Lomaŋ 6

Saa è kúloai têe kwa sɔnyɔ̂ŋ-ni

1Lé ƃé kwa pâi ŋaŋ m̀ôi? Kwa pâi lɛɛ̂i nɔ́ sɔnyɔ̂ŋ kɛ̂i a gɛ́ɛ m̀ɛlɛ-seei e ƃɔlɔ? 2Vé tí a dɔnɔ kpîŋ! Kwa pɔ̂ri kɛ̂i léŋ nɔ́ sɔnyɔ̂ŋ su à kɛ̀ saa a kúloai tée kwa sɔnyɔ̂ŋ ní? 3Káfe gɔ́lɔŋ a gɛ́ɛ kúai dí kúbatâi kɛ̀ Zîsɛ Kôrai sârai dí kúbatâi kɛ̀ ŋɔsaai su? 4M̀ɛni ma kwa dîa-ni dí kúloo saa su batâi sârai, a gɛ́ɛ berei Nàŋ-nuui ŋɔfólo-laai sârai è Kôrai mu siɣe la saa yêei, kúa máŋ ku sía fúlu-laa nina su.

5À kɛ̀ kwa dîa-ni ku kɛ́ zu tɔnɔɔ saa su yɛ̂ɛ ŋɔsaai, tɔ̃yâ ma kwa pâi máŋ kɛ̀i zu tɔnɔɔ mu siɣe saa yêei su yɛ̂ɛ ŋɔmu-siɣe saa-yeei. 6Kú gɔ́lɔŋ a gɛ́ɛ kúkpîŋ tua-pere pɔlɔ-ŋai da wɔ́lɔ saa a díkpamoɔɔ zaa-wurii ma da dîa-ni, a gɛ́ɛ kúsɔnyɔ̂ŋ kpono-ŋai su é kara, a gɛ́ɛ é síɣe sâa ma kúfe wɔ́lɔ ŋɔ́nɔ pâi kɛ̂i a sɔnyɔ̂ŋ ŋɔluɛ, 7kpɛ́ni fêi, ǹúui a saai a ŋuŋ-ma-ƃo sɔlɔ ƃó sɔnyɔ̂ŋ yêei. 8À kɛ̀ kwa Kôrai-ni kwà sàa, kúlâai la kúa máŋ kwa pâi kɛ̂i ɣele ma kwa dîa-ni. 9Kú gɔ́lɔŋ a gɛ́ɛ Kôrai nyíi mu sìɣei saa yêei vé pâi ŋɔ́nɔ saâi. Saa ŋɔwála-walai fé ŋɔ́nɔ wɔ́lɔ m̀ɛi. 10Zaai è gɛ̀i è gélee kɛ̀ zu tɔnɔɔ a gɛ́ɛ sɔnyɔ̂ŋ è saa. Kɛ́lɛ, ŋɔfúlu-laai gáa zui, gáa zu Ɣâla yêei. 11À kɛ̀ tí káa máŋ ka kákili ŋá sía a gɛ́ɛ ka nâa kpera káɣeniɛi kɛ́ɛ ma a sɔnyɔ̂ŋ. Kɛ́lɛ, kákaa a káfulu Ɣâla yêei Zîsɛ Kôrai sârai.

12Káfe nɛ̀ɛ naa sɔnyɔ̂ŋ è kɛ́ a kákponôi téniŋ tɔɔ-sɛŋ. Káfe nɛ̀ɛ naa sɔnyɔ̂ŋ é gɛ́ sɛŋ wɛli é tɛ́ɛ kálii pôlu a ŋ̀ánaa. 13Káfe nɛ̀ɛ naa sɔnyɔ̂ŋ é gɛ́ kátɔɔ-saŋ da é kɛ́ a ŋ̀wana-lɔ̂ɔ kɛ́-sɛŋ. Kɛ́lɛ, ka kákpîŋ tɛɛ Ɣâla yɛ̂ɛ ǹúui kùla saa yêei é pá fúlu-laa sui. Ka kátɔɔ-saŋ kélee tɛ́ɛ Ɣâla pɔ́ yɛ̂ɛ tɔ̃yâ laa-la maa tii kɛ́-sãa. 14Káfe ǹɛɛ naa sɔnyɔ̂ŋ ŋɔwála-walai fé kɛ̀ kámɛi, tãi nɔ́ káfe la tɔ̂ŋ mu, fɛ̂ɛ m̀ɛlɛ-seei.

