Takwiin 24

Ibraahiim yidoor mara le wileedah

1Wa Ibraahiim bigi chaayib bilheen wa Allah baarakah fi kulla cheyy. 2Yoom waahid, Ibraahiim naada abdah al-kabiir, hu al-Ibraahiim antaah masʼuuliiye hana kulla maalah. Wa gaal leyah : «Khutt iidak fi wirki. 3Ahlif leyi be Allah Rabb al-samaawaat wa l-ard. Ma taakhud le wileedi bineeye min balad Kanʼaan al-ana saakin foogha. 4Laakin amchi fi baladi wa fi lubb aayilti wa fattich bineeye le wileedi Ishaakh.»

5Wa l-abid radda leyah wa gaal : «Akuun al-bineeye taaba ma taji maʼaayi fi l-balad di. Wa kan abat ma taji maʼaayi, niwaddi wileedak fi l-balad al-inta maragt minha walla ?» 6Wa Ibraahiim gaal : «La ! Angariʼ ! Ma tiwaddi wileedi hinaak. 7Achaan Allah Rabb al-samaawaat al-maragaani min beet abuuyi wa min balad aayilti, hu kallam leyi wa halaf yantiini al-balad di le zurriiyti. Wa Allah al-hajja leyi da, yirassil malak giddaamak. Wa min hinaak bas tagdar tijiib mara le wileedi. 8Wa kan al-bineeye abat ma taabaʼatak, al-haliife di ma talhagak. Laakin abadan ma tiwaddi wileedi hinaak.»

9Khalaas al-abid khatta iidah fi wirk Ibraahiim wa halaf leyah. 10Wa l-abid chaal achara jumaal hana siidah wa chadda fooghum khumaam al-sameh hana siidah. Wa chaal derib hillit Naahuur al-fi turaab Araam been al-Nahreen.

Al-abid saʼal Allah

11Wa baʼad da, al-abid wassal gariib le een almi al-barra min al-hille wa barrak al-jumaal. Wa da be achiiye fi l-wakit al-yawurdan foogah al-awiin. 12Wa l-abid saʼal Allah wa gaal : «Ya Allah Rabb siidi Ibraahiim, al-yoom limmini maʼa l-nidoorah wa sawwi al-kheer le siidi Ibraahiim. 13Daahu ana gaaʼid jamb een almi wa banaat al-hille kula yawurdan. 14Wa l-bineeye al-ana nuguul leeha : ‹Antiini almi min jarriki nachrab› wa hi tuguul leyi : ‹Achrab wa nazgi jumaalak kula›, al-bineeye di, khalli hi bas tukuun al-inta azaltaha le abdak Ishaakh. Be misil da, ana naʼarif kadar inta sawweet al-kheer le siidi Ibraahiim.»

15Lissaaʼ al-abid ma kammal suʼaalah le Allah ke bas, Rifga bineeyit Batuwiil jaat waarde, chaayle jarraha fi kitifha. Wa Batuwiil hu wileed Milka wa Naahuur. Wa Naahuur hu akhu Ibraahiim. 16Wa Rifga samha bilheen wa lissaaʼha bineeye udriiye. Wa jaat nazalat fi l-machiiche wa chaalat almi wa gaaʼide tatlaʼ.

17Wa khalaas, al-abid jara lihigaaha wa gaal leeha : «Min fadulki, antiini almi chiyya min jarriki nachrab.» 18Wa hi gaalat leyah : «Achrab, ya siidi !» Wa tawwaali dallat al-jarr wa antatah chirib. 19Wa wakit antatah chirib, khalaas gaalat : «Nichiil almi wa nazgi jumaalak lahaddi yarwo.» 20Wa ajala ke bas sabbat almi fi l-hoot wa jarat chaalat aakhar wa zagat kulla l-jumaal. 21Wa l-abid gaaʼid yichiifha saakit wa yasʼal fi galbah kan Allah khibil suʼaalah walla la.

