Azaya 19
19
Ɣâla a pâi Ize kula maa kɛ̂i
1Ŋ̀orɛ̂-wooi ká ŋí bîlaŋɔɔi Ize lɔii mai.
Yâwɛɛ a pâi Ize lɔii su. Gáa ŋ̀ele-kɔlɔŋ su vãai su gɛ́ pà a maa félaa. Ize-ƃelai díkpɛtɛ ɣâla-ŋai kélee da pâi toôi gɔ́ɔ mu díkɛ kpɛ̃liŋ. Ǹyaŋ Ize-ƃelai líi a pâi toôi pôlu a ŋ̀ánaa. 2Yâwɛɛ a m̀ôi ǹyɛɛi, “Ŋa pâi gɛ̂i Ize-ƃelai dí tɔ́ɔ díkîe-ni dîa. Káa-laa tɔnɔ su-ƃela da pâi kɛ̂i kɔ̂i díkîe-ni pɔ́. Kóli tɔnɔ su-ƃela da pâi kɛ̂i kɔ̂i díkîe-ni pɔ́. Taa-lêe-ŋa su-ƃela díkɛ kɔ̀ díkîe-ni pɔ́. Kâloŋ lɔii-ŋuŋ-ŋa láa túɛ-ƃela dí tɔ́ɔ díkîe-ni dîa. 3Ŋa pâi gɛ̂i Ize-ƃelai líi é tóo pôlu. Ŋa pâi gɛ̂i a gɛɛ díkpɛtɛ mɛ̂ni-ŋai da ŋ̀aa sèe fé kɛ̀ a ǹɛ́lɛɛ. Da díkpɛtɛ ɣâla-ŋai da marê kɛ̀ kili-ŋa pôno mɛni ma, maa târe fa kɛ̂ ǹyêei. Da saa mɔ̂leŋ da marê kɛ̀, maa mɔ̂leŋ fa pɔ̂ri kpɔŋ mâa da tɛɛ̂i dípɔ. Da tela lì tɛli kpɛ́-nuu da pɔ́ naa dífa táre lɛ́lɛɛ da sɔlɔ ƃô ǹyêei. 4Ŋa pâi dítɛɛ̂i kâloŋ sɔŋ nyɔ́mɔɔ-ŋa pɔ́ dí dímɔ̃lɛ. Ńyãai a Ǹuu-namui, Ŋ̀wála-wâla kélee Yâwɛɛi, ŋ́oo ká tí.”
5Ǹya-lêe-ŋai da pâi kpâlai, Ǹâai Ya-leei fa ŋɔ́nɔ yá sɔlɔ ƃô ǹya-ɣɛ̂li-ŋai yêei. 6Ǹya-ɣɛ̂li pɛlɛɛ-ŋai da pâi kpâlai, gala-ŋai kélee ǹyái sui, dí lûla, ǹaa kúŋ é nyɔ́ŋ. 7Zí-sãai dí dísì Ǹâai Ya-leei mai, gélee su a pâi karâi. 8Diai kpîŋ díkɛ-ɣéniɛi kɛ̂i Ǹâai Ya-leei mai, díkelee dílii a pâi toôi pôlu a ŋ̀ánaa. Dítuma-ŋai da díkpawɔ-ŋai da pâi kɛ̂i nɔ́ díyêei kpɛ́ni-kpɛni. Kwaa da ma fé naa dí lí a dia naa yá-kpɛ mɛni ma. 9Zeɣe kôli nɛnɛ-fɛfɛɛ kpɛtɛ-ƃelai da zeɣe pala-ƃelai líi a pâi toôi pôlu. 10Zeɣe pala-ƃelai kélee líi a pâi toôi pôlu. Kwíi-tii mɛni fé ŋɔ́nɔ pâi kɛ̂i naa diai kɛ̀ kwíi-tii kɛ́i naa dímɛni ma. A pâi kɛ̂i a lii-too pôlu su-kɛtɛ dímɛni ma.
11Zoaŋ taa-leei láa túɛ-ƃelai dífe ŋɔ́nɔ lia-woo ƃô lɛ́lɛɛ sɔlɔ ƃôi Ize kaloŋ ŋɔlia-woo ƃô kɛ́-ƃelai yêei. Díkelee dítarei ŋá fé ŋɔ́nɔ pɔri ní! Da pɔ̂ri môi léŋ gâloŋ ma a gɛɛ díkaa a sɛŋ kɔ́lɔŋ-ƃela da gâloŋ pɔlɔ-ŋai lônii? 12Ize kaloŋ, íwôya tare-ƃelai kɔɔ? Tãi ta da pâi môi yâ m̀ɛni kpɛtɛɛi Ŋ̀wála-wâla kélee Ɣalai, Yâwɛɛ a gɛ́ Ize mɛni mai. 13Zoaŋ da Mɛfi láa túɛ-ƃelai dítarei ŋáa fé ŋɔ́nɔ pɔri ní. Dia ƃa ǹɔii ǹônii, kɛ́lɛ da ǹûai kíli ŋá pú. 14Yâwɛɛ a díkili ŋá pú. M̀ɛnii ŋí a gɛ́ dífe ŋɔ́nɔ m̀ɛnii kɔ́lɔŋ dí gɛ́i. Da kɛ́ nɔ́ yɛ̂ɛ lɔɔ ŋánaa kpele-nûu ƃé tálanîi gɛ́ tòo gbɔ́ɔi kɔŋ-pilii su. 15Núu da fé pâi kɛ̂i Ize nyíi da pɔ̂ri kpɔŋ mâa da sɔlɔ ƃôi ǹyêei. É máŋ kɛ́ yɛ̂ɛ tɔɔ-nûu kpaa máŋ kôlo-nuu, núu nyíi nûa dí gɔ́lɔŋ kpaa máŋ ǹúui nyíi nûa dífe gɔ́lɔŋ.