Tɔ̃yâ-laa ŋɔluɛ-ŋai

15Lé ƃé ŋaŋ? M̀aa nɛ̃ɛ̂i kú sɔnyɔ̂ŋ kɛ́, kpɛ́ni fêi, kúfe tɔ̂ŋ mu, fɛ̂ɛ m̀ɛlɛ-seei? Vé tí a dɔnɔ kpîŋ! 16Káfe gɔ́lɔŋ a gɛ́ɛ à kɛ̀ kà kákpîŋ tɛ̀ɛ núu da pɔ́ a yɛ̂ɛ woo mɛni luɛ-ŋa, gɛ̀ ní kákaa a ǹúui tí ka ŋ̀óo mɛnii ŋɔluɛ-ŋa? Kákaa a sɔnyɔ̂ŋ ŋɔluɛ-ŋa nyíi a kákɛ̀ kásaai, kpaa máŋ kákaa a woo mɛni ŋɔluɛ-ŋa nyíi a kákɛ̀ a tɔ̃yâ-ƃelai. 17Kɛ́lɛ, sɛɣɛi-fe é tɛ́ɛ Ɣâla pɔ́ a gɛ́ɛ káai wɔ́lɔ kɛ̀ a sɔnyɔ̂ŋ ŋɔluɛi, ka nâa kɛ́ a zɛŋ-lɛ́ɛi ka zɔlɔ ƃoi ŋɔwoo mɛni-ƃela é kúla kálii su. 18Ka nâa kula sɔnyɔ̂ŋ ŋɔluɛ-laai su, ka kɛ́ a tɔ̃yâ laa-la ŋɔluɛ-ŋa. 19Ŋa kákɔlɔŋ woo-ŋa ƃôi kâa, kpɛ́ni fêi, kákponôi fíi kpɛɛ̂i. Ká ǹɛɛ naa kákponôi gwaa kélee kɛ́ ƃò a ŋwana-lɔ̂ɔ kɛ́ sãa. Kɛ́lɛ fɛ̂ɛ ka ǹɛɛ naa kákponôi gwaa kélee kɛ́ ƃò naa Ɣâla ŋɔtíi kɛ́ mɛni ma.

20Kákɛɛ a sɔnyɔ̂ŋ ŋɔluɛi, káŋuŋ ma è kɛ̀ m̀óɔɔ tɔ̃yâ laa-la mɛni. 21Kɛ́lɛ, lé lɛ́lɛɛ ƃe ká zɔlɔ ƃò nyíi-ŋai su maa ŋumɛ̂i káa kâai!? Ǹyaŋ nyiti-ŋai kpɛɛ ŋá nɔ́ ƃa saa. 22Kɛ́lɛ, ká nâa kùla sɔnyɔ̂ŋ ŋɔwála-walai mu ka kɛ́ a Ɣâla ŋɔnûa. M̀ɛni lɛ́lɛɛ ƃa ka nâa kɛ́ a Ɣâla pɔ́ɔ, nyaŋ mɛni lɛ́lɛɛi pâi kulâi nyíŋi su kámɛni mai nya ƃa wɔ́lɔ-wɔlɔ fulu-laai. 23Sɔnyɔ̂ŋ fela-fei ƃa saa. Kɛ́lɛ, Ɣâla ŋɔƃɛlɛ-sêe sama-sɛŋ ƃa ŋ̀wɔ́lɔ-wɔlɔ fulu-laai Kúnuu-namui Zîsɛ Kôrai kponôi.

Currently Selected:

Lomaŋ 6: KWB

Highlight

Copy