22Wakit al-jumaal riwo khalaas, al-abid antaaha le l-bineeye chinif waahid hana dahab faayit siisi wa suure itneen hana dahab, ayyi waahid yawzin ziyaada min 14 jineeh. 23Wa saʼalha : «Inti bineeyit yaatu ? Ooriini, fi beet abuuki fi bakaan al-narugdu foogah, ana wa l-naas al-maʼaayi walla ?» 24Wa Rifga raddat leyah wa gaalat : «Ana bineeyit Batuwiil wa jidditi Milka wa jiddi Naahuur.» 25Wa gaalat battaan : «Fi beetna fi gechch wa assaar le l-bahaayim wa fi bakaan al-tarugdu foogah kula.»

26Wa l-abid chakar Allah wa sajad giddaamah 27wa gaal : «Baarak Allah Rabb siidi Ibraahiim, hu al-wassaf rahmatah wa amaanah le siidi. Wa fi makhatari Allah gaadaani lahaddi jaabaani fi beet ahal siidi.»

Al-abid dakhal fi beet abu Rifga

28Wa fi l-bakaan da, al-bineeye gammat jarat al-beet wa oorat ammaha be kulla cheyy al-kaan. 29Wa Rifga indaha akhu usmah Laabaan. Wa Laabaan jara macha ale een almi 30achaan chaaf al-chinif wa l-suure al-fi iideen akhtah wa simiʼ al-kalaam al-gaalah al-abid le akhtah Rifga. Wa macha le l-abid wa ligaah gaaʼid gariib le een almi maʼa jumaalah. 31Wa gaal leyah : «Taʼaal, namchu beetna, inta al-baarakak Allah. Maala tagood barra hini ? Ana jahhazt leek beet wa bakaan le jumaalak.»

32Wa khalaas, macho wa l-abid dakhal fi l-beet wa Laabaan dalla al-khumaam wa anta gechch wa assaar le l-jumaal. Wa jaab almi le l-abid wa le l-naas al-maʼaayah achaan yikhassulu rijleehum. 33Wa gaddamo leehum akil laakin al-abid gaal : «Ana ma naakul abadan kan ma gult al-kalaam al-fi galbi.» Wa Laabaan gaal leyah : «Guulah !»

34Wa l-abid gaal : «Ana abid Ibraahiim. 35Allah baarak siidi Ibraahiim be ziyaada wa hu bigi naadum muhimm. Wa Allah antaah bagar wa khanam wa dahab wa fudda wa abiid wa khadiim wa jumaal wa hamiir. 36Wa Saara marit siidi wildat leyah wileed wakit hi ajuuz wa siidi anta al-wileed da kulla cheyy al-indah. 37Wa siidi hallafaani wa gaal leyi kadar ma naakhud le wileedah bineeye min balad Kanʼaan al-hu saakin foogha. 38Laakin gaal leyi : ‹Amchi fi beet abuuyi wa aakhud le wileedi mara min khachum beeti.› 39Wa ana gult le siidi : ‹Akuun al-mara taaba ma taji maʼaayi.› 40Wa hu gaal leyi : ‹Allah al-ana gaaʼid naʼabudah wa nitaabiʼ derbah yirassil malakah giddaamak wa yisahhil leek al-derib. Achaan tijiib mara le wileedi min beet abuuyi wa min khachum beeti. 41Kan macheet le ahali wa ma khassado leek, al-haliife al-hallaftak beeha di ma talhagak.›

42«Wa wakit ana wassalt gariib le een almi, saʼalt Allah Rabb siidi Ibraahiim wa gult : ‹Ya Rabb, sahhil leyi al-cheyy al-ana jiit fi chaanah. 43Wa daahu ana gaaʼid jamb een almi wa akuun bineeye taji waarde le l-almi wa nuguul leeha : “Antiini almi min jarriki nachrab.” 44Wa kan hi tuguul leyi : “Achrab wa nazgi jumaalak kula”, khalaas al-bineeye di, khalli hi bas tukuun al-bineeye al-inta Allah azaltaha le wileed siidi.›