Ize-ƃelai da pâi Yâwɛɛ fɛlîi
16Yâwɛɛ a pâi Ize-ƃelai kula maa kɛ̂i. Maa tãi tí a sèri, a pâi gɛ̂i ǹɔii gwaa kélee é kpɛ̃lîŋ. À kɛ̀ tí, Ize-ƃelai da pâi yaôi a ŋ̀ánaa díkɛ kpɛ̃liŋ yɛ̂ɛ nɛyâa. 17M̀ɛni kpɛtɛ́ɛi Yâwɛɛ a gɛ́ Zuda mɛni mai, maa mɛ̂ni kíli a tòo Ize-ƃelai kíli ŋá, yao ŋánaa a pâi pâi díkɔlɔi.
18Maa ɣêlei tí, Ize taa-leei ǹɔ́ɔlu su-ƃela da pâi díkono-têei Ŋ̀wála-wâla kélee Yâwɛɛ yêei foo-wôo-ŋa su Ibulu-wooi su. Da pâi daa-lêei ŋí dɔnɔ láa seêi a, “Vólo taa-leei.”
19Maa ɣêlei tí, da pâi Ɣâla-teƃele tɔɔ̂i Yâwɛɛ mɛni ma Ize lɔii su, dí kɔni yeŋkeŋ tɔɔ Ize lɔii goyaŋ-perei ma dí dɛɛ Yâwɛɛ pɔ́. 20Ŋ̀âla-teƃelei da yeŋkêŋ da pâi kɛ̂i a ŋɛi-kɛ-maa da sêre da Ŋ̀wála-wâla kélee Yâwɛɛ ni díloai a gɛɛ tãi kélee díkpɔara-nuu da a pɛ̀lɛ dîa, da wɔ̀lɔ Yâwɛɛ ma, a pâi díŋuŋ ma ƃó-nuu tɛɛ̂i dípɔ é dímaa kɔ̃ɔ. 21Yâwɛɛ a pâi gbîŋ lɛ̂i Ize-ƃelai dîa. Ǹyaŋ Ize-ƃelai da pâi gɔ̂lɔni. Da pâi kɛ̂i vɛlîi díkɛ kéreŋ sâla kula ma, díkɛ sama-sãa tɛ̀ɛ bɔ́. Da kono-tee kɛ̀ ǹyêei, da pâi ŋ̀aa-see kɛ̂i. 22Ɣâla Yâwɛɛ a Ize-ƃelai kula maa kɛ̂i kɛ́lɛ a pâi dí ƃâloi. Da pâi tínanîi bɔ́-naa pere ǹyaŋ a pâi dí fɛli-wooi mɛnîi é díƃalo.
23Tãi tí a sèri, laoi-laa pere lá a pâi ƃôi Ize-ƃelai da Asiria-ŋai loai. Asiria-ƃelai da pâi kɛ̂i pɔrîi liî Ize, Izi-ƃelai dia máŋ díkɛ pɔri liî Asiria lɔii su. Ǹɔii ŋuŋ feerɛi ŋí su-ƃela da pâi kɛ̂i Yâwɛɛ fɛlîi gîe ma. 24Maa ɣêlei tí a sèri, Eezuɛ, Ize da Asiria da pâi kɛ̂i a dípɔriɛ́ɛ ǹyaŋ ǹɔii-ŋûŋ-ŋai ŋ̀éniɛi sui da pâi lûwa sɔlɔ ƃôi dísarâi. 25Ŋ̀wála-wâla kélee Yâwɛɛ a pâi lûwa lâai dîa ǹyɛɛi, “Káai a ǹɔii-ŋuŋ saaƃai ŋí, lûwa káa kâa. Káai a Ize-ƃelai, káa ƃa ŋánûai. Káai a Asiria-ŋai, ńyãa ƃé gɛ̀ kákaa ɣele ma. Eezuɛ-ƃela, káa ƃé ŋá kásiɣe zu ŋ̀éniɛi su-ƃelai sáma.”
Currently Selected:
Azaya 19: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
