Táre-woo-ŋa 26
26
1Berei kúkili fé la ma a gɛɛ kɔ́lɛ a pâ a fólo-laa-ƃoɔ tãi, kpaa máŋ tuna é pú a sí-sɛŋ ƃá kula tãi, bere nɔ́ ƃé kú-kili fé la ma a gɛɛ kú ƃaa-kɛ-maa tɛ́ɛ ǹúui pɔ́ va mɛni ŋá kàa ma a ǹɛ́lɛɛi.
2Berei kpâlaŋ-ŋɔni da soyoŋ da kôoŋ lai, bere nɔ́ ƃé foo-woo fa núu sòŋ la nyii zoŋ fé zui.
3Berei fáa káa la soo téniŋ tɔɔ mɛ̂ni ma, kpaa máŋ wɛlɛ-sôo téniŋ tɔɔ ɣɛli káa la wɛlɛ-sôo téniŋ tɔɔ mɛ̂ni mai, bere nɔ́ ƃé fáa káa la ǹúui mɛni ma va mɛni ŋá kàa la a ǹɛ́lɛɛi.
4Ífe ǹúui va mɛni ŋá kàa a ǹɛ́lɛɛi wóo su tòo yɛ̂ɛ berei ǹóno-woo káa lai. Ƃà gɛ́ tí, ƃa pâi ƃólonîi mà.
5Ǹúui va mɛni ŋá kàa a ǹɛ́lɛɛi wóo su too nɔ́ yɛ̂ɛ berei ǹóno-woo káa lai. À kɛ̀ ífe gɛ́ ní tí, a pâi gbîŋ siyêi a táre-nuu.
6Ǹúui a worɛ̂ tɛ̀ɛ a ǹúui va mɛni ŋá kàa a ǹɛ́lɛɛi, gáa yɛ̂ɛ ǹúui a gbîŋ kɔ́ɔ tèe gɛ́ mɛni-soli kàa.
7Berei kɔɔ-saa maa-nuu fa pɔ̂ri mãlâi lai, bere nɔ́ ƃé ǹúui va mɛni ŋá kàa a ǹɛ́lɛɛi va pɔ̂ri táre-woo ƃôi la.
8Ǹúui a ǹúui nyii va mɛni ŋá kàa a ǹɛ́lɛɛi láa ma tɛ̂i, gáa yɛ̂ɛ ǹúui a kɔni ɣîri vûma mai.
9Berei lɔɔ-kpele-nuu fa pɔ̂ri ŋalêŋ kulâi la ǹyée ŋái, bere nɔ́ ƃé táre woo fa kûla la ǹúui lá va mɛni ŋá kàa a ǹɛ́lɛɛi.
10Berei kerâŋ-pili-nuu nyii a núu kélee ƃòŋ nɔ́ a ŋɔkerâŋ nyii a gàai, bere ƃé gɛ̂ɛi la a ǹúui nyii va mɛni ŋá kàa a ǹɛ́lɛɛi, kpaa máŋ sia-sia-nuu sìɣe la a ŋɔtíi-kɛ-nuu.
11Berei ɣîla a gɔŋ pîli la é lí pôlu é gɔ́mɔi, bere nɔ́ ƃé ǹúui va mɛni ŋá kàa a ǹɛ́lɛɛi a ŋɔƃoo tûai kɛ̀ la ŋɔ́nɔ.
12Ǹúui va mɛni ŋá kàa a ǹɛ́lɛɛi maa mɛni lɛ̂lɛɛi é tɛ́ɛ ǹúui ma nyii a gbîŋ sìɣe a táre-nuu ǹyaŋ vé táre-nii.
13Nyɛ̃ŋ-nyɛŋ-nuu a mò ǹyɛɛi, “Yala-sulu káa bere-lêei mâ gɛ́ tɛ̀, gɛ́ yèŋ” a gɛɛ vé tíi kɛ̀.
14Berei kpôŋ a tînaŋ la gbôŋ-soŋ-kɔli mai, bere nɔ́ ƃé nyɛ̀-nyɛŋ-nuu a pène-pene la gbìŋ ŋá.
15Nyɛ̃ŋ-nyɛŋ-nuu a ǹyée lɔ̀ pâne su, kɛ́lɛ va pɔ̂ri ǹyée tɛ̂i ǹá.
16Nyɛ̃ŋ-nyɛŋ-nuu a gbîŋ sìɣe a táre-nuu é tɛ́ɛ núu lɔ́ɔlu mɛi feerɛ ma nyii-ŋai da pɔ̂ri dímɛni-ŋai su kulâi a ǹɛ́lɛɛi.
17Ǹúui a ǹá pìli m̀arâŋ-nuu ŋɔlaa-saa sui nyii ŋɔmɛni fé zui, gáa yɛ̂ɛ ǹúui a ɣîla sòŋ a ŋ̀óli à kɛ̀ tɛɛ̂i.
18-19Ǹúui a m̀arâŋ-nuui pɛ̀lɛ gɛ́ m̀ó mà, “Ŋa ítumôi nɔ́i,” Gáa yɛ̂ɛ ƃoo-nuu nyii a tɔ̃a pîli nyii ŋɔŋ káa ma a gɛɛ é núu páa lai.
20Kɔi à wàla kɛ́ naa, ŋɔŋ a nîiŋ. Ƃɛ́i láa-ƃo-kɛ-nuu fé naai, laa-saa fé naa.
21Berei tiɣi da kɔi da ŋɔŋ kɛ̀ la va nìiŋ, bere nɔ́ ƃé laa-saa-nuu ŋɔlaa-saai fa kpɛ̂ɛ la.
22Laa-ƃo-kɛ-nuu wóo káa yɛ̂ɛ sɛŋ nɛ̃ɛ nyii núu a mìi a maa félaa é yéŋ goi a ǹɛ́lɛɛi.
23La-nɛ̃ɛ-maa lôno kɛ́ɛ a gɛɛ í íkili-ŋa sîa nyɔ́mɔɔi mɛi pɛ́lɛ káa yɛ̂ɛ káne siáa pɔ̂rɔ-leɣi ma.
24Núu kpɔara-núu a núu pɛ̀lɛ a ǹóno-woo gɛ́ mɛni nyɔ́mɔɔ kpɛ̀tɛ gíli ŋá. 25À wóo lɛ́lɛɛ ƃò, ífe làa la, kpɛ́ni fêi, kpɔara támaa káa goi.
26Berei máŋ a ŋɔkpɔarai lòo lai, ŋɔŋwana-lɔɔi a kûla ǹûai ŋɛ́i.
27Ǹúui a lóa tèe núu da kpɛ́ni mɛni mai, a pâi tôoi gbɔ́ɔi loai su. Ǹúui a kɔni kîliŋ, gbɔ́ɔi kɔnii a lêne ma pôlu.
28Ǹúui ƃa gbɔarai, ǹyaa ƃé ƃa lɛ́ɛ kɛ̀ a ǹáa. La-nɛ̃ɛ-maa-woo a pâ a mɛni su-karaa.
Currently Selected:
Táre-woo-ŋa 26: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
