Takwiin 25

Ibraahiim wa iyaalah al-aakhariin

1Ibraahiim akhad mara aakhara usumha Gatuura. 2Wa hi jaabat leyah iyaal wa humman Zimraan wa Yagchaan wa Madaan wa Midyaan wa Yachbaakh wa Chuwah. 3Wa Yagchaan wilid Chaba wa Dadaan. Wa zurriiyit Dadaan, humman al-Achuuriin wa l-Latuuchiin wa l-Lumiin. 4Wa iyaal Midyaan, humman Iifa wa Ifir wa Hanuuk wa Abiidaʼ wa Alidaaʼa. Wa dool kulluhum iyaal Gatuura.

5Wa Ibraahiim gubbaal ma yumuut anta kulla maalah le wileedah Ishaakh. 6Wa le iyaalah hana l-awiin al-aakhariin kamaan, antaahum hadiiye wa saffaraahum baʼiid min wileedah Ishaakh fi turaab al-sabaah.

Moot Ibraahiim

7Wa Ibraahiim aach 175 sana. 8Wa wakit chayyab wa chibiʼ min al-dunya, hu maat wa lihig abbahaatah be farha wa salaam. 9Wa awlaadah Ishaakh wa Ismaaʼiil dafanooh fi karkuur al-gaaʼid fi zereʼ Afruun wileed Suuhar al-Hitti al-fi Makfiila. Wa l-zereʼ da sabaah le hillit Mamra. 10Wa l-zereʼ da, Ibraahiim charaah min al-Hittiyiin. Wa da l-bakaan al-dafanoohum foogah hu wa martah Saara. 11Wa baʼad moot Ibraahiim, al-Rabb baarak wileedah Ishaakh. Wa Ishaakh sakan jamb al-biir al-usumha Biir Allah al-Hayy al-gaaʼid Yichiifni.

Zurriiyit Ismaaʼiil

12Daahu zurriiyit Ismaaʼiil wileed Ibraahiim. Ammah Haajar al-Masriiye khaadim Saara. 13Wa daahu asaame awlaad Ismaaʼiil hasab zurriiyithum. Humman Nabayuut al-bikir wa Khidaar wa Adabiil wa Mibsaam 14wa Michmaʼ wa Duuma wa Massa 15wa Hadad wa Tiima wa Yatuur wa Nafiich wa Gidma. 16Wa dool awlaad Ismaaʼiil al-atnaachar. Wa ayyi waahid minhum bigi cheekh hana khachum beet waahid wa sammo hillaalhum wa furgaanhum be asaameehum.

17Wa Ismaaʼiil aach 137 sana wa maat wa lihig abbahaatah. 18Wa zurriiyit Ismaaʼiil sakanat min balad Hawiila lahaddi balad Chuur al-mugaabil balad Masir ale balad Achuur. Wa humman gaʼado didd kulla akhwaanhum min zurriiyit Ibraahiim.

Waaluudit Isuu wa Yaakhuub

19Daahu taariikh Ishaakh wileed Ibraahiim. Ibraahiim wilid Ishaakh. 20Wa Ishaakh indah 40 sana wakit akhad Rifga bineeyit Batuwiil al-Araami min balad Faddaan Araam. Wa Rifga hi akhut Laabaan al-Araami.

21Wa Ishaakh chahad Allah achaan martah Rifga aagre wa Allah khibil suʼaalah wa hi bigat khalbaane. 22Laakin al-iyaal gaaʼidiin yiddaawaso fi batunha wa hi gaalat : «Chunu al-jaani ?» Wa machat saʼalat Allah. 23Wa Allah gaal leeha :

«Fi ummateen fi batunki,

chuʼuub itneen yinfargu.

Wakit taldeehum,

al-waahid yabga chadiid min al-aakhar

wa l-kabiir yakhdim le l-sakhayyar.»

24Wa wakit Rifga wakitha tamma, hi wildat wa jaabat tiimaan. 25Al-awwalaani marag wa jildah kulla maksi be suuf. Achaan da, sammooh Isuu (maʼanaatah abu suuf). 26Wa baʼad da, al-taani kula marag wa kaarib kaʼab akhuuh Isuu. Achaan da, sammooh Yaakhuub (maʼanaatah kaarib kaʼab walla l-najiid).

Wa Ishaakh indah 60 sana wakit wilid al-iyaal dool. 27Wa l-awlaad kibro wa Isuu bigi gannaasi nachiit wa yaʼarif al-khala. Laakin Yaakhuub hu naadum haadi wa gaaʼid daayman fi l-beet. 28Wa Ishaakh yiriid Isuu achaan hu yijiib leyah laham al-seed. Wa laakin Rifga tiriid Yaakhuub.

29Yoom waahid, Yaakhuub gaaʼid yisawwi akil wa Isuu ja min al-ganiis jiiʼaan marra waahid. 30Wa gaal le Yaakhuub : «Min fadlak, antiini al-akil al-ahmar da naakul achaan ana jiiʼaan.» Wa achaan da bas, le Isuu sammooh Adoom (maʼanaatah ahmar).

31Wa Yaakhuub gaal leyah : «Kan tidoor al-akil da, biiʼ leyi hagg bukuuriiytak hatta nantiik taakul.» 32Wa Isuu gaal : «Ana mutt min al-juuʼ. Nisawwi chunu be hagg al-bukuuriiye ?» 33Wa Yaakhuub gaal leyah : «Ahlif leyi gabul !» Wa khalaas, Isuu halaf wa baaʼ leyah hagg bukuuriiytah.

34Wa khalaas, Yaakhuub anta mulaah hana adas wa khubza le Isuu wa hu akal wa chirib wa gamma macha. Wa be misil da, ma lammaah be hagg al-bukuuriiye.

Currently Selected:

Takwiin 25: ADT19

Highlight

Copy