Táre-woo-ŋa 23
23
M̀ɛnii -6-
1Ka núu kɛ́tɛ ka kɛ̀ kálaa miî, gɔ́lɔŋ ǹúui gáa lai, í ƃaa kɛ́-maa tɛ́ɛ bɔ́. 2Ƃà kɛ̀ a ǹúui mii-sɛŋ wɛli káa mai, tãi siɣe berei ƃa mii-sɛŋ miî lai. 3Ífe ŋɔmii-sɛŋ lɛ́lɛɛ dámaa mìi, tãi da a pɔ̂ri kɛ̂i a ƃáre ímɛni ma.
M̀ɛnii -7-
4Ífe ímàŋ tɔɔ-laa mɛni ma í tíi kɛ́ a gbanaŋɔɔ é tɛ́ɛ gɛ̂i ma. Tíi kɛ́ a táre-pere í ƃɛ́i kɔ́lɔŋ ya pɔ̂ri kperâi naai. 5Ísɛŋ-kaoi a kûla íyêei a maa félaa yɛ̂ɛ berei kuɛ a kɔ̂ɔŋ la a maa félaa ŋ̀elei sui.
M̀ɛnii -8-
6Ífe ŋɛi-kpala-nuu ŋɔkpóloi mìi, ífe ŋɔmii-sɛŋ lɛ́lɛɛi da wɛli ǹyêei. 7A kɛ̂ kɛ̂i yâ ǹyɛɛi, “Ílaa mii í íkpele.” Kɛ́lɛ va kɛ̂ kulâi ǹíi-pere kpɛ́ni fêi, a kɛ̂ gíli ŋá siâi zɛŋ-kaoi ma è gɔ̀lɛ m̀ii-sɛŋ mɛ̂ni mai. 8M̀ii-sɛŋ ƃa mìi, ƃa pâi íkɔŋ pilîi la. Ŋ̀óo lɛ́lɛɛ-ŋai ƃa mòi, gáa nɔ́ kpɛ́ni-kpɛni.
M̀ɛnii -9-
9Ífe ítãi kàra ƃoo-nuu ma. Vé pâi gâai ŋ̀ɛ́i a mɛni da.
M̀ɛnii -10-
10Ífe ǹɔii kóyaŋ ma kɔni-ŋai kûla dítɔ̂ɔi nyii ínuu-pɔlɔ-ŋai dí bìlaŋ naai, kpaa máŋ í tee-loŋ ŋɔlɔii kúla ǹyêei.
11Ɣâla Yâwɛɛ wála-walai. A pâi dímɛi-woo ƃôi é ímɛni ŋá tée.
M̀ɛnii -11-
12Ísɛŋ-lɛ-nuui ŋɔlia-woo-ŋai síɣe, í íwoli tɔ́ɔ dáre-woo-ŋai dîa í ŋ̀aa sèe kɛ́.
M̀ɛnii -12-
13Ífe kpèra ílôloŋ kula-maa kɛ́ɛ ma. Ƃà nòkwa a fáa, vé pâi baâi.
14Ƃa nòkwa a fáa, ƃa ŋɔfúlu-laai maa tée saa yêei.
M̀ɛnii -13-
15Ńoŋ, ƃà kɛ̀ a ítareɛ, ńii a pâi nɛ̃ɛ̂i. 16Ƃà tɔ̃yâ ƃò, ńii a pâi lâai.
M̀ɛnii -14-
17Ífe sɔnyɔ̂ŋ-ƃela maa líi tèe, kɛ́lɛ yao Ɣâla Yâwɛɛ ma a ɣele kélee. 18Núu fa pɔ̂ri íkili kɛ́-zui kulâi íyêei kpɛ́ni fêi, tínaa-tuɛ-pere káa ma.
M̀ɛnii -15-
19Ńoŋ, íwoli tɔɔ, í kɛ́ a ítareɛɛ, í íkili sée dɔ̃yâ-perei ma. 20Ífe kɛ̀ a ǹɔɔ-kpele-ƃelai, kpaa máŋ m̀ii-sɛŋ wɛli-ƃelai díta. 21Lɔɔ-kpeleɛ ŋánaa da mii-sɛŋ-wɛli a pâ a kôlo-laa núu pɔ́. Seɣe a pâi sâai yâ à kɛ̀ ya kɛ̀ nɔ́ mii-sɛŋ miî íkɛ nyìi a ŋánaa.
