuuza gaal le wileedah Unaan : «Aakhud marit akhuuk wa jiib leyah zurriiye. Da cheyy al-waajib tisawwiih le akhuuk al-marhuum.»

9Wa laakin Unaan irif kadar al-zurriiye di ma tabga leyah hu. Wa wakit yargud maʼa marit akhuuh, yikhalli al-mani yidaffig barra achaan hi ma tabga khalbaane wa tijiib zurriiye le akhuuh. 10Wa l-cheyy al-Unaan sawwaah da, fasil giddaam Allah. Wa Allah jaʼal al-moot leyah hu kula.

11Wa fi l-bakaan da, Yahuuza gaal le Taamaar marit wileedah : «Hassaʼ da, amchi beet abuuki wa agoodi armala lahaddi wileedi Chiila yabga kabiir.» Achaan Yahuuza khaayif Chiila kula yumuut misil akhwaanah. Wa khalaas, Taamaar machat gaʼadat fi beet abuuha.

12Wa baʼad mudda tawiile, bineeyit Chuuʼ marit Yahuuza maatat. Wa wakit hiznah faat, Yahuuza macha hillit Timna achaan yagtaʼ suuf khanamah. Wa macha maʼaayah rafiigah Hiira min hillit Adullaam. 13Wa naas gaalo le Taamaar : «Daahu nasiibki jaayi Timna le yagtaʼ suuf khanamah.» 14Wa khalaas, hi sallat khulgaan al-khabiibe wa allaffahat be laffaaha wa assarramat wa gaʼadat fi khachum baab hillit Inaayim fi derib hillit Timna. Achaan hi irfat kadar Chiila bigi kabiir wa ma antooha leyah achaan tabga martah.

15Wa Yahuuza chaafha wa hasabha mara charmuuta achaan hi assarramat. 16Wa hu wajjah aleeha, wa macha leeha wa gaal : «Ana nidoor nargud maʼaaki.» Wa laakin hu ma irif kadar hi marit wileedah. Wa Taamaar gaalat leyah : «Kan ragadt maʼaayi da, tantiini chunu ?» 17Wa hu radda leeha wa gaal : «Nirassil leeki sakhal min inzeeyi.» Wa hi gaalat leyah : «Illa tantiini damaan nakurbah lahaddi tirassil leyi al-sakhal.» 18Wa hu gaal : «Chunu al-cheyy al-nantiiki takurbiih ?» Wa hi raddat leyah wa gaalat : «Antiini khitmak be hablah wa asaatak.»

Wa hu antaahum leeha wa ragad maʼaaha wa hi khilbat minnah. 19Wa baʼad da, Taamaar gammat machat beetha sallat laffaahitha wa libsat khulgaanha hana l-khabiibe.

20Wa Yahuuza anta al-sakhal le rafiigah al-min hillit Adullaam le yiwaddiih le l-mara di wa yichiil leyah khumaamah minha. Laakin hu ma ligiiha. 21Wa saʼal naas al-hille wa gaal : «Ween al-mara al-charmuuta al-gaaʼide fi khachum derib hillit Inaayim ?» Wa humman raddo leyah : «Ma fi mara charmuuta fi l-bakaan da.»

22Wa l-raajil gabbal le Yahuuza wa gaal : «Ana ma ligiitha wa naas al-hille zaathum gaalo leyi ma fi mara charmuuta fi l-bakaan da.» 23Khalaas Yahuuza gaal : «Khalli al-khumaam da yagood fi iideenha achaan al-naas ma yichchammato leena. Achaan ana rassalt leeha al-sakhal wa laakin inta ma ligiitha.»

24Wa baʼad talaata chahar, gaalo le Yahuuza : «Daahu Taamaar marit wileedak zanat wa bigat khalbaane.» Wa Yahuuza gaal : «Amurguuha barra wa harruguuha !»

25Wa wakit gaaʼidiin yamurguuha, hi rassalat le nasiibha Yahuuza wa gaalat : «Guulu leyah : ‹Ana khalbaane min al-raajil siid al-khumaam da.›» Wa gaalat battaan : «Akkid wa chiif al-khitim be hablah da wa l-asa di, hana yaatu ?»

26Wa Yahuuza akkad al-achya dool wa gaal : «Hi indaha hagg ziyaada minni achaan ana ma jawwaztaha le wileedi Chiila.» Wa khalaas, battaan ma garrab leeha.

27Wa wakit wakitha hana l-waaluuda tamma, hi irfat kadar indaha tiimaan. 28Wa wakit gaaʼide talda, waahid minhum salla iidah waahide. Wa l-wallaada massakat iidah wa rabatat leyah kheet ahmar wa gaalat : «Hu da al-yamrug awwal.» 29Laakin hu jabad iidah wa akhuuh marag gubbaalah. Wa l-wallaada gaalat : «Ligiit derib min ween maragt ?» Achaan da, sammooh Faaris (maʼanaatah derib hana marigiin). 30Wa baʼad da, akhuuh al-aakhar marag be habil ahmar fi iidah wa sammooh Zaarah (maʼanaatah ahmar tchu).

Currently Selected:

Takwiin 38: ADT19

Highlight

Copy