Takwiin 23
23
Ibraahiim yachri khabur le Saara
1Wa Saara aachat 127 sana. 2Wa maatat fi Kharyat Arbaʼa al-maʼruufa be Hibruun, fi balad Kanʼaan. Wa Ibraahiim sawwa furaach le martah wa baka leeha.
3Wa khalaas, Ibraahiim gamma min bakaan al-janaaza wa hajja le l-Hittiyiin wa gaal leehum : 4«Ana ajnabi wa khariib wa aayich fi usutku. Min izinku, antuuni bakaan al-nadfin foogah marti.» 5Wa l-Hittiyiin raddo le Ibraahiim wa gaalo : 6«Ya sayyidna, asmaʼ kalaamna. Al-Rabb sawwaak kabiir fi usutna. Adfin martak fi ayyi bakaan al-tidoorah. Ma fi naadum yagdar yadharak ma tadfin martak.»
7Wa Ibraahiim gamma dangar giddaam al-Hittiyiin, naas al-balad. 8Wa gaal leehum : «Kan intu khassadtu wa induku niiye nadfin marti hini da, asʼalooh le Afruun wileed Suuhar 9achaan yantiini al-karkuur al-fi Makfiila al-gaaʼid jamb zerʼah. Wa nachriih minnah giddaamku be taman hana l-bakaan da. Wa l-bakaan da yabga leyi bakaan hana dafin.»
10Wa Afruun gaaʼid fi lubb al-Hittiyiin wa radda le Ibraahiim giddaam kulla l-Hittiyiin al-jo gaaʼidiin fi khachum baab al-hille wa gaal : 11«La, ya sayyidi. Asmaʼni. Khalaas, nantiik al-zereʼ wa l-karkuur al-gaaʼid fi l-zereʼ kula. Nantiihum leek giddaam kulla naas baladi. Amchi adfin martak !»
12Wa Ibraahiim gamma dangar battaan giddaam kulla naas al-balad 13wa gaal le Afruun giddaam kulla l-haadiriin : «Asmaʼ kalaami. Ana nantiik taman al-zereʼ wa akhbal minni al-taman da. Wa nadfin marti foogah.» 14Wa Afruun radda le Ibraahiim wa gaal : 15«Ya sayyidi, asmaʼ kalaami. Taman al-zereʼ da 400 hajar fudda bas. Laakin beeni wa beenak, da cheyy hayyin saakit. Amchi adfin martak !»
16Wa khalaas, Ibraahiim wa Afruun waafago fi l-taman da. Wa wazan leyah giddaam kulla l-Hittiyiin al-urbuʼmiya hajar fudda be l-wazin al-gaaʼidiin yisaawugu beyah. 17Wa be misil da, al-zereʼ hana Afruun al-gaaʼid fi Makfiila sabaah le hillit Mamra wa l-karkuur al-gaaʼid foogah wa kulla l-chadar al-fi lubb al-zereʼ 18bigo hana Ibraahiim giddaam kulla l-Hittiyiin al-haadiriin fi madkhal al-hille.
19Wa baʼad da, Ibraahiim dafan martah Saara fi l-karkuur al-fi l-zereʼ al-gaaʼid fi Makfiila sabaah le Mamra fi Hibruun fi balad Kanʼaan. 20Wa be misil da, al-zereʼ wa l-karkuur al-gaaʼid foogah da bigo hana Ibraahiim. Achaan charaah min al-Hittiyiin wa bigi leyah bakaan hana dafin.
Currently Selected:
Takwiin 23: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
