Zôo 5
5
1“Zôo, ye tóli ƃó í gáa à kɛ̀ núu da a pâi fâai íwoo mu.
Ŋ̀âla-taa kelai da káa naa nyii ya pɔ̂ri marê kɛ̂i a gɛɛ é kpɔŋ mâ tɛɛ ípɔ?
2Líi ŋwâna da tólo
a ƃoo-nuu su kàra.
3Ŋá m̀oo-ƃela kâa dítɔɔ̂i kpanaŋɔ̂ɔi kpɔ́ a ŋánaa,
kɛ́lɛ ŋa dípɛrɛ-ŋai náɣaŋ-laa kpɔ́ a màa félaa.
4Dínîa-pɛlɛɛ-ŋai díkaa nɔ́ wɔ́lɔ mɛni kpɔ̂lu su.
Mɛni a wɔ́lɔ lɛɛ dîa mɛni-saa ƃó-kere-ŋai mu.
Núu da fé naa é tɔ́ɔ díƃela ma-pere.
5Diai puru káa dîai da pâi m̀oo-ƃelai dímii-sãai kélee miî,
é máŋ kɛ́ a nyii-ŋai ŋ̀alêŋ-kpɔlɔi sui.
Mii-sɛŋ wɛli-ƃela da pâi tɔɔ̂i dîa dígɔ̃liŋ mɛni ma.
6Mɛni nyɔ́mɔɔ fé a sɛŋ nyii a sôo ǹɔii ma yɛ̂ɛ sí-sɛŋ,
kpaa máŋ mɛni kpɔ̂lu é sóo ǹɔii ma.
7Kɛ́lɛ mɛni kpɔ̂lu a pâi wɔ̂lɔ kɛ̂i nɔ́ núu pôlu é síɣe maa sɔlɔ-ƃo tãi ma,
yɛ̂ɛ berei ŋɔŋ-kpãle a tâa la ɣelêi.
8“Eêi kɛ̀ ńyãa ƃa yá,
gɛ̀ ní ŋ́aâ lí Ɣâla pɔ́naa ŋá ḿaa mɛni pú ŋ̀ɛi.
9Kúfa târe gili-ŋa tɛ̂i mɛni kpaya-kpaya-ŋai su Ɣâla a gɛ̀i,
ǹyaŋ ŋɔzugbɛrɛ-gbɛrɛ mɛni-ŋai kóyaŋ fé ma.
10Ɣâla a gɛ̀ tuna é pú ǹɔii ma,
gɛ̀ yá pù gbálaŋ-ŋai ŋá.
11Diai dífii kpɛɛ̂i, Ɣâla a dímu sìɣe é dítɔɔ.
Diai malôŋ toɔ̂ɔi diai, Ɣâla a díŋa-nɛnɛ.
12Ɣâla a ŋ̀ôya-ƃelai dí mɛni kpɛtɛɛ-ŋai kélee su kàra.
Dí mɛni kpɛtɛɛ-ŋai ŋá fa kûla ma a ǹɛ́lɛɛ.
13A ŋ̀ôya-ƃelai sòŋ a díkpɔɔi woya-tarei.
Ɣâla a núu-pɛlɛ-ƃela díwôya mɛni kpɛtɛɛ-ŋai su kàra a maa félaa.
14Tãi kwaa a kɛ̂ la a bonoɔɔi, da kɛ̂ nɔ́ kpînii,
díkɛ díkɔɔ tùa a vóloi-ŋa yɛ̂ɛ ŋ̀ɛ́i pû-nuu-ƃela ƃé siâi kpînii.
15Kɛ́lɛ Ɣâla a gôlo-ƃelai kùla saa yêei.
A ǹúu doo-mu-ŋai kùla dímɔ̃lɛ-laai su.
16Ɣâla a kili-kɛ-zu kɛ́ gôlo-ƃelai yêei,
a ŋ̀wana-lɔ̂ɔ-ƃelai kpéra díwana-lɔ̂ɔ tùa-ŋai dîa.
17“Lûwa káa diai dîa Ɣâla a díteniŋ tɔɔi.
M̀ɛni ma, ífe íyee kùla Ŋ̀wála-wâla kélee ɣalai ŋɔmɛni kula maa kɛ́ɛi mu.
18Ɣâla a núu wàna, é maa palai tí sále.
A mɛni ŋánaa kɛ̀ a núu é maa nuui tí ƃálo.
19Tãi nyii kélee nɔ́ ya pîli la mɛni kpɔ̂lu sui,
a pâi kpɔnîi yâ é ímaa kɔ̃ɔ.
20Tãi puru a tôo lai, Ɣâla a pâi íkɔnɔŋ kulâi,
tãi máŋ kɔ́ a pâi toôi lai, vé pâi nɛɛ̂i naa dí ípaa.
21Ɣâla a pâi íkulâi diai da mɛni nyɔ́mɔɔ ƃò é pîlaŋ yâi díyêei.
Ífe pâi yaôi tãi mɛni kpɔ̂lu sii kélee da a pâ la ípɔi.
22Ya pâi íŋɛi naɣîŋ-nii mɛni kpɔ̂lu da puru dímɛi.
Ífe pâi yaôi lɔɔ fɛnɛ-sãa dîa.
23Kɔni fé pâi kɛ̂i íkpâlaŋ ŋa.
Ǹɔɔ fɛnɛ-sãai dífe pâi pɛlɛ̂i yâ.
24Ípɛrɛi mu-sãai kélee kpɔ́ a pâi ƃûu ƃôi.
Í máŋ íƃala konaŋ su káa, gélee a pâi kɛ̂i a ŋaa pɔ̂riɛɛ.
25Ínîa-pɛlɛɛi da pâi kɛ̂i kpɔ́ a dítamaa,
yɛ̂ɛ berei tí kala káa la ǹɔii gwaa kélee mai.
26Ya pâi lɛɛ̂i ɣele ma ípɔlɔ,
yɛ̂ɛ berei tí mɔlɔŋ a mɔ̂ŋ la dílɛɛ pâi dêei.
27Zôo, kwa mɛ̀ni-ŋai maa kpɛ́ɛ a ǹɛ́lɛɛ.
Díkaa a tɔ̃yâ. M̀ɛni ma, íyee sée mù íkpîŋ mɛni ma.”
Currently Selected:
Zôo 5: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
