Popular Bible Verses from Lomaŋ 5

Share

Kɛ́lɛ, Ɣâla a ŋɔwɛli kɛ́-maai lɛ̀ kûa a gɛ́ɛ, berei máŋ kúkɛ̀ niî la a sɔnyɔ̂ŋ-ƃelai, Kôrai è sàa kúmɛni ma.

Kili kɛ-zu fa kúŋùmɛ, kpɛ́ni fêi, Ɣâla ŋɔwɛli kɛ́-maai puɔɔ̂i kúlii su M̀ɔlêŋ Maa Waai sârai, nyíi Ɣâla è dɛɛ kúpɔi.

É tɛ́ɛ máŋ nyíti ma, kwa lii-nɛ̃ɛ kula kúmɛni-soli káai su, kpɛ́ni fêi, kú gɔ́lɔŋ a gɛ́ɛ mɛni soli-kaa a pâ a lii-kpele, lii-kpele kɛ́ pa a tua-pere lɛ́lɛ, tua-pere lɛlɛ ǹyaŋ kɛ́ pa a kili-kɛ-zu.

M̀ɛni ma, tãi nɔ́ Ɣâla a kútoli la a tɔ̃yâ-ƃela laa-la sârai, kwa kúkɛ lii-sêe su kwa Ɣâla-ni Kúnuu-namui Zîsɛ Kôrai sârai. Zarâi ƃé kú m̀ɛlɛ-seei ŋí maa perei sɔlɔ ƃo naa (laa-la sârai), nyíi kúkaa tɔ̂ɔni zui, ǹyaŋ kwa lii-nɛ̃ɛ kula kúkili-kɛ-zui su a Ɣâla ŋɔfólo-laai sɔlɔ ƃóɔɔ.

Kúkɛɛ kɔlɔ a kpɛɛ kûa kpɔ́ a ŋ̀ánaai kúsɔnyɔ̂ŋ sui, Kôrai è pà a maa tãi tí é saa kúmɛni ma.

M̀ɛni ma, tãi nɔ́ Ɣâla a kúkɛ la a tɔ̃yâ-ƃela a Kôrai ŋãai, gáa nâa a tɔ̃yâ a gɛ́ɛ Kôrai a pâi kúƃalôi è kúkùla Ɣâla ŋɔlii-ŋwana kɛ́tɛi su.

Yɛ̂ɛ berei Ɣâla wóo pili-nuu tɔnɔ è núu támaa píli la sɔnyɔ̂ŋ sui, bere nɔ́ ƃe Ɣâla wóo mɛni nuu tɔnɔ a pâi núu támaa kɛ̂i la dí tɔ̃yâ laa-la sɔlɔ ƃo.

Kɛ́lɛ, m̀ɛnii da kpɛ́ni ká ŋí. Kwa lii-nɛ̃ɛ kùla Ɣâla kponôi Kúnuu-namui Zîsɛ Kôrai sârai, nyíi a pá a kúa pôlu Ɣâla pɔ́i.