Lomaŋ 5
5
Tɔ̃yâ-laa ŋɔfela-fei
1M̀ɛni ma, tãi nɔ́ Ɣâla a kútoli la a tɔ̃yâ-ƃela laa-la sârai, kwa kúkɛ lii-sêe su kwa Ɣâla-ni Kúnuu-namui Zîsɛ Kôrai sârai. 2Zarâi ƃé kú m̀ɛlɛ-seei ŋí maa perei sɔlɔ ƃo naa (laa-la sârai), nyíi kúkaa tɔ̂ɔni zui, ǹyaŋ kwa lii-nɛ̃ɛ kula kúkili-kɛ-zui su a Ɣâla ŋɔfólo-laai sɔlɔ ƃóɔɔ. 3É tɛ́ɛ máŋ nyíti ma, kwa lii-nɛ̃ɛ kula kúmɛni-soli káai su, kpɛ́ni fêi, kú gɔ́lɔŋ a gɛ́ɛ mɛni soli-kaa a pâ a lii-kpele, 4lii-kpele kɛ́ pa a tua-pere lɛ́lɛ, tua-pere lɛlɛ ǹyaŋ kɛ́ pa a kili-kɛ-zu. 5Kili kɛ-zu fa kúŋùmɛ, kpɛ́ni fêi, Ɣâla ŋɔwɛli kɛ́-maai puɔɔ̂i kúlii su M̀ɔlêŋ Maa Waai sârai, nyíi Ɣâla è dɛɛ kúpɔi.
6Kúkɛɛ kɔlɔ a kpɛɛ kûa kpɔ́ a ŋ̀ánaai kúsɔnyɔ̂ŋ sui, Kôrai è pà a maa tãi tí é saa kúmɛni ma. 7Ǹaa kpanaŋɔɔ̂i máŋ a gɛ́ɛ núu e saa tɔ̃yâ nuu mɛni ma kɛ́lɛ, ɣele da lii-kpele nuu a pɔ̂ri saâi núu lɛ́lɛɛ mɛni ma. 8Kɛ́lɛ, Ɣâla a ŋɔwɛli kɛ́-maai lɛ̀ kûa a gɛ́ɛ, berei máŋ kúkɛ̀ niî la a sɔnyɔ̂ŋ-ƃelai, Kôrai è sàa kúmɛni ma. 9M̀ɛni ma, tãi nɔ́ Ɣâla a kúkɛ la a tɔ̃yâ-ƃela a Kôrai ŋãai, gáa nâa a tɔ̃yâ a gɛ́ɛ Kôrai a pâi kúƃalôi è kúkùla Ɣâla ŋɔlii-ŋwana kɛ́tɛi su. 10À kɛ̀ tãi kú kɛ̀ la a Ɣâla kpɔara-ƃelai, Ǹóŋ ŋɔsaai è pà a kúa pôlu Ɣâla pɔ́, gɛ̀ ní gáa a tɔ̃yâ a gɛ́ɛ Ǹóŋ ŋɔfúlu-laai a pâi kúƃalôi, kpɛ́ni fêi, a nâa pá a kúa pôlu Ɣâla pɔ́. 11Kɛ́lɛ, m̀ɛnii da kpɛ́ni ká ŋí. Kwa lii-nɛ̃ɛ kùla Ɣâla kponôi Kúnuu-namui Zîsɛ Kôrai sârai, nyíi a pá a kúa pôlu Ɣâla pɔ́i.
Adaŋ da Kôrai
12Núu tɔnɔ ƃé pà a sɔnyɔ̂ŋ ǹɔii su, sɔnyɔ̂ŋ ǹyaŋ ƃé pà a saa. M̀ɛni ma saa a táa-taa núu kélee ma, kpɛ́ni fêi, núu kélee a sɔnyɔ̂ŋ kɛ́. 13Tɔ̃yâ ma, sɔnyɔ̂ŋ è kɛ̀ ǹɔii su Ɣâla é lɛ́ɛ dɔ̂ŋ tɛɛ̂i. Kɛ́lɛ, ƃɛ́i tɔ̂ŋ fé naai, dífa sɔnyɔ̂ŋ tòli naa a sɔnyɔ̂ŋ. 14É máŋ kɛ́ tí, saa è kɛ̀ nɔ́ núu kélee pôlu, é síɣe Adaŋ ŋɔtãi ma é tóo Mose ŋɔtãi ma, diai máŋ dífe sɔnyɔ̂ŋ kɛ́ ni yɛ̂ɛ berei Adaŋ e sɔnyɔ̂ŋ kɛ̀ lai. Adaŋ è kɛ̀ yɛ̂ɛ núui kɛ̀ pâi.
