Táre-woo-ŋa 4
4
M̀ɛni lɛ́lɛɛi a kûla táre sui
1Óo, ńônii, ka kánâŋ ŋɔsɛŋ-lɛ-wooi mɛ́ni, ka káwoli tɔ́ɔ mà a gɛɛ ká táre sɔlɔ ƃó. 2Zɛŋ ŋa ǹɛ̂i kâai, gáa a sɛŋ-lɛɛ lɛ́lɛɛ. Káfe káyee kùla mù. 3Tãi ŋá kɛ̀ nɔ́ la a surɔ̂ŋ-loo tɔnɔ ńâŋ da ńee yêei, 4ńâŋ è sɛŋ lɛ̀ ḿâ ǹyɛɛi, “Ŋ̀óo-ŋai ŋí lâai kɛ́ a gbanaŋɔɔ ílii su. Ŋátɔ̂ŋ-ŋai dí lɛ́ɛ íkili ŋá a gɛɛ í lɛ́ɛ a ífulu. 5Táre kɔ́ri da mɛni ŋá-kaa. Ífe nìa dîa da ŋásɛŋ-lɛɛi. 6Ífe kùla táre pôlu. A pâi ímɛi kâai. Ŋ̀wɛ́li, a pâi ímaa kɔ̃ɔ̂i. 7Táre káa a sɛŋ maa mɛ̂ni kpanaŋɔɔ ŋánaa. M̀ɛni ma, mɛni tɔ̂nɔi maa-nɛ̃ɛi í gɛ́i, ǹyaa ƃa mɛni ŋá káa é kɛ́ íyêei. 8Ƃa táre ƃâa sìɣe, a pâi ílaa maa tɛ̂i. Ƃà kpùlɔŋ mà, gɛ̀ ní a pâi ƃaa-kɛ-maa tɛɛ̂i ípɔ. 9A pâi íŋuŋ maa ɣirîi a káraŋ lɛ́lɛɛ, é kâloŋ-ƃɔrɔ lɛ́lɛɛ see íŋûa.”
10Ńoŋ, íwoli tɔ́ɔ ḿâ, í ŋ́oo-ŋai ŋí síɣe. Ƃa gɛ̀ tí, gɛ̀ ní ífulu-laai su a pâi kôyai. 11Ŋa táre maa-pere lɛ́ yâ. Ŋa íteniŋ tɔ́ɔ bere sãai ma. 12Ƃa mɛni kpɛtɛɛ da kélee kɛ̀, ŋ̀aa sèe a pâi kɛ̂i a ǹɛ́lɛɛ. Ƃa kɛ̀ siâi, íperêi a pâi kɛ̂i a bonoɔɔ. 13Ŋásɛŋ-lɛɛi sóŋ a gbanaŋɔɔ. Ífe tèe ma. Ǹâai kɛ́, kpɛ́ni fêi, gáa a ífulu-laai. 14Ífé sìa ŋ̀wana-lɔ̂ɔ-ƃelai dí-perei ma. Ífe pìlaŋ zɔnyɔ̂ŋ-ƃelai tûa-perei pôlu. 15Siɣe nàa-pere, ífe lì naa. Ǹaa maa láa í lí, 16kpɛ́ni fêi, ŋ̀wana-lɔ̂ɔ-ƃelai dífa nyîi, fɛ̂ɛ dí mɛni nyɔ́mɔɔ kɛ́. Nyii fa pâ díŋɛi fɛ̂ɛ dí ŋwana-lɔ̂ɔ kɛ́ a núu. 17Gbóloi da mìi, da zɔlɔ ƃô ŋwana-lɔɔ kɛ́ɛ su. Ŋwãai da gbèlei, da zɔlɔ ƃó wôya-pere su.
18Kɛ́lɛ dɔ̃yâ-ƃelai díperei káa yɛ̂ɛ fólo-nɛnɛŋ. A lɛ̂ɛ fôloi é lɛ́ɛ la zu vólo su é kɛ́tɛ. 19Ŋ̀wana-lɔ̂ɔ-ƃelai díperei káa yɛ̂ɛ kpíni kɛ́tɛ. Dífa zɛŋ kâa da kâreŋ lai.
20Ńoŋ, íwoli tɔ́ɔ ŋ́oo ma, í ŋ̀á káa a ǹɛ́lɛɛ. 21Dífe kula íwôlii. Dílâai kɛ́ ílii su, 22kpɛ́ni fêi, gáa a fúlu-laa ǹúui mɛni ma a ŋ̀á kaai, gɛ́ gɔlɔ̂i pòno. 23Íkili-ŋa sîai mɛi káa a ǹɛ́lɛɛ mɛni sîi kélee su, kpɛ́ni fêi, nàa ƃé ífulu-laai a kûla naa. 24Ímaa kúla wôya lono ma, ífe nɛ̀ɛ naa kíri-lono é kúla íla. 25Íŋɛi é kɛ́ ítuɛ-pere a gɛɛ í ƃɛ́i káa ya ƃɔ́rɔnii naai. Ífe ípɛrɛ ma kàa. 26Íkɔɔ pîlanii káa a ǹɛ́lɛɛ a gɛɛ ísia-pere é kɛ́ a zã́a. 27Ífe tìnaŋ ílaa-mii yee mɛi-pere kpaa íkɔɔ-yee mɛi pere. Íyee kúla mɛni nyɔ́mɔɔ kɛ́ɛ su.
Currently Selected:
Táre-woo-ŋa 4: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