M̀ɛnii -16-
22Ínâŋ wóo mɛ́ni, kpɛ́ni fêi, ǹyaa ƃé í maa sɔlɔ ƃô. Ílee à pɔ̀lɔ, ífe íyee kùla mu.
23Kɔ́ a gbanaŋɔɔ a gɛɛ í tɔ̃yâ-laa maa kɔ́ri, táre, sɛŋ maa kɔ́riɛɛ da mɛni-ŋa-kaa. Ífe tèe dîa.
24Tɔ̃yâ-nuu ǹâŋ a lii-nɛ̃ɛ kùla. Lôloŋ táreɛɛ ŋɔkáa-ƃelai líi a nɛ̃ɛ.
25Tɔɔ ínaŋ da ílee dí lii-nɛ̃ɛ kúla. Tɔɔ ílee líi é nɛ̃ɛ kpɛ́ni fêi, ǹyaa ƃé ímaa sɔlɔ ƃô.
M̀ɛnii -17-
26Ńoŋ, íwoli tɔ́ɔ ŋ́oo ma, í ńdûa-pere maa kpɛ́ɛ í sía ŋ́gɔɔ-pɔɔi. 27Wulu-wulu kɛ́-nɛni da nɛnî nyii surɔŋ káa ǹyêei kɛ́lɛ va sêe ŋɔpɛ́rɛi lai, díkaa a ƃáre. 28Da kɛ̂ núu maa kpɛ̂nii yɛ̂ɛ ŋúma-nuu dí kɛ́ gɛ̀ zinâai dámaa dífa ŋɔ́nɔ kɛ̀ a dísãa dínɛnâai yêei.
M̀ɛnii -18-
29Gbɛ̂ɛ ƃé mɛni kpɔ̂lu sui? Gbɛ̂ɛ ƃé mɛni-soli kâai? Gbɛ̂ɛ ƃé pà a ǹaa-saai? Gbɛ̂ɛ ƃé pà a m̀ɛni-saai? Gbɛ̂ɛ ƃé lókwa-pala káa gbonô ma ǹyaŋ vé m̀ɛni kɔ́lɔŋ? Gbɛ̂ɛ ƃé ŋãa káa ŋɛi-gao mai? 30Dia ƃa ǹûai da sêe ŋwã̂ai kɔlɛ a zu kôyaa díkɛ ŋwã̂ai sumoɔɔ kpèle. 31Ífe nɛ̀ɛ naa lɔɔ é ítumo, berei máŋ ǹɛ̂lɛi la gɛ́ kpɔlu, gɛ́ fìlɛ kɔ̂pui su, gɛ́ tɛ̀ɛ núu kwana nɔ̃mɔlɔŋ. 32Kɛ́lɛ nàa pôlu ma, a pâi íkɛ̂i nɔ́ yɛ̂ɛ kali nyɔ́mɔɔ a núu nyìŋ. 33Íŋɛi a kɛ̂ kɛ̂i zĩ̂a-zĩ̂a, sãâ díkɛ tɛ̀ɛ-tɛɛ íŋɛi, ífa pɔ̂ri íkili ŋá siâi a ǹɛ́lɛɛ, kpaa máŋ í lóno a zã́a. 34Ƃa pâi kɛ̂i yɛ̂ɛ núu ƃé yá-ŋa-keleŋ su nyii vãai a kɛ̂ dúmo-tumoi fɛ̂ɛ é sɛŋ da soŋ. 35Gɛ̀ ní ya pâi môi yɛ̂ɛi, “Dí ǹokwa, kɛ́lɛ dífe ŋwána ní, dí ńzàa, kɛ́lɛ fé gíli kɔlɔŋ ní. Lé tãi ƃé ŋa pâi ŋ́ɛi lá ƃôi lai? Ŋa pâi ŋɔ́nɔ da kpelêi.”
Currently Selected:
Táre-woo-ŋa 23: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
