Azaya 20

Itiopia da Ize maa mɛ̂ni

1Asiria kaloŋ Sagɔŋ è wála-wala tɛ̀ɛ gɔ́ kɔ́-ƃelai láa túɛ-nuui pɔ́ a gɛɛ é pɛ́lɛ Felesia taa-leei Asɔdɔ ma é ǹaa siɣe. 2Maa kôraŋ ƃé Ɣâla Yâwɛɛ è m̀o la Emɔ ǹóŋ Azaya ma ǹyɛɛi, “Ye íkpaŋ-kpalii kúla íkɔɔ ŋá í m̀aloŋ-seɣei kúla yâ.” È fàa ma é m̀aa kpôloŋ é lɛ́ɛ a gáa kâŋ, gɛ́ sìa a gɔ́ɔ ŋá fòlo. 3Tãi dí Asɔdɔ taa-leei láa túɛ-ƃelai yée mɛi ɣàle la dí ǹaa siɣei, Yâwɛɛ è m̀o ǹyɛɛi, “Ńyee-mu-nuui a kɛ́ a gáa kâŋ gɛ́ ƃò a gɔ́ɔ ŋá fòlo kóraŋ saaƃa yée mu. M̀ɛnii pâi kɛ̂i a Ize da Itiopiai lɔii-ŋai, maa ŋɛi kɛ-maa ká ŋí. 4Asiria kaloŋ Sagɔŋ a pâi Ize da Itiopia lɔii-ŋai láa túɛ-ƃelai yée mɛi ɣâlei é ǹaa siɣe. A pâi ǹaa-ƃelai kélee sonîi a kɔ-sôŋ-ŋa. A pâi díkelee dímaa kpôlonii dílɛɛ a díkaa kaŋ, díkɛ ƃò a díkɔɔ ŋá fòlo, ǹuu pɔlɔ-ŋai da ǹyaŋkpa-ŋai. A pâi kɛ̂i a ŋumɛ su-kɛ́tɛ dîa. 5Diai dí kíli tɔ̀ɔ Itiopia ma, díkɛ yoŋka tèe a Ize láai, da pâi ŋumɛ̂i a zu-kɛ́tɛ dí yào. 6Maa tãi tí a sèri, Felesia-ŋai yúo kpono ma perei da pâi m̀ôi dîyɛɛi, ‘Áao, ka gáa, berei diai kúkili káa dîa kúmaa kɔ̃ɔ mɛni ma Asiria kaloŋ yêei, dímaa mɛni a kɛ́ lai! Kúaŋ kúmaa mɛni a pâi kɛ̂i léŋ. Kwa pâi lɛɛ̂i nɔ́ ƃé ŋí ɣele ma?’ ”

Currently Selected:

Azaya 20: KWB

Highlight

Copy