Táre-woo-ŋa 25
25
Saloma ŋɔtáre-wooi da kpɛ́ni-ŋa
1Saloma ŋɔtáre-wooi da kpɛ́ni-ŋa ká ŋí nyii-ŋai Zuda kaloŋ Ɛsekaya ŋɔkɔlɔ-pɔ̃yɛ-ƃelai dí bɔ̃yɛ ŋɔ́nɔ a ninai.
2Kwa ƃaa kɛ́-maa tɛ̀ɛ Ɣâla pɔ́ kpɛ́ni fêi a gɛ́ mɛ̂ni-ŋai lòo kûa, kú kɛ́ ƃaa kɛ́-maa tɛ̀ɛ kâloŋ-ŋa pɔ́ kpɛ́ni fêi da mɛni ŋáa lɛ́ kûa. 3Berei kúfe ŋ̀elei ŋɔkôya da ǹɔii ŋɔsiŋɔɔ kɔ́lɔŋ lai, bere nɔ́ ƃé kúfe kâloŋ ŋɔkili-ŋa sîai kóyɛŋ kɔ́lɔŋ la.
4Ƃà káne liƃi kûla ma, gáne-ɣale-nuui a pɔ̂ri sɛŋ-folo lɛ́lɛɛ kpɛtɛ̂i la. 5Ƃà ŋ̀ôya-ƃelai kùla gâloŋ kɔlɛ ma, mɛni sã́a kɛ́ɛ a ŋɔkâloŋ-laai su kpànaŋ.
6Ífe íkpîŋ kɛ̀tɛ gâloŋ ŋɛ́i. Ífe sèe ƃɛ́i ǹúu kpaya-kpayai da sêe naai. 7Ǹɛ̂lɛi dí mó yâ, “Pá í sée têbelei ŋuŋ ma,” é tɛ́ɛ la íŋumɛɛ ma gâloŋ ŋɛ́i a ísee-sɛŋ kuláa íyêei dí dɛɛ núu kɛ́tɛ pɔ́.
8À kɛ̀ ya m̀ɛni da kàa, ífe lì m̀ɛni-saa ƃó-kerei mu a maa félaa. M̀aa kpɛ́ɛ í gáa a gɛɛ íwɔi lɛ̂lɛi. À wàla kɛ́ tí, sêre da kpɛ́ni a ǹɛ a gɛɛ ímɛnii fé lɛ́lɛ-ni, ƃɛlɛ tôo a pâi sɛ̂lɛnii yâ.
9Laa-saa à tèe ka íkɔlɛ-ma-nuui ká loai, ka gbɛtɛ káloai, ífe íƃarâŋ-nuui ŋɔloo mɛ̂nii ƃò núu da kpɛ́ni-ŋa dîa. 10Ƃà gɛ̀ tí, nûa da kpɛ́ni-ŋa da gɔ̀lɔŋ, da pâi môi a gɛɛ íla faa sêe, ǹyaŋ ƃâa a pâi kulâi yâ.
11Ƃà mɛni lɛ́lɛɛ ƃò a m̀ó-pere, gáa yɛ̂ɛ gôo sɛŋ-folo káne pɔ̃yɛɛ ma.
12Táre-nuu ŋɔlia-wooi káa ǹia-wooi ŋí siɣe-nuu wôlii yɛ̂ɛ maa ɣîri-sɛŋ nyii dí gbɛ̀tɛ a gôoi.
13Tɔ̃yâ-worɛ-woo ƃó-nuu a ŋ̀orɛ-woo tɛɛ-nuui líi làa, yɛ̂ɛ berei ya lâɣi a tíi-kpanaŋ kɛ́-nuu líi làa lai.
14Ǹúui a sama-sɛŋ maa kono-tee kɛ̀ ǹyaŋ va dɛ̀ɛi, gáa yɛ̂ɛ tuna nyii a dɛ̀ kɛ́lɛ va pûi.
15Lii-kpele a kâloŋ kɛ̀ ǹíi ma é fáleŋ. Wóo lɛ́lɛɛ a núu káo ɣale.
16Ƃà kɔ̃́iŋ-wulɔ sɔlɔ ƃô, ífe dámaa kpèle. Ƃà dámaa kpèle, ƃa íkɔŋ pîli la.
17Íkɔɔ fé kɛ̀ íkɔlɛ-ma-nuui ŋɔpɛ́rɛi lá a ɣele kélee. Ƃà gɛ̀ tí, víi a pâi kpɛɛ̂i ímɛni ma é íkpɔara.
18Wôya-sere-faa kɛ́-nuu wóo a núu su kàra yɛ̂ɛ kɔ́-kɔ-wuru kpua, ƃóa-sɔ̂kpɔ kpaa máŋ sɔ̀la ŋá sénɛ̃ɛ.
19Ƃà íkili kɛ̀ wôya-nuu ma, mɛni kpɔ̂lu à kùla, gáa yɛ̂ɛ núu nyíŋ ɣáleɛɛ gɛ́ mii-sɛŋ mìi la, kpaa máŋ núu kɔ́ɔ kuláa gbulɔ̂ŋ ŋá gɛ́ sìa.
20Núu a wule tôo lii-soli-nuu ma, gáa yɛ̂ɛ ǹúui a seɣe kûla núu ma a kɔlɛ ɣele, kpaa máŋ núu a kpolo lîyeŋ sìa pala ŋá.
21Puru à kɛ̀ íkpɔara-nuu kɛ̂i, mii-sɛŋ tɛ́ɛ bɔ́. Kpele-wɛli à kɛ̀ gɛ̂i, yá tɛ́ɛ bɔ́ é gbele. 22Kpɛ́ni fêi, ƃà gɛ̀ tí, gɛ̀ ní íkaa ŋɔŋ tĩɣa pûi ŋ̀ûa, ǹyaŋ Ɣâla Yâwɛɛ a pâi ífela-fei.
23Yá-ŋua-pere tuna-fãa a pâ a tuna. Laa-ƃo kɛ́-nuu a pâ a lii-ŋwana.
24Ínyiɛɛ banaŋ ma lɛ̂lɛɛi é tɛ́ɛ la ka ínɛnîi ká kɛ́ ƃò pɛ́rɛ tɔnɔ mu nyii ǹaa-saai.
25Tuŋ lɛ́lɛɛ nyii a kûla lɔii kôyaa sui, gáa yɛ̂ɛ yá laɣi nyii a kpele-wɛli kùla núu mai.
26Tɔ̃yâ-nuu nyii a fâa ŋwana-lɔ̂ɔ-nuu wóo mai, káa yɛ̂ɛ ya-toŋ ma ya nyii ǹunûɔɔi kpaa máŋ ya-loa su liƃiɛɛ.
27Kɔ̃iŋ-wulɔ miɛɛ a dámaa fé lɛ́lɛ ní. M̀ɛni ma, vé lɛ́lɛ-ni í ƃaa kɛ́-maa kɔ́ri nûa yêei íkpîŋ mɛni ma.
28Ǹúui va ǹíi maa sòŋ, gáa yɛ̂ɛ taa-lee nyii ŋɔsiɣãŋ wôloɔi mai.
Currently Selected:
Táre-woo-ŋa 25: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