15Kɛ́lɛ, m̀ɛlɛ-see sama-sɛŋ fé yɛ̂ɛ Adaŋ ŋɔtɔ̂ŋ karaai m̀aa-ŋuŋ. À kɛ̀ núu tɔnɔ ŋɔtɔ̂ŋ karaa a núu támaa kɛ̀ é sáa, gɛ̀ ní gáa a tɔ̃yâ a gɛ́ɛ Ɣâla ŋɔƃɛlɛ-sêei da ŋɔƃɛlɛ-sêe sama-sɛŋ díkaa naa kpɔ́ a dámaa núu támaa mɛni ma. Ƃɛlɛ-sêe ƃé ǹúu tɔnɔi kɛ̀, nyíi gáa a Zîsɛ Kôrai, a gɛ́ɛ é m̀ɛlɛ-see sama-sɛŋ ti tɛ́ɛ. 16Ƃɛlɛ-see sama-sɛŋ fé yɛ̂ɛ zɛŋ a kula núu tɔnɔi ti ŋɔsɔnyɔ̂ŋ sui. M̀ɛni ŋá-teɛɛi nyíi kula núu tɔnɔ ŋɔtɔ̂ŋ karaai sui è pà a tɔŋ-pu-maa. Kɛ́lɛ, tɔ̂ŋ karaa támaa pôlu ma, m̀ɛlɛ-see sama-sɛŋ a pâ a tɔ̃yâ laa-la. 17À kɛ̀ núu tɔnɔ ŋɔtɔ̂ŋ karaa a gɛ̀ a gɛ́ɛ saa é kɛ́ núu kélee pôlu ǹúu tɔnɔi tí sârai, gɛ̀ ní gáa kpɔ́ a tɔ̃yâ a gɛ́ɛ diai da m̀ɛlɛ-see su kɛ́tɛi sɔlɔ ƃo da ŋɔtɔ̃yâ laa-lai maa ƃɛlɛ-sêe sama-sɛŋ da pâi kɛ̂i ǹɔii mɛi ŋ̀éniɛi su ǹúu tɔnɔi Zîsɛ Kôrai sârai.
18Yɛ̂ɛ berei núu tɔnɔ ŋɔtɔ̂ŋ karaa è pà la a tɔŋ-pu-maa núu kélee pɔ́i, bere nɔ́ ƃé núu tɔnɔ ŋɔtɔ̃yâ laa-la tii kɛ́ɛi a pâ la a ŋuŋ-ma-ƃo da fúlu-laa núu kélee mɛni ma. 19Yɛ̂ɛ berei Ɣâla wóo pili-nuu tɔnɔ è núu támaa píli la sɔnyɔ̂ŋ sui, bere nɔ́ ƃe Ɣâla wóo mɛni nuu tɔnɔ a pâi núu támaa kɛ̂i la dí tɔ̃yâ laa-la sɔlɔ ƃo. 20Dɔ̂ŋ è pà é dɔ̂ŋ karaai su kɛ́tɛ, kɛ́lɛ, ƃɛ́i sɔnyɔ̂ŋ su kɛ́tɛ̂i naai, m̀ɛlɛ-seei su kɛ́tɛ̂i naa e tɛɛ ma máŋ. 21Yɛ̂ɛ berei sɔnyɔ̂ŋ a saa kɛ̂ la núu kélee pôlui, bere nɔ́ ƃe máŋ m̀ɛlɛ-seei a tíi kɛ̀ la tɔ̃yâ laa-la sârai wɔ́lɔ-wɔlɔ fulu-laa mɛni ma Kúnuu-namui Zîsɛ Kôrai sârai.
Currently Selected:
Lomaŋ 5: KWB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2012 Bible Society in Liberia