Táre-woo-ŋa 21
21
1Kâloŋ ŋɔmɛni-kpɛtɛɛ káa yɛ̂ɛ ya ƃoloŋ-ƃoloŋ Ɣâla Yâwɛɛ yêei, gɛ́ déniŋ tɔ̀ɔ ƃɛ́i a ŋ̀wɛ̂lii é lí naai.
2Núu-kpune tûa-pere kélee lɛ̂lɛɛi ǹyaa kpîŋ ŋɛ́i, kɛ́lɛ Ɣâla Yâwɛɛ è ƃé kúlii-su mɛni-ŋai ŋɔsâpoi kɔ́lɔŋ.
3Ɣâla Yâwɛɛ è tɔ̃yâ-laa da sã́a-laa wɛlini é tɛ́ɛ sâla-kuláa ma.
4Ŋwana-lɔ̂ɔ-nuu ŋɔfúlu-lai mɛi káa-sɛŋ ƃa ŋɛi-naŋiŋ-mɛi da yoŋka téɛɛ. Nyíŋi ǹyaŋ káa a sɔnyɔ̂ŋ.
5Tíi-kpanaŋ kɛ́-nuu ŋɔmɛni-kpɛtɛɛi a pâ a sɛŋ támaa, kɛ́lɛ ǹúui a tɔɔ-laa kɔ̀ri a maa kpɛ̃liŋ, maa tɔɔ-laai fa tûa zu.
6Tɔɔ-laa sɔlɔ ƃóɔɔ a wôya-pere fa tûa. Gáa nɔ́ yɛ̂ɛ lúu nyii va tûa tâai. A ípìli saa ŋɔƃáre ŋá.
7Ŋwana-lɔɔ-ƃela tûa-pere a dísu kàra kpɛ́ni fêi, dífa fàa ma dí mɛni sãa kɛ́.
8Sɔnyɔ̂ŋ-nuu sia-pere kpĩnaŋɔɔ̂i, kɛ́lɛ tɔ̃yâ-nuu sia-pere sãâi.
9Ínyiɛɛ banaŋ ma lɛ̂lɛɛi é tɛ́ɛ la ka ínɛnîi ká kɛ́ ƃò pɛ́rɛ tɔnɔ mu nyii ǹaa-saai.
10Ŋwana-lɔ̂ɔ-nuu láa fɛ̂ɛi a ŋwana-lɔɔ, va gɔlɛ-ma-nuu malôŋ kàa.
11Ƃa tɔ̂ŋ pù ǹúui ma a ɣɛ́lɛ-maa kûla núu kponôi, gɛ̀ ní diai táre fé díŋuŋ sui, da pâi târei. Ƃà táre-nuu ŋɔpɔra-maa lɛ̀ mà, a pâiŋɔtárei da pûi ma.
12Ɣâla nyii zãâi, è ŋwana-lɔ̂ɔ-nuu ŋɔpɛ́rɛi mu mɛni-ŋai kɔ́lɔŋ. Ǹyaŋ a pâi ŋ̀wana-lɔ̂ɔ-nuui su karâi.
13Ƃa íwoli láa tɛ̀ kôlo-nuu wɔlɔ-woo ma, yáŋ ƃà wɔ̀lɔ, núu da fé pâi íwɔlɔ-woo mɛnîi.
14Núu líi à ŋwàna yâ, ƃà sama-sɛŋ tɛ̀ɛ bɔ́ loo-pere su, a ŋɔlíi-ŋwanai ŋá yèŋ. Kɛ́lɛ yee-pɛlɛ ǹá sɛŋ-kao a lii-ŋwana su sàa.
15Tɔ̃yâ mɛni ŋá-teɛɛ a tɔ̃yâ-nuu líi làa, kɛ́lɛ a sôli wôya-nuu ma.
16Núu a kùla táre ŋɔperei ma, a lî zaa-ƃelai kɛ̂i.
17Ŋ̀éniɛi su-sɛŋ wɛ́liɛɛ a pâ a kôlo-laa. Ǹúui lii-nɛ̃ɛ-mɛni wɛ́lini, lɔɔ-kpeleɛɛ da mii-sɛŋ lɛ́lɛɛ támaa miɛɛi, va tɔ̂ɔ.
18Ŋwana-lɔ̂ɔ-nuu a tɔŋ-kpɛ-maa sɔlɔ ƃò nyii è gbɛ̀tɛ tɔ̃yâ-nuu mɛni mai.
19Íkɛ-ɣeniɛi kɛ́ɛ fɛ̃ɛ-kpalaŋ su lɛ̂lɛɛi é tɛ́ɛ la núu kɛ́ɛ pɛ́rɛ mu da ŋɔnɛnîi nyii ǹaa-saai gɛ́ ísɔŋ kɔ̂ri a ɣele kéleei.
20Táre-nuu a gɔ̂liŋ mɛi kâa, ƃoo-nuu kɛ́ ŋ̀ɔ́i su kàra.
21Ǹúui a tɔ̃yâ-laa da maloŋ-kaa kɔrii, a fúlu-laa da ƃaa-kɛ-maa sɔlɔ ƃô.
22Táre-nuu a wála-wala-ƃela dítaa-lee sîɣe, gɛ́ daai ŋɔsiɣãŋ wôlo nyii dí lâai lai.
23Ǹúui a ǹágbɔ mɛi kàa da ǹɛ́ŋ, va pîli mɛni kpɔ̂lu su.
24Ǹúui a ɣɛ́lɛ-maa kùla núu kponôi, a tɛ-ŋɛi kɛ̀, ǹyoŋkaa, ǹíi kɛ́tɛɛ.
25Nyɛ̃ŋ-nyɛŋ-nuu a gbîŋ pàa, kpɛ́ni fêi, vé ŋ̀wɛ̂lii é tíi kɛ́, 26gɛ́ ƃò a sɛŋ wɛ̂li-nuu a tãi kélee, kɛ́lɛ tɔ̃yâ-nuu a sɛŋ tɛ̂ɛ a lii-nɛ̃ɛ.
27Ŋwana-lɔ̂ɔ-nuu ŋɔsâla-sɛŋ ƃɛlɛ fé Ɣâla Yâwɛɛ koi, ŋuŋ kpîŋ-kpiŋ ƃa à kɛ a zâlai kpîŋ kùla a kíri-pere.
28Wôya-sere-faa kɛ́-nuu wóo a kâra kɛ́lɛ tɔ̃yâ-nuu wóo fa kâra.
29Ŋwana-lɔ̂ɔ-nuu a gbîŋ lɛ̀, kɛ́lɛ tɔ̃yâ-nuu a dûa-pere maa kpɛ̂ɛ.
30Núu-kpune ŋɔtárei, ŋɔmɛni ŋá-kaai da ŋɔlia-wooi fa pɔ̂ri Ɣâla Yâwɛɛ yée mɛi ɣâlei.
31Da kɔ́-kɔ-soo maa ɣîri kɔ́ mɛni ma, kɛ́lɛ Ɣâla Yâwɛɛ ƃa pâ a yee-tɛɛ-maa.
Currently Selected:
Táre-woo-ŋa 21: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
