Táre-woo-ŋa 5
5
Ǹia-wooi bîlaŋɔɔi wulu-wulu-kɛɛ mai
1Ńoŋ, ŋátare wooi mɛ́ni, í íwoli tɔ́ɔ ŋásɛŋ-lɛɛi ma, 2a gɛɛ íkíli ŋá sîai é kɛ́ a zãa, ílono-wooi é ítarei lɛ́. 3Núu da kpɛ́ni ŋɔnɛnî lá-gbɔ nɛ̃ɛ̂i yɛ̂ɛ kɔ̃́iŋ-wulɔ, ǹóno-woo kɔlɔ saa ma yɛ̂ɛ núu ƃé wúlɔ kpelêi. 4Kɛ́lɛ gbɛɛ-ŋai a kɛ̂ a ŋ̀wánaa yɛ̂ɛ ŋ̀ale-maa, ŋ̀á liɛɛ yɛ̂ɛ ƃóa-sɔ̂kpɔ nyii ŋ̀á káa gwaa veerɛ mai. 5Gɔ́ɔ a lî a yâ saa wôlo la, ŋɔsia-perei é lí a yá saa táa. 6Va kânaŋ fúlu-laa ŋɔpere ma, a lâŋ, ǹyaŋ va kɛ̂ a m̀ɛnii kɔ́lɔŋɔɔ a kɛ̂i.
7Óo ńoŋ, íwoli tɔ́ɔ ḿâ, ífe nìa ŋ́oo-ŋai dîa. 8Ímaa kula nɛnîi tí ma a zu kôya, ífe lɛ̀ɣɛ ŋɔpɛ́rɛi gbôŋ ma. 9Ƃà wàla gɛ̀ tí, gɛ̀ ní ƃaa-kɛ-maa fé pâi ŋɔ́nɔ kɛ̂i yâ, ǹyaŋ gɛ̀ ní ƃa ífulu-laai tɛ́ɛ diai pɔ́ malôŋ-kaa fé díyêei. 10Ŋɔ̃ya-ŋa da pâi dínîa kɛ̂i a íkɔ̂liŋ, ǹyaŋ zɛŋ kélee ƃa tíi kɛ́ mɛni mai a pâi kɛ̂i a núu da kpɛ́ni-ŋa pɔ́ɔ. 11Gbɛɛ-ŋai, tãi íkpono da ífulu-laai da pâi kɛ̂i karâi lai, ya pâi kɛ̂i nyîɣɛi. 12Ƃa pâi kɛ̂i môi yɛ̂ɛi, “Ŋ́gula maa kɛ́ɛ mɛni nyɔ́mɔɔ kɛ́ɛ mɛni ma ƃɛlɛ fé ŋ́goi. Lé mɛni ƃé fé núu da kpɛ́ni ŋɔteniŋ tɔɔ-wooi siɣe ní lai? 13Fé ŋ́oli tɔɔ ní ŋasɛŋ-lɛ-ƃelai wóo ma. Fé dília-woo-ŋai siɣe ní. 14Ŋâa nâa ŋáfulu-laai su kara. Ŋâa nâa kɛ́ a ƃaa kula maa-nuu núu kélee ŋɛ́i.”
15Íkpɔɔi nɛnîi maa mɛ̂ni é ílii láa. Íwɛli kɛ́-maai é kɛ́ nɔ́ ǹyaa tɔ̂nɔ mɛni ma. 16Ífe kɛ̀ yɛ̂ɛ ya lêe nyii nɛnî sii kélee a pɔ̂ri da kpelei. 17Maa nɛ̃ɛ̂i é kɛ́ naa ínɛnîi yaa tɔ̂nɔ m̀ɛni, ífe kɛ̀ naa ŋ̀ɔ̃ya-ŋai mɛni ma. 18Tɔɔ ínɛnîi é kɛ́ a lûwa ímɛni ma. Lii-nɛ̃ɛ kula ínɛnîi mɛni ma nyii í gùla a ínaɣa tãi. 19Ínɛnîi lɛ̂lɛɛi yɛ̂ɛ pîlaŋ sua, zia-pere lɛ́lɛɛ yɛ̂ɛ lóma a kɛ̀ siâi. Ǹɛɛ naa ŋɔwɛli-kɛ-maai é ílii láa a tãi kélee, é íkɛ í kánaŋ nɔ́ ŋɔwɛlii-kɛ-maai ma. 20Ńoŋ, lé-mɛni ƃé núu da kpɛ́ni ŋɔnɛnî maa mɛ̂ni a íll sóŋ lai, íkɛ ílii-laa mɛni kɔ̀ri la ǹyêei? 21Ɣâla Yâwɛɛ a ítûa-pere kélee maa kpɛɛ̂i, gɛ́ ísia-pere kélee maa kpɛ̂ɛ. 22Ŋwana-lɔ̂ɔ-nuu ŋɔsɔnyɔ̂ŋ káa yɛ̂ɛ ƃáre. A kɔ̂ a gbîŋ ƃare. 23A pâi saâi, kpɛ́ni fêi, va gbîŋ mɛi kâa. Ŋɔƃoo tûa-perei ƃé pâi ŋuŋ la pilîi.
Currently Selected:
Táre-woo-ŋa 5: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