45«Wa lissaaʼ ana ma kammalt suʼaali le Allah ke bas, Rifga jaat waarde chaayle jarraha fi kitifha wa jaat nazalat fi l-machiiche. Wa ana saʼaltaha wa gult leeha : ‹Min fadulki, antiini almi nachrab.› 46Wa tawwaali dallat jarraha min kitifha wa gaalat leyi : ‹Achrab wa nazgi jumaalak kula.› Wa ana chiribt wa hi zagat al-jumaal. 47Wa ana saʼaltaha gult leeha : ‹Inti bineeyit yaatu ?› Wa hi raddat leyi wa gaalat : ‹Ana bineeyit Batuwiil wa jidditi Milka wa jiddi Naahuur.› Wa khalaas, ana dasseet leeha chinif fi munkharha wa suwaareen fi iideenha. 48Wa ana dangart wa sajadt le Allah wa chakart Allah Rabb siidi Ibraahiim al-gaadaani fi l-derib al-adiil le naakhud bineeyit akhu siidi le wileedah.

49«Wa khalaas, kan tidooru tisawwu al-kheer wa l-amaan le siidi, ooruuni ! Walla kan ma tidooru kula, ooruuni wa ana namchi bakaan aakhar.»

Abbahaat Rifga khassado

50Khalaas Laabaan wa Batuwiil raddo leyah wa gaalo : «Al-cheyy da min Allah. Ma nagdaro nuguulu foogah cheyy. 51Di hi Rifga gaaʼide giddaamak. Chiilha wa amchi beeha ! Khalliiha tabga marit wileed siidak misil Allah gaalah.»

52Wakit al-abid hana Ibraahiim simiʼ kalaamhum, chakar Allah wa sajad giddaamah. 53Wa gamma marag min khumaamah khulgaan wa achya hana dahab wa fudda. Wa antaahum le Rifga. Wa anta le akhuuha wa ammaha hadiiye khaaliye. 54Wa l-abid hana Ibraahiim maʼa l-naas al-maʼaayah akalo wa chirbo wa ragado.

Wa be fajur wakit gammo, al-abid hana Ibraahiim gaal leehum : «Khalluuni nigabbil le siidi.» 55Wa akhuuha wa ammaha gaalo leyah : «Khalli al-bineeye tagood maʼaana chiyya misil achara yoom ke. Wa baʼad da, tamchi.» 56Wa l-abid radda leehum wa gaal : «Ma tiʼakhkhuruuni achaan Allah sahhal leyi safari. Khalluuni namchi le siidi.» 57Wa humman gaalo leyah : «Khalli ninaadu al-bineeye wa nasmaʼo kalaamha.» 58Wa humman naadooha le Rifga wa gaalo leeha : «Tidoori tamchi maʼa l-raajil da walla ?» Wa hi gaalat : «Aywa, namchi.»

59Wa khalaas, khallo akhuthum maʼa l-mara al-rabbatha macho maʼa l-abid hana Ibraahiim wa l-naas al-maʼaayah. 60Wa baarako Rifga wa gaalo : «Ya akhutna ! Abge amm hana malaayiin al-naas wa zurriiyitki tichiil turaab hana udwaanha !»

Rifga wa l-abid gabbalo le Ishaakh

61Wa Rifga maʼa khaddaamaatha rikbo fi l-jumaal wa taabaʼo al-abid wa khalaas macho sawa.

62Wa Ishaakh gabbal min biir al-usumha Biir Allah al-Hayy al-gaaʼid Yichiifni wa sakan fi turaab Nagab. 63Wa be achiiye, Ishaakh marag raayikh fi l-khala wa wakit rafaʼ raasah, chaaf jumaal jaayiin.

64Wa Rifga kula rafaʼat raasha wa min chaafat Ishaakh, dallat min al-jamal. 65Wa saʼalat al-abid wa gaalat : «Al-raajil al-hinaak jaayi aleena da, yaatu ?» Wa hu gaal leeha : «Da siidi Ishaakh.»

Wa Rifga chaalat laffaahitha wa khattat wijihha. 66Wa l-abid hajja le Ishaakh be kulla cheyy al-kaan. 67Wa khalaas, Ishaakh waddaaha le Rifga fi beet ammah Saara wa hi bigat martah wa hu habbaaha ziyaada. Wa be misil da, Ishaakh gidir sabar baʼad moot ammah.

Currently Selected:

Takwiin 24: ADT19

Highlight

Copy