Táre-woo-ŋa 22
22
1Nûa da íkɔ̀lɔŋ a núu lɛ́lɛɛ, dí ƃaa-kɛ-maa tɛ́ɛ ípɔ, ǹɛ̂lɛi é tɛ́ɛ tɔɔ-laa ma, ƃaa-kɛ-maa lɛ́lɛɛ é tɛ́ɛ káne ma da gôo.
2Tɔɔ-nuu da kôlo-nuu díkpɛtɛ-pere pɔ̂riɛ̂i, kpɛ́ni fêi, Ɣâla Yâwɛɛ ƃé díkpɛ̀tɛ.
3Táre-nuu a mɛni kpɔ̂lu maa lâa, kɛ́lɛ ǹúui táre fé ŋ̀uŋ sui, a pîli nɔ́ zu gɛ́ mɛni-soli kàa.
4Ǹúui ǹíi ma yeŋɔɔ̂i gɛ́ ŋɔ́nɔ yào Ɣâla Yâwɛɛ mai, a tɔɔ-laa sɔlɔ ƃô, ƃaa-kɛ-maa da fúlu-laa.
5Ŋalêŋ da ƃáre díkaa wôya-nuu sia-pere su. Ǹúui à ŋ̀wɛ̀li é ŋɔfúlu-laai maa kɔ̃ɔi, tɔɔ é zu kula naa ma.
6Sɛŋ lɛ́ lôloŋ ma berei a pɔ̂ri siâi la a zãai. À kɛ̀tɛ, gɛ̀ ní vé pâi kulâi bere sã́ai ma.
7Wála-wala-laa káa tɔɔ-nuu yêei kôlo-nuu mɛi. Kpa-soŋ-nuu káa a kpa-pili-nûu ŋɔluɛ.
8Ƃà wôya-mɛni maa kɔ̂ri, ƃa mɛni kpɔ̂lu kàa. Í ŋwana-lɔɔi kóyaŋ káa ma.
9Ǹúui nyii ǹyée foaŋɔɔ̂i ma sɛŋ kɔlɛ mɛni mai, a pâi lûwa sɔlɔ ƃôi kpɛ́ni fêi a mii-sɛŋ tɛ̀ɛ kôlo-nuu pɔ́.
10Ǹúui a ɣɛ́lɛ-maa kûla-nuu kponôi ƃa gbɛ̀, gɛ̀ ní laa-saa, sîa da ŋumɛ a kpɛɛ.
11Ǹúui ǹíi lɛ̂lɛɛi, ǹóno-woo lɛ́lɛɛ ǹái, gáa a gâloŋ nîa-nuu.
12Ɣâla Yâwɛɛ a tɔ̃yâ-nuu maa kɔ̃ɔ, gɛ́ wôya-nuu wóo su kàra.
13Nyɛ̃ŋ-nyɛŋ-nuu a mò ǹyɛɛ, “Yala-sulu káa ŋ̀enei ŋá! Ŋà kùla bɛ́rɛi mu, a pâi ńzonîi!”
14Wulu-wulu kɛ́-nɛni lóno-woo káa yɛ̂ɛ ƃáre, ǹúui Ɣâla Yâwɛɛ líi a ŋwâna mai, a pîli ŋá.
15Ƃoo-mɛni káa lôloŋ líi su, kɛ́lɛ ƃa gula-maa kɛ̂ a ǹɛ́lɛɛ, a pâi teêi ŋɔƃoo-tuai ma.
16Ƃà sɛŋ tɛ̂ɛ tɔɔ-nuu pɔ́ kpaa máŋ ƃà kôlo-nuu lòaŋ a gɛɛ í tɔ́ɔ, ífa mɛni lɛ́lɛɛ sɔlɔ ƃô zu a gbɛɛ ŋá.
Dáre mɛni buu saaƃai
17Íwoli tɔ́ɔ. Ŋa pâi m̀ɛnii lɛ̂i yâ dáre-ƃelai dí m̀oi. Dísɛŋ-lɛɛi maa kɔ́ri. 18A pâi kɛ̂i a mɛni lɛ́lɛɛ ímɛni ma í ǹâai kɛ́ ílii su. Gélee é lɛ́ɛ íkili ŋá. 19Ŋa ŋ̀wɛ̂lii í íkili kɛ́ Ɣâla Yâwɛɛ ma. M̀ɛni ma, ŋa pâi ǹɛ̂i yâ sâa. 20Ŋá táre mɛni buu saaƃa pɔ̃yɛ ímɛni ma, táre-woo-ŋa da lia-woo lɛ́lɛɛ-ŋa. 21Ǹyaŋ da pâi dɔ̃yâi kpîŋ-kpiŋ lɛ̂i yâ. Ya lì a gɛɛ í maa kpɛ́ɛ, ya pâi gâai a tɔ̃yâ kpîŋ.
M̀ɛnii -1-
22Ífe kôlo-nuu fìli ŋɔkôlo-laai mɛni ma, kpaa máŋ í núu doo-mu lóaŋ mɛni-saa ƃó-kere mu. 23Ɣâla Yâwɛɛ káa a dímɛi-woo-ƃo-nuu. Diai da dímɔ̃lɛi, a pâi dí kula maa kɛ̂i.
M̀ɛnii -2-
24Ífe kɛ̀ a lii-ŋwana-nuu m̀arâŋ kpaa máŋ ka lii-fãa-goi-nuu ká kɛ́ kákîe pôlu. 25Ƃà gɛ̀ tí, ƃa pâi ŋɔtûa-perei maa kɔ̂rii, í íkpîŋ pili saa ŋɔƃárei ŋá.
M̀ɛnii -3-
26Ífe íkpîŋ sèe a sɛ́ɣɛ, ífe tɔ̀ɔ kpa-soŋ-ƃela mɛni ma. 27Ƃà gɛ̀ tí, a wàla gbai kpɛ́ɛ, da pâi ígbìŋ siɣêi.
M̀ɛnii -4-
28Ífe ǹɔii kóyaŋ ma kɔni-ŋai kûla dítɔ̂ɔi nyii ínuu-pɔlɔ-ŋai dí bìlaŋ naai.
M̀ɛnii -5-
29Ƃa yɛrɛ-tii kɛ́-nuu kâai, a tíi kɛ̀ nɔ́ kâloŋ-ŋa dîɛ. Va tíi kɛ̀ nûa dîɛ nyii-ŋai dítɔɔ̂i fé kɛ́tɛ-nii.
Currently Selected:
Táre-woo-ŋa 22: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
